1 E BAKOVI DAGI i bele ne Abraham tabukoi na maka kai dagi o Mamare. A haro i kara hateka lakea i made na matana kape vona. 2  * Hib 13:2E Abraham i mata rike i matai a mosi i ala tolu to pesi tabukoi vona. Na tahuna i matai tou, i pesi rike na kape, i tagui tou, i lolu puru ge vakasiri a ningaru vona ne tou.

3 Lakea i ta maea, “Matou a bakovi dagi ngane naha ni laho polo, iau a hulu mavonga, a ngaru matou moto malo ge popote. 4 Moto made dili na taruna kai, ni gi bole valai a naru moto vahilolo a vahane matou vona. 5 Ga bole ranga maki moto kani, moto tuhaka, muri moto go laho, a vuhuna moto bele nau.”

A mosi nga to koli a ngavana, to ta maea, “Kamumu hateka, o rata manga a hini o taki.”

6 Lakea e Abraham i laho malaviriri lakea na kape i takia e Sara, “O mala­viriri, o bole a plaoa ge 22 lita, o pulo, o rata ranga bret.”

7 Muri i nunu lakea na kabuna bulmakau, i rabalakia a tuna bulmakau gavutuvutu, i habia na vora vona, i papa hari ni gutuna. 8 Ni gutu lobo a tuna bulmakau, muri i bole turana sis, a namona ruru na bulmakau i ru puru na ngalane tou. To kakani tou, pali e Abraham i pesi dava tabukoi ne tou na taruna kai.

9 Ngane a mosi nga to nanea, “Avia e girihimu e Sara?”

E Abraham i koli, i ta maea “Ia pololilo na kape.”

10  * Rom 9:9Muri e BAKOVI DAGI i ta rike i ta maea, “Iau ga hamule valai tabu na tahuna maea na pida muri, e girihimu bara i tahoka pali e tuna a bakovi.”

Pali e Sara i pesi kunana na matana kape na bitona e Bakovi Dagi, i longo a ngava i taki. 11 E Abraham rua e Sara ru gare pali, a pida ne rua i kupo. E Sara i polotaroa pali a pida na ni vakabele a koma. 12  * 1Pe 3:6Lakea e Sara i luhoi kadoa a ngava i takia a bakovi dagi, lakea i nongo vaki mule ia, i ta maea, “Iau i malulu pali a kuligu, e girihigu tara i gare, ra ngane ga pitei navai vona a ngava iea.”

13 Muri e BAKOVI DAGI i takia e Abraham, i ta maea, “A ra vuhuna e Sara i nongo, i ta maea, ‘Iau ga singou navai? Iau a gare pali.’ 14  * Luk 1:37A maki lobo a maki tavula ne BAKOVI DAGI. Na tahuna a hamule valai tabu na tahuna maea na pida muri e Sara bara i tahoka pali e tuna a bakovi.” 15 Pali e Sara i mangenge i ta maea, “Iau i uka ma a nongo.”

Lakea e Bakovi Dagi i takia, “Muholi, ioe o nongo.”

16 Na tahuna to pesi rike a mosi nga to go vano, to tuva puru, to masia e Sodoma. E Abraham i turane tou ge rupolo tou. 17 Muri e BAKOVI DAGI i taki mule ia, “A maki ga ratea i uka ma ga ta ruhulolo ne Abraham. 18 Muholi, e huriki a hamone Abraham bara ri ala kupo, ri pesi tora hateka. A kabu lobo na malala ni gi gamai na limana kunana. 19 Iau a vulakia e Abraham, ge vara e huriki e tuna, e huriki a viri vona ri gi longototoa a ngavagu. Ri gi rata a naro ge kamumu ge kiripiripi, lakea iau bara habia ne Abraham a maki a ta muholi vona ga habia vona.”

20 Muri e BAKOVI DAGI i ta maea, “A ngava ni taki virihi e Sodoma e Gomora i dagi hateka, a naro hale ne huriki vonga i hale liu, 21 Iau ga puru lokovonga ga matai a narone ria i manga a hini a longo pali o i uka. Ge uka, a ngaru ni longo.”

22 A bakovi ala rua nga ru ngalakapulo, ru laho lakea o Sodoma. Pali e BAKOVI DAGI rua e Abraham ru pesi mule vonga. 23 Lakea e Abraham i pesi tabukoi vona i nanea, “Ioe go ratapile e huriki ri naro kamumu turana e huriki ri naro hale? 24 Ge navai e huriki ri ravulu lima, a narone ria i kamumu, a tanga dagi go ratapilea? I kara ioe go luhoi e huriki kamumu ala ravulu lima, o koria a tanga dagi. 25 I uka ma a naro kamumu ra naro ta go ratea, go ratapile e huriki a bakovi kamumu turana e huriki a bakovi hale. Bara o rata e huriki ri naro hale, e huriki ri naro kamumu ri palupulupu. I uka ma a naro kamumu na Matakari na malala ra naro go ratea.”

26 Lakea e BAKOVI DAGI i ta maea, “Iau bara matavisi e huriki o Sodoma ri ala ravulu lima i kamumu a narone ria, i uka ma ga ratapilea a tanga dagi, a vuhuna bara dodo ria.”

27 Muri e Abraham i takia “Bakovi Dagi, iau i uka ma a mangenge ni ta turamu. Iau a maki tavula, a manga a habulo. 28 Pali ge uka a viri ala ravulu lima a narone ria i kamumu, pali ge tahoka kunana a viri ge ala 45, a tanga dagi go ratapilea?”

E Bakovi Dagi i koli mule i ta maea, “Bara i tahoka a viri ala 45, i uka ma ga ratapilea a tanga dagi.”

29 E Abraham i nana tabu, “Pali ge tahoka a viri ge ala ravulu va ni gi matavisi, ge navai?”

E Bakovi Dagi i koli mule, i ta maea, “Bara i tahoka a viri ala ravulu va, i uka ma ga ratapilea a tanga dagi.”

30 E Abraham i nana tabu, “O hatenono, o longotaro ga ta. Pali ge tahoka a viri ge ala ravulu tolu ni gi matavisi vonga, i kamumu a narone ria, a ra go ratea?”

E Bakovi Dagi i koli, i ta maea, “Iau bara matavisi a viri i ravulu tolu vonga, i uka ma ga ratapilea a tanga dagi.”

31 Muri e Abraham i nana tabu, “Bakovi Dagi, iau a rata hateka a ngava i lakea vomu, pali ge tahoka a viri ge ravulu rua ni gi matavisi vonga i kamumu a narone ria, a ra go ratea?”

E Bakovi Dagi i koli mule, i ta maea, “Bara i tahoka a viri ala ravulu rua, i uka ma ga ratapilea a tanga dagi.”

32 Muri e Abraham i nana tabu, “Bakovi Dagi naha ni tahate, ga nana ioe balaka taku tabu. Pali a viri ge ala ravulu ni gi matavisi vonga, i kamumu a narone ria, ge navai?”

E Bakovi Dagi i koli mule, i ta maea, “Bara i tahoka a viri i ala ravulu, i uka ma ga ratapilea a tanga dagi.”

33 E BAKOVI DAGI i ta lobo turana e Abraham, muri i vano. Pali e Abraham i hamule mai a tanga vona.