Colossians
Colossae-areny-rnem-warl
Paul-el pip nhenh thwenek Colossae tawen-areny-rnem-warl
Ingwerentyel arrwekel-antey tyaty arrernek, Paul-el Colossae-areny tyaty arrerney-angenh. Paul ingkern-they apetyek. Paul ranem atyetyart irrek ikwer-rnemek. Angkakert-rnem ra thwenek ilerl-apayntetyek, Ephesus-areny-rnem ra thwenek. Ephesus ra anenh apmer ilkwa Asia-ampenyel, Rome-areny-rnem atyetyart anenh. Paul-el awenh ingwer-angkwarr, rernem akalty-anthenh, ilpertilenh.
Akalty-anthey-angker apmwamwam mwanty iterl-arey-angenh anenh. Rernem ament-warl ikwer-rnem-kenh akalty-anthenh. Ingwerentyel ikwer-rnem-kenh-angkwarr apententy, rap itethirretyek-arrpantey arrkernelhem. Arrangkwarlap ran. Aker arlkwey-angenh, alakenh rernem iterrenh. Jesus-kenh-angkwarr apentekerr, arraty inngekety.
Paul-el pip ikwer-rnem-warl thwenek, renh-rnem akalty-anthayntetyek angka arraty-angkwarr. Jesus Christ-kenh-angkwarrant rernemap itethirreman. Ament-angkwarr akalty-antheyel arrangkwarl, nthakenh itethirrey-angenharl, “Jesus renh tnakenty, ngap itethirreman.” Jesus Christ-elant ingkerrenh itethilem. Ingkartel ahern arrpmernek. Alakenh-they Paul-el angka ikwer-rnem-warl thwenek.
1
1 Atha Paul thwenek, Ingkartel ayenh arrernek angkakert Christ Jesus-kenh. Timothy-el-then, Ingkart-kenh-angkwarr apenteyel arrpemarl.
2 Timothy aylanth pip nhenh thwenem arrekantherr-warl, Colossae tawenel aneyel-rnem-warl, iylpareth awelheyel-rnem-warl. Akngey anwekantherrenh Ingkartel arrenhantherrenh mwantyel arntarnt-arem, arrantherr mwerrant-arey anayntetyek. 3 Anantherr arrekantherr aleth-antey ayerneyel Ingkart Jesus Christ. Ingkartek anwantherr inkwerelheyel, aynikw ikwerenhek. 4 Anantherr kel awek, arrantherrarl Jesus Christ tnakeyel, arrantherr Ingkart-areny ingkerrenh arntarnt-areyel. Alakenh-anyem anwantherr Ingkartek angkem inkwerelhemel. 5 Arrantherr Ingkart tnakeyel, rarl arrwekel ilek, arrantherr iteth intem-antey anayntetyek. Arrantherr angka mwerr-angker Ingkart-kenh awenh. 6 Angka mwerr-angker Ingkart-kenh arlpimpirreyel apmer arrpanenh-warl. Rernem apmer arrpanenhek akalty-antheyel. Rernem tnakek inkwerelhemel. Alakenh-anyem arrantherr angka akwerrpel awenh arrpemarl, “Ingkart ingkerrenhek ilkelheyel” wenh. 7 Artwa Epaprahas-el arrenhantherrenh akalty-anthenh alakenh, “Ingkart ingkerrenhek ilkelheyel” wenh. Ra Ingkart Jesus-angkwarr warrkerrenh, anwantherr warrkerreyel-apeny. 8 Ranem arrenhantherrenh akalty-anthenh, Ingkart-kenh Itnwengel arrenhantherrenh akalty-anthenh arrpemarl, ingwer-rnem-itwek mwerrant-arey anayntetyek. Alakenh-they anwantherr angka awek-anem, arrekantherr-penh.
9-10 Alakenh-anyem anwantherr Ingkart renh-anem ayernek. Anantherr aleth-antey ikwer angkeyel, arrantherr Ingkart-kenh-angkwarr arraty apentetyek, rarl iterreyel-angkwarr, Itnweng Rlwartel arrenhantherrenh akalty-anthetyek, arrantherr arraty iterretyek. Inweng-angkwarr akaltyirreyn-ayntetyek aleth-antey, ingwer-rnem arntarnt-arayntetyek mwerr-angkwarr. Arrantherr artwentyel innga akaltyirretyek angka ikwerenhek. 11 Ingkartel arrenhantherrenh rlterrkam-rlterrkileyenh. Ingwerentyel arrenhantherrenh apmwewarlilekerr, arrantherr inkwerelhemel aleth apent-ayntetyek ikwerenh-angkwarrant mwerr-angkwarr-ayteng. 12 Anantherr-anem Akngetyek inkwerelhetyek, rarl angka arrwekel arrernek, arrantherr apmer alker-itwek aney-alpetyek. 13 Ran anwenhantherrenh apmwekety rakek, rantey arrpemarl alerikw ikwerenh arrernek, Atyetyart anwekantherrenh anetyek, anwantherr ikwerenh-rnem anayntetyek. 14 Ingkart-kenh alerikw ranem anwekantherr katy ilwek, apmwa anwekantherr-wety iwetyek, anwantherr iteth intem-antey anayntetyek.
Alerikw ahern-areny ingkerrenhek anetyek
15 Anantherr nthakenh Akngey irrwerl-areny arey-angenh. Alerikw ikwerenh atyetyart apmer arrpanenhek. Alerikw retangkwel arrwekel anenh ahern-wenyankel. Alerikw ikwerenh ingkerrenhek anayntirrek-anem, Ingkart anyent rey-antey. 16 Rlterrk ikwerenhel ra irrwerl-areny-rnem-then ahern-areny-rnem-then arrpmernek. Aleyarl anwantherr areyel-anem. Ikwer-angkwarr inweng-rnem-then ingkerrenh arrpmernek, nthakenh arey-angenh-rnem. Alerikw rlterrk ikwerenh-angkwarr ra ingkerrenh arrpmernek, atyetyart ingkerrenhek anayntetyek. 17 Alerikw ra kel anenh, ahern nhenh-wenyankel. Ingkartel ahern-areny-rnem-then arrpmerney-angenh-antey, rant anenhan. Alerikwel ingkerrenh-antey atnyeneyel, ahern-areny-rnem ingkerrenh atnyenetyek. 18 Christ-then Tyaty-areny-rnem anyent-antey, Jesus Christ akapwert-apeny atyetyart aneyel ingkerrenhek. Anyent arlka ikwerenh-apeny anem, inweng anyent-akert rey-antey ikwer-rnem warrkerreyel. Ingkartel renh-tangkwel ipmepenh akemelhilek, alerikw ra ingkerrenhek atyetyart anetyek. 19 Aray, Ingkartelant alerikw ikwerenh arrernek, ikwer-apeny anayntetyek Ingkart irrkaty-antey ikwer-apeny, anyent rey-antey. 20 Alerikw ikwer-angkwarr alker-areny ahern-areny ingkerrenh ikwerenh-rnem ayerrpilek. Alerikw ikwerenh arwerl iylpeyl-atherrel ilwemel, ra mwerr-angkwarr mpwarek ingkerrenhek anwantherr apenterl-ayntetyek, mwerrant-arey anayntetyek, arternpel.
21 Arrantherr Ingkart-wety ament-warl alhenh. Arrantherr apmwangkwarr alhenh ament iterremel, Ingkart-wety arlkarrirrenh. 22 Alerikw-anem arwerl iylpeyl-atherrel ilwek, arrantherr Ingkart-kenh-angkwarr arraty anetyek. Ra ikwer-warl anyentelhilek, alyelk mwerr anayntetyek, Ingkartel arrenhantherrenh tyatyemeley-angenh. 23 Arrantherr Ingkart-kenh-angkwarr anetyek, angka mwerr renh rlterrk tnakemel. Arrantherr-anem angkek iylpelirrey-angenh, Ingkartel arrekantherr arrernek, arrantherr iteth intem-antey anayntetyek. Ingkartel ayenh rlwanek, angka mwerr-angker Ingkart-kenh ilerl-apayntetyek ahern-areny ingkerrenhek.
24 Ayenh apek menty atwem mwerrarl. Christ Jesus arlka menty anthelhek. Ayeng arlka menty anthelhek arrpemarl tyaty-areny ingkerrenhek. 25 Akngeyel ayenh arrernek, tyaty-areny-rnemek, warrkirretyek, angka ikwerenh ingkerrenhek akalty-anthetyek, ingkerrenhek warrkirretyek. 26 Arrwekel angka anyelk-tangkwel ayntenh, Aley angka anaynt-anem Ingkart-areny ingkerrenhek, rernem aketh-antey aweyneyel. 27 Ingkart ilkelheyel, arrantherr Jew-weny-rnem akalty anetyek, angka ikwerenhek, arrantherr apmer mwerr-angker-itwek aney-alpetyek, Christ-kenh-angkwarr.
28 Rernem-anem Jesus Christ-warl anyentirremel, Jesus Christ tnakeyenh. Anantherr renh-rnem akalty-anthem, rernem arraty-angkwarr apenterl-ayntetyek, ingwer-rnemel renh-rnem ilpertilekerr. 29 Christ-el ayenh rlterrkileyel. Alakenh-anyem ayeng warrkirreyel, alhengkerr irrey-angenh. Atha ingwer-rnem akalty-anthayntetyek ipmelhey-angenh.