5
Sios Kawtiw im Kukuw Wa Kebiliw em Sang te.
1 Nakunum kumel kunum waneng yutaka! Mali kunum waneng mak weng kal inkalso mak bokonemomeliw: “Kolin abiw mutuk fian em sios biim mutuk e kunum mak osow kukuw fian mak kekabe te. E akalem alew kalel uso osow kekabe kai!”, nangsiliw te. Yutaka! Kaneko osow kukuw be fein ibolow kelinba kebiliw kawtiw biim kukuw atin kuw wa be bakilewkabe te!* Kunum Ayem 18:7-8; Sawa Weng 22:30 2 Kate, yukalem ete em kanebe kukuw be ibolow fukuninba kesomi, yukalem wiin ete kuw daolew kekabiliw te! Yu kilele ibolow fukuneko, “Eke!”, angeko, amemin fian mak ameko, yom mutuk alakabe kunum beelo kuluko, kut elo da kolewoliwka! 3 Fein! Ne singam keko, bi kate, nem ibolow fukunin e yuso mewso kebe kasike, ne kunum beem kukuw akati diweko, elo yuso makuw geelewkabi te.* Kolosi 2:5 4 Geelewkabi kate kame, yu nukalem Kamok Fian Yesus em wiin dim e wensaneko, kunum beelo akati geelewoliwka! Yom kanelokoliw ding dim bakate, nem ibolow fukunin so, nukalem Kamok Fian Yesus em kitil beso, alik alik be yuso makuw boke te. 5 Bomelei, sios kunum waneng yu yom mutuk alakabe kunum beelo kuluko, kut elo da koleweko, elo Seten-Ataanim em teing dim da kolewoliwka! Da kolewiwi, Seten-Ataanim e kunum beem kal anggil be an kolewoke kate, Kamok Fian em Ding keloke ding dim kabalak e, e kunum beem finik beelo nam banim kele kasike.* 1 Timoti 1:20
6 Feinka! Yu kanelom yukalem wiin dao kemokoliw te! Yu fakam weng kale kilele kililina!
Fakam weng beem belet wanin e sios kunum waneng num kiskiw ete te. Is e sili sili nam kekabe kunum mak em kiskiw ete te.
Yu akokow kebiliw sako? Is fong gel kuw belet dim dukukabiliw kate, belet banban alik alik be fein fasukabe te.* Galesia 5:9 7 Kaneko kasike, yu suaem is be kut da kolewoliwka! Kolewbomeliwi, yu kais nam belet is banim so, ken ati kuw kelewboliwka!
Nimtew angom? Kulais e Abanggayemse Ding em siwsiw men emdiw keko, sili sili nam kunum waneng num gomet elote kuanse kasike.* Aisaya 53:7; 1 Fita 1:19 8 Beem dulum elote nu kame Kulais em Abanggayemse Ding be ibolow fukuneko, kalfongemoluwka!
Kate, kame, sili sili kukuw so, wa kukuw so, suaem is kebe emdiw eisneng alik alik be kut elo da kolewsomi, wangweng kukuw so, kiol kuw kukuw so, belet is banim kukuw emdiw kuw kemoluwka!* Sawa Weng 16:3
9 Nakunum kumel kunum waneng yutaka! Nem sua kel yulo fut boyemsi fut* 5:9 Nu Fol em angakabe fut Kolin abiw mutuk fian ilo dabalayemse fut be kuluko, kal kelinba kakabuluw te. tem ka kel, ne yulo boyemomeli: “Yu kanelom osow nam kawtiw iso bongguko, kakamokoliw te!”, angsi te. 10 Weng be, ne kawin dim kaleem kawtiw alik alik im dulum elote boyeminba kesi te. Feinka! Nem yulo “Yu kanelom osow kekabiliw kawtiw so, bisil nam kekabiliw kawtiw iso, silikmoyemkabiliw kawtiw iso, dasuw-got im wiin daoyemkabiliw kawtiw iso, alik alik iso bongguko, kakamokoliw te!”, angbi weng be alik alik biim dulum elote bokoyemi tewe, alik alik yu kawin dim kale atin kuw kolewokoliw tew te. 11 Kate, ne sios kunum waneng biim dulum elote weng be boyemsi te. Yu kilele kililina! Yom mutuk ka kel biliw dasuw kunum waneng mak
osow kukuw so,
bisil nam kukuw so,
dasuw-got im wiin daoyemomin kukuw so,
mali im wiin de mit da koyemomin kukuw so,
wain ok banban wanomin kukuw so,
yakut kukuw so,
kukuw beemdiw kemiw tewe, yu kanelom iso bongguko, kakamokoliw te! Fein! Yu kanelom kanekabiliw kawtiw iso wanin wanbokoliw te!* 2 Tesalonaika 3:6; Taitus 3:10
12 Yu kilele ibolow fukunina! Ne sios kunum waneng num kut kel biliw kawtiw im diwyemin kunum bate. Kate, yukalem ete fein sios kunum waneng yukalem diwyemin kunum waneng kekabiliw te. 13 Feinka! Sunbin-Got akalem ete sios kunum waneng num kut kel biliw kawtiw ilo kilele diweko, geeyemoke kate, yukalem dulum elote “yu yom mutuk alakabe wa kekabe kunum beelo kuluko, kut elo da kolewoliwka!”* Sawa Weng 13:5; 17:7; 21:21; 22:21-23
Sios Kawtiw ikalem Geelew Geelew Kekabiliw em Weng te.
*5:1: Kunum Ayem 18:7-8; Sawa Weng 22:30
*5:7: Aisaya 53:7; 1 Fita 1:19
*5:8: Sawa Weng 16:3
*5:9: 5:9 Nu Fol em angakabe fut Kolin abiw mutuk fian ilo dabalayemse fut be kuluko, kal kelinba kakabuluw te.
*5:11: 2 Tesalonaika 3:6; Taitus 3:10
*5:13: Sawa Weng 13:5; 17:7; 21:21; 22:21-23