1  Genesis 1.27,28.Adam ih caanawk anghumhaih kawng loe hae tiah oh. Sithaw mah kami sak naah, Sithaw angmah krang hoi kanghmong ah anih to sak. 2  Mathai 19.4; Mark 10.6.Nongpa hoi nongpata to a sak moe, nihnik to tahamhoihaih paek; nihnik sak na niah nihnik ih ahmin to Adam, tiah ahmin paek. 3 Adam loe saning cumvai, qui thumto hing naah, angmah baktiah kaom, angmah krang hoi kanghmong capa maeto sak; anih ih ahmin to Seth, tiah a sak. 4 Seth tapen pacoengah, Adam loe saning cumvai tazetto hing moe, kalah capa hoi canunawk doeh sak vop. 5 Adam loe saning cumvai takawt, qui thumto hing pacoengah duek.

6 Seth loe saning cumvaito pacoeng, pangato hing naah, Enos to sak. 7 Enos tapen pacoengah, Seth loe saning cumvai tazet, pangato hing moe, kalah capa hoi canunawk doeh a sak vop. 8 Seth loe saning cumvai takawt, hatlai hnetto hing pacoengah duek.

9 Enos loe saning qui takawtto hing naah, Kainan to sak; 10 Enosh loe Kainan tapen pacoengah, saning cumvai tazet, hatlai pangato hing moe, kalah capa hoi canunawk doeh sak vop; 11 Enos loe saning cumvai takawt, pangato hing pacoengah duek.

12 Kainan loe saning qui sarihto hing naah, Mahalalel to sak. 13 Mahalalel tapen pacoengah Kainan loe, saning cumvai tazet, qui palito hing moe, kalah capa hoi canunawk doeh a sak vop. 14 Kainan loe saning cumvai takawt, hato hing pacoengah duek.

15 Mahalalel loe saning qui taruk, pangato hing naah, Jared to sak; 16 Mahalalel loe Jared tapen pacoengah, saning cumvai tazet, qui thumto hing moe, kalah capa hoi canunawk doeh sak vop. 17 Mahalel loe saning cumvai tazet, qui takawt, pangato hing pacoengah duek.

18 Jared loe saning cumvai qui taruk, hnetto hing naah, Enok to sak. 19 Jared loe Enok tapen pacoengah, saning cumvai tazetto hing moe, kalah capa hoi canunawk doeh sak vop. 20 Jared loe saning cumvai takawt, qui taruk, hnetto hing pacoengah duek.

21 Enok loe saning qui tarukto pacoeng, saning pangato hing naah, Methuselah to sak. 22 Enok loe Methuselah tapen pacoengah, saning cumvai thumto thung Sithaw hoi nawnto lam caeh; to pacoengah doeh kalah capa hoi canunawk to sak vop. 23 Enok loe saning cumvai thum, qui tarukto pacoeng, pangato hing. 24  Heb 11.5; Jud 1.14.Enok loe Sithaw hoi nawnto lam caeh pacoengah, Sithaw mah lak ving boeh pongah, om ai boeh.

25 Methuselah loe saning cumvai qui tazetto pacoeng, sarihto hing naah, Lamek to sak. 26 Methuselah loe Lamek tapen pacoengah, saning cumvai sarih, qui tazet, hnetto hing moe, kalah capa hoi canunawk doeh sak vop. 27 Methuselah loe saning cumvai takawt, qui taruk, saning takawtto hing pacoengah duek.

28 Lamek loe saning cumvai qui tazet, hnetto hing naah, capa maeto sak; 29 Angraeng mah tangoeng ih long ah, ban hoi toksak patangh naah, anih mah monghaih na paek tih, tiah a poek pongah anih ih ahmin to Noah, tiah sak. 30 Lamek loe Noah tapen pacoeng, saning cumvai panga, qui takawt, pangato hing moe, kalah capa hoi canunawk doeh sak vop. 31 Lamek loe saning cumvai sarih, qui sarih, sarihto hing pacoengah duek.

32 Noah loe saning cumvai pangato hing naah, Shem, Ham hoi Japheth to sak.