1 गो येसु ख्रीस्‍त आ सोइश्‍शो पत्रुस नङ। एको चिठी पोन्‍टस, गलातीया, कापाडोसीया, एसीया नु बिथीनीया रागीम ब्रशा बाक्‍शो इस्राएल रागी ङा थमा सुइक्‍ब, इन कली ब्रेक्‍ताक्‍न्‍नी। हिब्रू १३:१४ 2 इं आफ परमप्रभु यावेमी इन कली योव़शा, आ मुर दुम्‍नीम देंत। मिनु आ सोक्‍तीमी इन कली येसु ख्रीस्‍त कली टीब सेल्‍तु। आ हुशेमी चोव़खो सेल्‍तु। परमप्रभु यावे आ गेशो शिशी नु थुं नाइक्‍तीके ङोंइती क्‍येङा मुल गे नु शुश बाक्‍ल। रोमी ८:२९

3 इं प्रभु येसु ख्रीस्‍त आ आफ नेल्‍ल आसीक पाइश्‍शो बाक्‍ब, दे गो मान पय। मेको आ शुश शिशी पतीके नु येसु ख्रीस्‍त बेक्‍शो रे सेंसीशोमी इं कली ब्रोंइशा बाक्‍तीक आस गेशा, नक जरमेशो मुर सेल्‍तु। कलस्‍सी १:५ 4 मिनु इं कली स्‍वर्गमी जाम्‍शा मलाइब, काइ मबिग्रेब नु गेना हना यो लीब शोंप वोइश्‍शो बाक्‍ब। कलस्‍सी १:१२ 5 परमप्रभु यावे आ सक्तिमी इं कली कोव़ब। गो पाप रे ब्रोंइशो मुर बाक्‍नय, दे थमा सुइक्‍नय। मेको नेल्‍ल नोले ङा नाक्‍तीमी कोंइब। यूहन्‍ना १०:२८ 6 गे मेको तुइश्‍शा, ग्‍येरनीनी। मुल इच्‍का नाक्‍त सम्‍म थुं थाम्‍चा कली मार मार श्‍येत जाइनीनी। १पत्रुस ५:१०; २कोरिन्‍थी ४:१७ 7 मारदे श्‍येत जाइनीनी देंशा हना, इन थमा सुइश्‍शो थमा कों, जोल कों, दे नाक्‍चा कली श्‍येत जाइनीनी। मोपा श्‍येत जाइतीनी हना, इन थमा सुइक्‍तीके मीम याप्‍पाइश्‍शो सुन क्‍येङा शुश क्‍येट लाइब दुम्‍ब। मिनु येसु ख्रीस्‍त आ यिची ना ठेयब सेल्‍तीक, छेङछेङ नु मान पतीक दुम्‍ब। हितोपदेस १७:३, यसैया ४८:१० 8 गे मेको कली मताइतीनी हना यो, दाक्‍नीनी। मेको कली मुल सम्‍म मतथु यो, थमा सुइक्‍तीनी। गे गिश ग्‍येरना ग्‍येरन बाक्‍शो बाक्‍नीनी, देंने मचाप्‍नीनी। यूहन्‍ना २०:२९; २कोरिन्‍थी ५:७ 9 इन थमा सुइक्‍तीकेमी पाप रे ब्रोंइचा ताइनीनी।

10 साइ ङोंइती परमप्रभु यावे आ लोव़ पाइबपुकीमी गे शिशी ताइब दुम्‍नीनी, दे लोव़ पशो बाक्‍तेक्‍म। मिनु पाप रे ब्रोंइतीके तुइक्‍चा कली शुश माल्‍शो बाक्‍तेक्‍म। लूका १०:२४ 11 मेकोपुकीमी आन आगामी बाक्‍शो ख्रीस्‍त आ सोक्‍त कली “पाप रे प्रोंइब सु बाक्‍मे, गेना जाक्‍बा?” दे हिल्‍लो पामे बाक्‍त। मोदेंशो पा माल्‍ना माल्‍न ख्रीस्‍त आ श्‍येत जचा नु छेङछेङम लचा आ पर्बमी नोले दुम्‍ब लोव़ पामे बाक्‍त। भजन संग्रह २२:-, यसैया ५२:१३- ५३:१२ 12 मेकोपुकीमी आन पाला ङा मुर आन कली ला लोव़ मपामे। नोले ङा मुर, इन कली यो लोव़ पा शेंदमे बाक्‍त। इन कली दोपा शेंदमे बाक्‍त देंशा हना, परमप्रभु यावेमी आ सोक्‍त स्‍वर्ग रे सोइश्‍शो बाक्‍त। मेको आ पतीकेमी शेंबपुकीमी इन कली ग्‍येरपाइक्‍ब लोव़ शेंताक्‍म। परमप्रभु यावे आ स्‍वर्ग ङा गेय पाइबपुकीम यो मेको तचा तुइक्‍चा दाक्‍नीम। एफिसी ३:१०

13 मोपतीके इन थुं फ्रेंदीन। गेय पचा ङोंइती मिम्‍तीन। येसु ख्रीस्‍त जाक्‍मेनु, इन कली शिशी पाइब, दे आस पा बाक्‍कीन। लूका १२:३५-३६ 14 मुल टीब आल खोदेंशो पा इन ङोंइती मतुइक्‍थु पशो मरिम्‍शो पचा क्‍येङा ङोन बाक्‍कीन। रोमी १२:२ 15 इन कली ब्रेप्‍ब, येसु ख्रीस्‍त दोदेंशो बाक्‍मे, गे यो मोदेंशो दुम्‍शा बाक्‍कीन। 16 परमप्रभु यावे आ ब्रेक्‍पाइश्‍शो लोव़मी “गेपुकी आं कली ला ठेयब सेलीन। मारदे हना गो का ला इन परमप्रभु नङ” दे ब्रेक्‍शो बाक्‍ब। लेवी १९:२

17 गेपुकीमी परमप्रभु यावे कली “इं आफ” दे पुंइना पुंइन बाक्‍नीनी। मेकोमी मुर आन कुल मकोव़थु, आन पशो कोव़शा, निसाफ पाइब। मोपतीके गे रागीमी बाक्‍नीनु, पाप पचा हिनीन। रोमी २:११; फिलिप्‍पी २:१२ 18 इन किकी पिपी रे “गो नरक लाइब बाक्‍नीकी” दे तुइक्‍नीनी। मुल गे नरक लतीक लां रे प्रोंइचा पुंइसीशो बाक्‍तीनी। दोपा प्रोंइचा पुंइसीशो बाक्‍तीनी देंशा हना, जाम्‍शा लाइब सुन नु चांदी थाप्‍शा ममाइ, १कोरिन्‍थी ६:२०; १कोरिन्‍थी ७:२३; १पत्रुस ४:३ 19 येसु ख्रीस्‍तमी मारेइ मदुम्‍शो पाठा बुद पा आंम हुश शाइक्‍पाइश्‍शा इन कली नरक रे प्रोंइतु। हिब्रू ९:१४; यसैया ५३:७; यूहन्‍ना १:२९

20 परमप्रभु यावेमी रागी सेल्‍चा क्‍येङा ङोंइती “येसु ख्रीस्‍त पाप रे प्रोंइब दुम्‍ब” दे मिम्‍शो बाक्‍माक्‍त। मेको रागी नुप्‍ची ना इन पर्बम तुइक्‍पाइश्‍शो बाक्‍त। रोमी १६:२५-२६ 21 गे येसु ख्रीस्‍त आ पतीके परमप्रभु यावे कली थमा सुइक्‍नीनी। मेकोमी येसु ख्रीस्‍त कली बेक्‍शो रे सेंपाइश्‍शा, छेङछेङम वोइक्‍तु। मोपतीके गे “परमप्रभु यावेमी इं कली कोव़ब” दे थमा सुइश्‍शा आस पने। 22 दोपा येसु ख्रीस्‍त आ देंशो टिशा, थमा गेय पा पाप रे ङोन बाक्‍नी, मोपा गे लोक्‍ब आन कली यो थमा पा दाक्‍नीनी। गे थमा सुइक्‍बपुकी इन थुं नेल्‍लेमी थमा पा दाक्‍मुने। 23 गे नक जरमेशो खोदेंशो बाक्‍नीनी। जाम्‍शा लाइब ममाइ। गेनायो मजाम्‍ब दुम्‍तीनी। मेकोन ब्रोंइचा गेब नु गेना हना यो लीब परमप्रभु यावे आ लोव़ बाक्‍ब। यूहन्‍ना १:१३; याकूब १:१-१८ 24 परमप्रभु यावे आ देंशो लोव़ मार बाक्‍त देंशा हना, रागी ङा मुर नेल्‍ल घांस खोदेंशो बाक्‍नीम। मेको आन दार‍स बोइश्‍शो फू खोदेंशो बाक्‍ब। आ घांस सोव़ब, मिनु फू यो हेम्‍ब। याकूब १:१०-११ 25 तन्‍न परमप्रभु यावे आ देंशो लोव़ गेना हना यो लीब। मेको आ ग्‍येरपाइक्‍ब लोव़ बाक्‍ब। मिनु शेंबपुकीमी मेको इन कली शेंताक्‍मे। यसैया ४०:६-८