1-2 Óo maa-anaasee aneenná faiqi námufaqa qinée faiqí firaasá ákara rúmannimaqaidaqa. Qinée faqa Yísuna ánoona ufa írimariasa sáimbaqa aní aninná faiqi námuara faqa úriqarara ainainee qímasee qímuqusifaqa rídaqa Ánutuna kúqaa ánoona ufa maqee maasá daundurái máridanoo náaru náaru márianinafa márifaqa minára maasá aníara úriqarara ainainee qímasee qímuqusidanoo.

3 Maasá qíkoofa Ánutufa miná ámaaku ásauku mundírafa Yísufa faqa narí ámuqusiranakiqari narí áfaarirana faqa narí nífauarana faqa narí asooárana faqa ínnisaimbaqa qímiannoo.

4 Óo maa-anaasee aní faiqi námu akaqáusa Ánutuna naakáparufamau fímariafaqa qinée minára írunanoo qifaaqa asasídanoo. 5 Minára qinée aní afeekaikámasee qímamidaqa maasá aiqámausa Yísuna ufa irisée naríara naríara úriqarara ainainee qímasee nímuqusiramau kai fuaqa. Dóo mi-ufána aní qímamidaqa sía fúka aakáparufau, óoqai óosanai írimarunnufana aní qímamidaqa. 6 Mi-nimuqusirána qinée qúnandée miná óosana maaqímminoo máridanoo. Maasá aiqámausa Ánutuna naakápara íriramau fuaqée qinau. Mi-naakaparufáfa óoqai óosanaindari írimariafa maaqí qídanoo, ínnee aiqámausa naríara naríara úriqarara ainainee qímasee nímuqusiranaki máriaqa.

7 Moómoo níkaru qímariasa ueeqée maríasa máaqanna máaqanna daráaniqa máridaqa. Misá Yísunara ásauku mundíranara sía faiqí faiqi kambíqanau foo qídaqa. Miqí maría fasiqausa ueeqée maríasa máridaqa ásauku mundírana namuqáa kámmidaqa. 8 Ínnee ínneeqa nifaaqasáa rakísiaqa. Maasá ufa óoqai ánoonaikimarífa sía maqee ínniki taikáannoo aneenná maaqóo aináinirana ákiaqara náaru innaarúnai óorufinana ámiqimasee máraanneera qímamidaqa.

9 Faiqí moó fannoo ásauku mundírana ufamau sía fímarifa fíaikátee fímarifa mifá sía Ánutuna faiqi máriannoo. Ásauku mundírana ufamáu kai fímarianafa sía ásauku mundírafa kai minakí máridanoo, miná ákoofa faqa minakí máridanoo. 10 Óo maa-anaasee faiqí moó fannoo máa̱ qinée qúnnufana sía qímarinafa aniráinana sía aneenná máaqaki mara quqáa. Sía minára ámiqi ámiqia. 11 Anée miqímarinna fasiqana ámiqi ámiqirufa qínana dóo miná mandóosana dadaaqídana miqímariananoo.

12 Qinée ufa óosana óosana aní qímamiraree qímaseeqa sía papiqasáa rírana amana márifaqa. Aní maqúsai kásooqaqee fírara íridaqa. Minní óonureeqa dóokiqari aní qímamiseeqa narí qímami narí qímamimásee asasifáranoo. 13 Aní áuna faiqi námu maí máriasa máa̱ qiní pásaki ínni nímandaidaqa.