5
1 “Yesus e nukalem Mesaya ete te!”, angakabiliw kunum waneng i fein Sunbin-Got em muluwel kebiliw te. Kebomi, ikalem Alew elo ibolow mutuk fian dulewsomi, akalem muluwel alik alik ilo ikati ibolow mutuk fian keyemkabiliw te.* 1 Sion 4:15 2 Nu Sunbin-Got elo ibolow mutuk fian keleweko, em kukuyemin weng beem afak kakamuw tewe, nu num kanekabuluw beem mongom ete kilele kal keluwete: Nu Sunbin-Got em angin ikati fein ibolow mutuk fian keyemkabuluw te. 3 Sunbin-Got elo ibolow mutuk fian kelewbuluw kukuw be kanekote: Nu akalem kukuyemin weng beem afak kel bin em kukuw kilele gelewkabuluw te. Kate, yu kililoliwka! Akalem kukuyemin weng be ilum bate.* Sion 14:15,23-24 4 Nimtew angom? Sunbin-Got em muluwel i kitil keko, kawin dim kaleem eisneng alik alik angom be bolbol keleweko, de mit da kolewkabiliw kasike.
Fein Ibolow e Kawin Dim Kale be Da Koyemkabe em Weng te.
Yu kilele kililoliwka! Num Sunbin-Got elo “Fein!”, dangbuluw beem deiw ete numel kuw keko, kawin dim kaleem kitil eisneng alik alik angom be de mit da kolewkabuluw te. 5 Feinka! “Yesus e Sunbin-Got em fein Min ete te!”, angakabiliw kunum waneng bi imel kuw kitil keko, kawin dim kaleem kitil eisneng angom beelo de mit da kolewkabiliw te.
6 Yesus Kulais akalem ete ok em deiw ete kuw telinba kese kate, e ok so, kaim so, alew biim deiw ete talse te. Keko beli, fein weng em sen mongom kayak Sunbin-Finik e em dulum elote bokolomele: “Feinka! Kunum Yesus be Sunbin-Got em Min ete te!”, angse* 5:6 Gilik im weng sin em weng mongom kale, nu kilele kal keko, dolon kelinba kebuluw te. Kal kunum i beem mongom ete bokolomeliw: Sunbin-Got em Min Yesus Kulais e kawin dim kunum waneng nukatetew kese kale. Nimtew angom? Sunbin-Finik e fein weng em sen mongom kayak kasike, Sion em Yesus elo ok da kolewse ding dim bakate, Sunbin-Finik e bokolomele: “Fein be Sunbin-Got em Min ete te!”, angse kasike (Matyu 3:13-17). Angei, akalem ais dim kuaneko, kaim buselse ding dim bakate, nukati kilele atemuwte: “Fein! E kawtiw nukate tew keko, fein kuanse kai!”, angakabuluw te. kasike,* Sion 1:29-34 7-8 Sunbin-Finik so, em ok da kolewse beso, em kaim buselse beso, alemsal eisneng be weng ki makmak kuw bokolomeliw: “Feinka! Kunum Yesus be Sunbin-Got em Min ete te!”, angakabiliw te.* Sion 15:26 9 Angakabiliw weng be Sunbin-Got elote teleko, akalem Min em dulum elote angse kasike, em weng be kiinwalako, atemsuluw kal so kun so kunum waneng alik alik num weng be bakiyemkabe te.* Sion 5:32-37 10 Kaneko kasike, Sunbin-Got em weng kale kiliko, em Min elo “Fein!”, dangbiliw kunum waneng i akalem angse weng be ikalem ibolow tem ka kel kitil kuw aluwkabiliw te. Kate, Sunbin-Got em Min elo “Fein!”, danginba kebiliw kawtiw i Sunbin-Got elo dasuw bakabe kunum atew kelewkabiliw te.* Galesia 4:6 11 Sunbin-Got em angse weng be kanekote: E akalem sunsun finik so sen mongom kayak Min em kanese beem mongom ete nulo sunsun finik so bin duyemse te. 12 Duyemse kasike, Min eso fewtokobiliw kunum waneng alik alik i fein sunsun finik so bin kulukabiliw te. Kate, Sunbin-Got em Min eso fewtokoko, kelinba kebiliw kawtiw i sunsun finik so bin nam kuliw te.* Sion 3:36
13 Ne fut kale boko, Sunbin-Got em Min Yesus Kulais eso fewtokokabiliw kunum waneng yulo dabalayemi kasike, yu fein kal keliwete: “Nu sunsun finik so bin kuluko, buluw kai”, angeko, kal kebiliw te.* Sion 20:31 14-15 Nu Sunbin-Got akalem ibolow fukunin gelewbomi, elo mesesem mesesem eisneng mak em dulum elote dakalaluw tewe, e num dakalaluw weng be kilikabe kasike, nu kalaing keko, Sunbin-Got em mit mewso teleko, kitil kuw mokabuluw te. Kanekabuluw kasike, nukati fein kal keluwete: E num dakalaluw eisneng be nulo fein duyemkabe te.* Sion 14:13; 1 Sion 3:21-22
16 Yu mali kawkunum kumel yetemeko, “Yakai! I sili sili kukuw mak kebiliw kai!”, angeko, yetemiw tewe, yu Sunbin-Got elo dakalaliwi, e kawkunum kumel biilo dokoyemei, i finik so bokoliw te. Kate, yu kilele kililina! Kawkunum kumel biilo yenei, i kuaninba kebiliw sili sili nam kukuw beem dulum elote kuw ne weng be bokoyemsi te. Nimtew angom? Sili sili kukuw mak beem yan e kawkunum kumel ilo fein yenei, i kuanokoliw beem dulum elote ne weng be yanginba kebi kasike.* Matyu 12:31 17 Feinka! Alik alik Sunbin-Got em kukuyemin weng gelewinba kukuw e sili sili nam kukuw kebe kate, mali sili sili nam kukuw mak kawtiw ilo yenei, i atin kuw kuaninba kekabiliw te.
18 Nu alik alik kal keluwete: Sunbin-Got em muluwel i ibolow sili sili nam kukuw gelewinba kekabiliw kate, Sunbin-Got em fein Min be Alew em muluwel alik alik biilo kilele yetebe kasike, Seten-Ataanim e ki keko, ilo nam teing dale te.* 1 Sion 3:9
19 Feinka! “Alik alik nu Sunbin-Got em muluwel kebuluw kai!”, angeko, kal kebuluw kate, kawin dim kaleem angom alik alik be Seten-Ataanim em afak kebe te. 20 Kate, alik alik nu kilele kal keluwete: Sunbin-Got em Min be teleko, nulo ibolow fukunin ken mak duyemse kasike kame, nu fein Sunbin-Got beelo kal kebuluw te. Kal kesomi, akalem Min Yesus Kulais eso fewtokobuluw beem mongom ete nu em Alew eso akati fewtokoko, buluw te. Yesus Kulais be fein Sunbin-Got kesomi, sunsun finik so bin em sen mongom kayak ete te.
21 Yesus em muluwel ibolow mutuk fian keyemkabi nakunum kumel kunum waneng yutaka! Sunbin-Got em abin kulomin ibolow kebe mesesem mesesem eisneng mak em dulum elote yu singam kel keko, keboliwka!† 5:21 Gilik weng sin e kale kel kawtiw im dasuw-got kekabiliw em dulum elote bakabe te. Kawtiw i tum o, ais o, mesesem mesesem beemdiw kuluko, dasuw-got mak em kiskiw kaiko, bokolomeliw: “Be nukalem got ete te!”, angbiliw te.
Bete kuw. Nem fut weng boyemi fut kame kilaka.
*5:6: 5:6 Gilik im weng sin em weng mongom kale, nu kilele kal keko, dolon kelinba kebuluw te. Kal kunum i beem mongom ete bokolomeliw: Sunbin-Got em Min Yesus Kulais e kawin dim kunum waneng nukatetew kese kale. Nimtew angom? Sunbin-Finik e fein weng em sen mongom kayak kasike, Sion em Yesus elo ok da kolewse ding dim bakate, Sunbin-Finik e bokolomele: “Fein be Sunbin-Got em Min ete te!”, angse kasike (Matyu 3:13-17). Angei, akalem ais dim kuaneko, kaim buselse ding dim bakate, nukati kilele atemuwte: “Fein! E kawtiw nukate tew keko, fein kuanse kai!”, angakabuluw te.
*5:14-15: Sion 14:13; 1 Sion 3:21-22
†5:21: 5:21 Gilik weng sin e kale kel kawtiw im dasuw-got kekabiliw em dulum elote bakabe te. Kawtiw i tum o, ais o, mesesem mesesem beemdiw kuluko, dasuw-got mak em kiskiw kaiko, bokolomeliw: “Be nukalem got ete te!”, angbiliw te.