Bibeli Luayãtaalá 2 Piɛɛ 1

PIƐƐ LÁ PLAADE

Yã́ pↄ́ kú láɛ bee guuↄ

Piɛɛ láɛ bee kɛ̃̀ Yesu náaikɛnaↄnɛ ḿpii (1.1). Aà yã́zĩnda mɛ́ gbɛ̃́ pↄ́ an yã́ lí kↄ̃sɛ ń Yesu baonaoo ɛɛboa ũ. An yãdanɛↄ ì mↄ́ ń yãyaaaoɛ. Tó gbɛ̃́ ye kɛ̃́má, sema aà azĩa kpa Lua dↄ̃a sĩandewa ń Yesu Kilisi yã́o lá gbɛ̃́ pↄ́ wɛsìaàlɛↄ òwa.

Fↄkpaamá gbɛa (1.1-2) a dìdi Yesudekɛyãↄwa ń dɛa náaideↄ ũ Luaɛ lá gbɛ̃́ pↄ́ aa wɛsì Diilɛↄ òwa (1.3-21). Bee gbɛa à waasokɛn ɛgɛnaↄ yãkɛaↄ ń ń kuao bɛ̃̀ɛbò maamaa (2.1-22). À ń yãdanɛ taa ò lɛɛ àaↄ̃ guu, à mɛ̀ aaìↄ gbɛ̃́ pↄ́ aalɛ Kilisi mↄa dãↄ laanikɛɛ, aaì mɛ Kilisi a ɛa mↄ lↄo. Piɛɛ mɛ̀ tó Kilisi mↄa lɛ́ gɛ̃gɛ̃, Lua mɛnakɛa yã́iɛ, asa a ye dasi zɛ'e aa Yesu náaikɛ.

Waasonkɛn ɛgɛnaↄ lí kɛ̃́sã dṹniau gueio. Piɛɛ lá plaade yãdanɛá tia yã́ɛ lↄ, àlɛ tɛ́kpa luanaaikɛnaↄgu aa gɛ́ aɛ Dii dↄ̃a guu, kɛ́ aasu zã zɛ́wao yã́i.

Sĩanakpaa sísia pↄ́ Lua wá sisiwa

1 Mámɛmaa Lua zĩna Simↄↄ Piɛɛ, Yesu Kilisi zↄ̀blena, mámɛ ma láɛ bee kɛ̃̀ gbɛ̃́ pↄ́ wá Lua wá Suabana Yesu Kilisi ń gbá zɛ́ aa a náaikɛ̀ láwáwa a maakɛ yã́iↄnɛ. 2 Gbɛ̃kɛ ń aafiao pɛɛwá Lua ń wá Dii Yesuo dↄ̃a guu.

3 Lua wá sɛ́ wàↄ ku a gawi ń a maakɛo guuɛ, a tò wà a dↄ̃, ↄ̃ aà luakɛgbãa wá gbá pↄ́ pↄ́ dɛ wàↄ vĩ, wá kua i kpaaĩ ń aà yã́o. 4 Beewa à yãzↄ̃ↄ bɛɛɛde pↄ́ à a lɛgbɛ̃̀ kɛ̀wɛ̃ɛ, kɛ́ a yã́i wà bↄ dṹnia dↄ́ɛ'ĩi pↄ́ ì ń ↄ̃̀ↄkpa guu, wíↄ Lua dàa vĩ. 5 Yã́ bee yã́i à ãiakɛ maamaa, à Lua náaikɛ maakɛa guu, í yãmaakɛ Lua yãdↄ̃a guu, 6 íↄ Lua yã́ dↄ̃ ázĩa kũa dↄ̃ guu, íↄ ázĩa kũa dↄ̃ mɛna guu, íↄ mɛna vĩ naa Luawa guu, 7 íↄ naa Luawa kↄ̃gbɛ̃kɛ guu, íↄ gbɛ̃kɛ vĩ ń kↄ̃o ń yeakↄ̃io. 8 Asa tó á yã́ beeↄ kũa mɛ́ aalɛ kã́fĩɛ́, áↄ ku pã wá Dii Yesu Kilisi dↄ̃a kã́fĩaɛ́ saio. 9 Gbɛ̃́ pↄ́ yã́ beeↄ kũa sↄ̃o, à a wɛ́ kũ̀aa à gↄ̃̀ vĩ̀a ũɛ. Kɛ́ Lua duuna pↄ́ a kɛ̀ yãaↄ kɛ̃̀wà, à sã̀aàguɛ. 10 Ayãmɛto ma gbɛ̃́ↄ, à ãiakɛ à gbãakpa sísia pↄ́ Lua á sisi à á sɛ́wa. Tó álɛ yã́ beeↄ kɛ, á fu bauo. 11 Beewa wa gbãakpaázi maamaa, íↄ kú ń wá Dii wá Suabana Yesu Kilisio aà kpala pↄ́ lí láao guu.

12 Ayãmɛto baa kɛ́ á yã́ beeↄ dↄ̃, mɛ́ á zɛdↄa sĩana pↄ́ á kũa guu, máↄ yã́piↄ dↄáguɛ. 13 Gↄↄ pↄ́ má kú ma sↄ guu, málɛ e a maa màↄ tɛ́kpaágu yã́piↄ dↄaágu guuɛ. 14 Má dↄ̃ kɛ́ ma bↄa ma sↄu gↄↄ a ka tia, lá wá Dii Yesu Kilisi dↄ̀aa òmɛɛwa. 15 Má ãiakɛ, kɛ́ yã́piↄ e àↄ dↄágu gↄↄpii ma gaa gbɛaɛ.

Sĩanakpaa ãnabiↄ yã́wa

16 Kɛ́ wa wá Dii Yesu Kilisi mↄa ń gbãao òɛ́, i kɛ wá tɛ́ fĩ pↄ́ wa dà ń kↄ̃niozi no. Wa wɛsì aà zↄ̃ↄkɛlɛɛ, 17 gↄↄ pↄ́ Mae Lua aà kpɛlà à aà tↄbↄ̀. À Zↄ̃ↄde Gawide lↄↄ mà à mɛ̀ a Nɛ́ mɛ̀ndona yenziden aà ũ, aà yã́ ì kaagu. 18 Wa lↄↄ pↄ́ bↄ̀ luabɛpi mà gↄↄ pↄ́ wá kuaànↄ gbɛ̀sĩsĩ pↄ́ a kua adoa musu.* 19 Bee yã́ pↄ́ ãnabiↄ ò sĩanapìliwànɛ́. A maa à laaidↄ yã́piwa filia pↄ́ lɛ́ guduuduu pu ũɛ e gudↄlɛia saana àↄ gɛ́ bilɛi á sↄ̃u, gu i dↄɛ́. 20 Àↄ dↄ̃ gĩa kɛ́ gbɛ̃e lí fↄ̃ yã́ pↄ́ ãnabi kɛ̃̀ láu bↄↄlɛkɛ̀ ń azĩaoo. 21 Ãnabiↄ yãe lí bↄ gbɛ̃nazĩna pↄeã guuo, aa Lua yã'ò lá aà Nisĩna dↄ̀aanɛ́waɛ.

*1:18 Mat 17.1-5