1  * Mat 5:31; 19:7; Mrk 10:4E Moses i ta tabu i ta maea, “Na tahuna a bakovi i parangi a ngatavine, muri i matavisia vona tara maregoa, lakea i uka ma i ngaru tabua, ge herea tara raukea ge habia na ngatavine, muri ge tonoa ge vano. 2 Lakea a ngatavine ge vano ge matavisia tara bakovi ge parangi vona. 3 Muri a bakovi iea tara i uka ma i ngaru tabua, ia tara ge here tabua a raukea ge vakaloboa a parangia, ge habia na ngatavine, ge tonoa ge vano. Pali na tahuna e girihina i parangi muri vona i mate, 4 e girihina muga nahea ge parangi tabu vona. Ge lohoka vona ra ngatavine iea i muto pali na matane BAKOVI DAGI, nahea ge parangi vona. Ia ge parangi tabu vona ngatavine iea, e BAKOVI DAGI i uka ma i ngarua a naro muma iea. I mavonga, na tahuna mu bolea pali a malala e BAKOVI DAGI i ngaru ge habia ne mua, naha ni ratea ra naro hale iea.

5 “A bakovi i parangi karaba nahea ni gi rudu ge dili na tara na vabinga, o ge rata ranga leho dagi. Ge made tavula na tanga ge harena na pida i taku, ge rata kamumua a hatene girihina.

6 “Na tahuna mu longo vona tara bakovi ge bole a makoli ne mua, mu ngaru ge habia mua tara maki ge a kilakilana ge koli mule a makoli vona, naha ni bole a maka kedo ni tutu a vit vona, ma mu gu bole a maka kedo ni leho vona, i uka ma ge kisi a maki ni kani vona.

7  * Nim 21:16 “Na tahuna a bakovi i lakavua tara kabu vona a Israel i bolea ge a vorakato vona, o ge matataroa tara viri i konea ge a vorakato vona, mu rabalakia a bakovi i ratea a naro iea. Mu rata mavonga, bara mu vakaloboa ra naro hale iea.

8  * Levi 13:1–14:54 “Na tahuna a maka patala ri bele tavula na kuline mua, mu rata lobo a maka maki e huriki a prister na kabu ne Levi ri taki mua vona mu gu rata. Mu ramai lobo a maka ngava a vakuku ria vona. 9  * Gi 12:10Mu luhoi kadoa a maki e BAKOVI DAGI a Vure ne mua i ratea ne Miriam, na tahuna si pea e Egipto si valai.

10  * Nim 22:26-27 “Na tahuna mu longo vona a kabukabu ge bole a makoli ne mua, naha ni dili na ruma vona mu gu bole a maki i ngaru ge habi ne mua, ge a kilakila vona ge koli a makoli. 11 Mu dava polovavo, ia kunana ge bole pori vilia a maki ge a kilakila. 12 Ia ge a hulu matasia, ge habia mua a mavidana kala dagi ge a kilakila vona ge koli a makoli, naha ni nugu tatea ge harena kuduvi. 13 Mu habi mulea vona na tahuna a haro i uka ma i rolo ma, ge kavitagua vona na tahuna i mahita. Muri a bakovi iea bara i kavurike mua, e BAKOVI DAGI a Vure ne mua bara i ngarua a naro malamala ne mua.

14  * Levi 19:13 “A vora ne mua ge bala vona tara maki, naha ni rata halea. I uka maki vona ge ia a kabukabu o ge ia a bakovi basi i made na tanga ne mua. 15 Na malunga lobo mu habi a mapana leho i rata vona a parava iea. A vuhuna i bala a maki i dava ni bole a moni. Mua i uka ma mu habi a moni vona, bara i tangi lakea ne BAKOVI DAGI, bara mu tahoka a ngava na naro hale ne mua.

16  * 2Ki 14:6; 2Sto 25:4; Ese 18:20 “Na tahuna a bakovi tara i rata a naro hale, naha ni koli mu gu rabalaki e tamana o e kinana. I mavonga kunana na tahuna e tamane ria e kinane ria ru rata a naro hale, naha ni rabalaki e huriki e tune rua. Mu rabalaki kunanea a viri i rata a naro hale.

17  * Nim 23:9; Levi 19:33-34; Vin 27:19 “Naha ni rata hale ni radi a maki ne huriki a mosi, a tuna duku, a havuri. Na tahuna a havuri i makoli vona tara maki, naha ni bolea a nirodo vona ge a mapana. 18 Mu luhoi mule, na tahuna mu leho manga a vorakato o Egipto, e BAKOVI DAGI a Vure ne mua i vakaha tala mua. Mua mu made hale maea, lakea a habia mua a vinara iea.

19-21  * Levi 19:9-10; 23:22 “Na tahuna mu mirio a vit na hania, mu matataro vonga a masigona, naha ni hamule mu gu poi. Na tahuna mu pasi a kanena oliv o a kanena vain, naha ni hamule tabu mu gu pasi a kanena ri tababana ni tavore. Mu pe vonga ngi, bara i bole e huriki a ngatavine na kabu basi, e huriki a tuna duku, e huriki a havuri. I mavonga e BAKOVI DAGI a Vure ne mua, bara i gamai mua, a maki lobo mu rata bara ri bele kamumu. 22 Mu luhoi mule a tahuna mu leho manga a vorakato o Egipto, i hale a nimadene mua vonga, lakea a vakuku maea mua.”