1 Beem ding dim kabalak e, kawin dim kaleem kawtiw i banso kesomeliwi, waneng aul duku tem duku tem keyemsiliw kale.* Sow 1:6; 2:1 2 Keyemsomeliwi, waneng aul biim seiwel kesiliw ding dim e, finik kunum* 6:2 Kibulu em weng sin e kale kel “Sunbin-Got em Muluwel”, angeko, bosiliw te. i mali waneng seiwel atite ati biilo yetemeko, ilo ibolow keyemsomi, ikalem ibolow kuw yemdusiliw kale. 3-4 Yemdusomeliwi, i aul kailsomeliwi, aul bi tanbeleko, kunum waneng tiaktiak, kitil nam inkal so fasulin kunum waneng ke alenaliw kale. Keko beli, Yawe e bokolomele: “Diwkuw diwkuw, nem finik e nam kunum waneng iso be te. Nimtew angom? Kunum waneng dem so kal so biliw kasike. Ikalem itol e 120 ka kel kuw ayet keyemi te.”, angse kale.

5 Beli, Yawe e kawin dim kaleem kunum waneng im ibolow sili sili nam atemeko, “Ikalem ibolow e diwkuw diwkuw sili sili nam kukuw kuw gelewkabiliw kai!”, angeko,* Matyu 24:37; Iluk 17:26; 1 Fita 3:20 6 sakik fian mak kuluko, bokolomele: “Nimtew angom ete ne kunum waneng bi talfut keyemsi yake?”, angeko, ibolow tiaktiak kese kale. 7 Kesomi, bokolomele: “Kilkeyemsi kunum waneng so, samal so, abiil dim boktak kakabiliw awon so, kawin dim em samal so, alik alik finik so biliw biilo kuiaw banim keyemoki te.”, angse kale. 8 Angse kate, Sunbin-Got e Noa em ibolow fukunin kiol so, em kukuw ken so be atemse kale.

9 Sang be, Noa em talfut kelewse sang te.* 2 Fita 2:5

Sunbin-Got em kiin dim e, Noa e kunum kiol kuw kunum keko bomelei, e Sunbin-Got em ibolow fukunin kuw gelewemale kunum alenale kale. 10 Em muluwel alemsal biim wiin e mak e Sem, Kam e, Yafet e.

11-12 Sunbin-Got e kawtiw biilo yetemeko, “Im ibolow e sili sili nam kuw kai! Kawin dim kale, i sakalaw keko, weng bo bo kuw keko, teifuluko, ganomin ibolow kuw kesomeliwi, alik alik i atin kuw wa wa kukuw kuw kemaliw te. Feinka! Itel mak kunum gel mak kukuw ken so kelomin so kunum banim te.”, angse kale. 13 Keko beli, Yawe e Noa elo bokolewomele: “Kawin dim kaleem kunum waneng bi so, im ganbin so, sakalaw keko, weng bo bo kukuw so, be atin kuw fian kebe kasike, ne ilo atin kuw banim keyemoki te. 14 Kasike kame, Noa, ku ais kok am siw fian mak gelolewka! Gesomi, ais gom atew kawin dim em eisneng mak kulusomi, siw tem beem ais kok kut so am so be be eisneng beso gus kabilewolewka! 15 Siw beem fian e kanekote: Mili dulum elote 150 mita, yelem dulum e: 25 mita. Siw em tiakim e 15 mita kaneko te. 16 Siw beem gelokolew ding dim e, ku elo kanelom mililbi kelokolew te! Ku kanelom ais kok gaktak so kasilokolew te! Kate, katiw e dolon mak em fian e ben kun em ki atew ke kolewoleka! Kolewko, siw beem tem e am alemsal mak gelolewka! Am mak e dak, am mak e mutuk, am mak e tikin te. Keko beli, siw beem yelem dulum be abisom makmak kalololewka! 17 Nimtew angom? Ok fian mak dabalalii, e alel toloke kasike. Ne kawin beem mesesem mesesem finik so alakabe be alik alik yenii, i kuanokoliw te. 18 Kate, ne ku so kitakamin weng mak amkoko, dukoloki te. Fein! Ne kulo nam keni te. Kame, ku kukalem aul waneng biilo kuluko, am siw tem kawtem unolewka! 19 Uneko, alik alik samal angom biim yanggus mak kulu, imok mak kulu, siw tem da koyem koyem keyemolewka! Mesik esik ok tom ilo kuiaw keyemoke kasike. 20 Abiil boktak kakabiliw awon so, kawin dim kale kakabiliw samal so, alik alik biim imok so, yanggus so, yemkal yemkal kuw telesomi, kuso siw tem unoliwka! Mesik esik ok tom ilo kuiaw keyemoke kasike! 21 Keko beli, ku wanin akal kuluko, siw tem dalolewka! Samal im wanin akal, kawtiw yukalem wanin akal, awon im wanin akal kulolewka!”, dangse kale. 22 Dangei, fein, Noa e em dangse weng be kili wosuko, fein kanelewse kale.* Kibulu 11:7