Nijinanaj aja ojibiama8agani8i8ag ka teb8etamo8adj
Konit odenakag
Enadjimomagag oo mazinaigan
Pon ogi ijinijaama8an nitam odojibiigani ka teb8etamindjin 8edi Konit (Corinthe) odenag ka tajikendjin Akaia (Achaïe) akikag, 8aiej 56 kitci agidasoni ii e pibonig. Ka ick8a dac ii, Timote (Timothée) ki ija Konit, acitc ogi pi koki nda 8abaman Ponan kidji inadjin ega 8e8enda e inakamigizindjin ka teb8etamindjin 8edi Konit. Ii dac apitc, Pon tegoban 8edi Epes (Ephèse) odenag. 8enibik dac ogi ndaodeoman ka teb8etamindjin 8edi Konit. Ka8in maia kikendag8asinon nogom adi ka iji8ebag meg8adj ka ndaodeomadjin, kikendag8ani dac panima Pon egi kitci sogi kanonadjin ini8e ega 8e8enda ka pimadizindjin.
Ki koki ki8e dac Pon Epes odenakag, iima dac ogi koki ojibiama8an ka teb8etamindjin 8edi Konit. Kitci kackendamoban meg8adj e taji ojibiama8apanin. Ka8in tag8asinon ii ojibiigan nogom ogajigag. Tite ogi a8i iji8idonagoban ii ojibiigani, nage dac Pon ogi nagicka8an Titan 8edi Masedonia (Macédoine) akikag. Ogi 8idamagon dac aja na8adj e k8aiak8adizindjin ka teb8etamindjin 8edi Konit. Midac ii apitc kagi ojitodj Pon oo8e ojibiigani.
Pon omadjiton odojibiigan e mikodag adi eji 8idji8idi8adj 8in acitc kakina ka teb8etamindjin 8edi Konit. Okitci sagian, pekic dac nandam ini ka teb8etamindjin ogi kitci madji mikomigobanin acitc ki paba ikidobanin ega teb8e ini Jesosan Odanodagani e inagimagani8idj Pon. Pon dac ogi kitci sogi kaganonabanin ini a8iagon. Nogom dac Pon ikido e kitci min8endag aja egi an8endizondjin ini a8iagon, acitc aja e mino 8idji8idi8adj 8in acitc kakina ka teb8etamindjin 8edi Konit.
Mina8adj dac, omikodan e ma8adjiconia8endjin ega ka Coda8inni8indjin ka teb8etamindjin kidji ijinijamaa8adjin Coda8innin ka teb8etamindjin 8edi Jerusalem.
Kegapitc sa dac, Pon ikido aja kegat mina8adj kidji pi ndaodeomadjin, acitc o8idama8an adi ke todamindjin kidji ick8atandjin ab8amaci tag8icig. Omika8asoman teb8e Jesosan Odanodagani e inagimagani8idj, acitc omacka8izi8in Kije Manidokag e odjimaganig.
Pon dac omikodan iima ojibiiganikag adi aja kagi pi iji8ebanig, nogom ka iji8ebanig, acitc adi ke inakamigizidj. Kakinagotc ka ikidodj, kidji eco8indjin e 8i ndaodeomadjin ka teb8etamindjin 8edi Konit odenag, mi 8edji ikidodj. Misa8adj Pon e kitci sanagendjigedj, oca8enimigon Kije Manidon, ega kidji ana8endjigedj. Pon ikido: “Apitc mega ako cagozian, mi ii apitc e mikaman macka8izi8in” (12.10).
1
1 Kina8a ka teb8eta8eg Kije Manido, ka ma8adjiidieg kidji aiamieieg 8edi Konit (Corinthe) odenag, nin Pon kidojibiamonom. Nin Jesos Christ Odanodaganan nidinagimigo, adi kagi iji nda8enimijidj Kije Manido kidji ijinagozi8ag. Ni8idjiog Timote (Timothée), ka teb8etag ke8in. Ijinijaama8agani8i8ag dac oo ojibiigani ke8ina8a kakina Kije Manido odanicinabeman 8edi ka tajike8adj Akaia (Achaïe) akikag.
2 Nipagosenimag Kije Manido Kidadaminan acitc Jesos Christ ka Tibeniminak kidji ca8enimigo8eg acitc kidji minigo8eg pekadendamo8ini.
Pon mig8etc odinan Kije Manidon
3 Icpenimadan Kije Manido, ka Tibeniminak Jesos Christ Odadaman. Mi aa Kidadaminan Kije Manido, ka kitci kije8anigo8ak, acitc apanigotc ka kagidjiigo8ak. 4 Kikagidjiigonan tasinigotc e kodagito8ak. Kidani kackitonanan dac kidji kagidjiaiakonig kodagiag apitc kodagito8adj, Kije Manido mega aja kigi kagidjiigonan iidi pejig8an. 5 Eckam kidani kodagitomin, tabickotc Jesos Christ kagi iji kodagitodj. Ii dac apitc ako iji8ebiziak, eckam Jesos Christ kidani kagidjiigonan, acitc ki8idjiigonan kidji kackito8ak kidji kagidjiaiakonig kodagiag a8iagog. 6 Nina8it dac, kicpin kodagito8ag, kidji kagidjiigo8eg 8edji kodagito8ag, acitc kidji 8idjiigo8eg kidji gi ag8acimigo8eg. Apitc Kije Manido kagidjiigo8ag, nikikendananan aja adi kenina8it ke todamag kidji kagidjiigo8eg. Ki8idjiigona8a dac kekina8a kidji cibendameg apitc kodagito8eg, tabickotc nina8it ka iji kodagito8ag. 7 Acitc niketcinamendananan kicpin kodagito8eg tabickotc nina8it ka iji kodagito8ag, Kije Manido sa kiga kagidjiigo8a kekina8a, tabickotc kagi iji kagidjiigo8ag.
8 Nidjiki8enanag! Ninada8endananan kidji kikendameg adi ka ijiseiag ka a8i pabamadiziag 8edi Eja (Asie) akikag. Apanigotc nigi kitci sanagendjigemin, mi maia tabickotc kagi cacagockago8agiban ka inendjigeiag. Nigi inendananan dac ega aja kidji kackito8ag kidji pimadjio8ag. Nigi ketcinamendananan kidji nibo8ag. 9 Mi maia kagi ick8aienimigo8ag kagi inendamag. Anic dac, kidji gi apacenimo8ageiag Kije Manido, 8in ka koki pimadiziadjin kagi nibondjin, mi 8edji ki ijiseiag ii, ega dac nina8itinakag kidji iji apacenimo8ag. 10 Nigi nagadjiigonan dac Kije Manido, misa8adj e inendamagiban aja pecodj kidji nibo8ag. Acitc kiabadj nogom ninagadjiigonan. Acitc niketcinamendananan apanigotc kidji nagadjiigo8ag, adigotc iji8ebiziag. 11 Kigagi 8idokaojinam dac kekina8a, apitc e aiamieieg nina8it odji. Niga odji ca8enimigonan dac Kije Manido, mane a8iagon egi aiamiendjin. Kitci mane dac a8iagog mig8etc oga ina8an Kije Manidon ka todamindjin nina8it odji.
Pon ogi adjiton adi 8a ijitapan
12 8adan oo8e 8egonen 8edji kitci inendamag. Nikikendananan 8e8enda egi paba ijitcigeiag, adigotc ka paba ijaiag. A8acamej kitci 8e8enda kigi todagom. Ka8in kegon nidodji kadosinanan, ka8in a8iag nidodji 8agackibinasi8anan. Mi mega iidi kagi iji minigo8ag Kije Manido kidji iji pimadiziag. Ka8in kagita8endamo8in a8iagokag ka odjimagag nidodji k8ag8e abadjitosinanan, Kije Manido dac okitci ca8endjige8in kagi minigo8ak nigi abadjitonanan. 13-14 Midac apitcigotc ojibiamago8eg, kinada8enimigom kidji nabo8adameg acitc kidji nisidotameg. Nogom dac pagi eta kinisidotaojinam, kinada8eniminom dac kidji ani nisidotaojiag 8e8enda. Apitc dac koki tag8icig ka Tibeniminak Jesos, kiga kitci inenimijinam, tabickotc kenina8it ke iji kitci inenimigo8eg.
15-16 Niketcinamendanaban e kitci inenimijiagiban, mi 8edji ki inendamaban kidji a8i nda 8abaminagok e ani ijaian Masedonia (Macédoine) akikag, acitc mina8adj kidji pi koki nda 8abaminagok ick8a ijaian 8edi. Nijinanaj dac kidagi 8idokaonom. Acitc dac kidagi 8idokaojim kidji gi ijaiaban Coda (Judée) akikag. 17 Panima dac nigi adjiton adi 8a ijitaiaban. “Kitci anica ogi onendan adi ke ijadj,” kidinendana8a na? Ka8in iidi ijisesinon. Ka8in mega ka iji onendamo8adj a8iagog ooma 8akidakamig nidiji onendasin, ka8in dac nidikidosi: “Ketcinam niga pija,” e inendaman dac ne8ad ega kidji pijaian.
18 Tabickotc apanigotc e teb8edj Kije Manido, mi kenin acitc apanigotc niteb8e apitc aiamiinagok. Ka8in dac nidadjitosin adi eninagok, abidinaj e ikido8an “ketcinam ii,” mina8adj dac kiabadj e ikido8an “ne8ad ka8in.” 19 Ketcinam mega kigagi apacenimo8agemin Jesos Christ, Kije Manido Og8izisan. Mi aa8e Jesos kagi mikodamago8eg, Silas, Timote, acitc nin tibina8e. Apanigotc kigagi ketcinamenimanan Jesos, apanigotc mojag teb8eiendagozi. 20 Jesos Christ mega ogi todan ketcinam kidji iji8ebanig kakinagotc adi kagi ikidodj Kije Manido kidji todag. E teb8eta8aiak dac Jesos, mi 8edji ikido8ak “Amen,” “teb8e ii” ka ikidomagag, kidji icpenimaiak Kije Manido. 21 8in tibina8e Kije Manido ki8idjiigonan kidji sogigaba8iak e teb8eta8aiak Jesos Christ. Kigi onabamigonan kidji anokita8aiak, 22 acitc kigi 8abadaigonan 8inikag e iji tibendagoziak. Kigi minigonan Omino Manidoman kidji kigickago8ak, kidji gi iji 8abadainak ketcinam kidji odisigo8ak kakina kegoni ka taji nigani onatodj kina8it odji.
23 Ka8in dac nidodji koki pijasi ii apitc 8edi Konit odenag kidji pi nda 8abaminagok. Ka8in mega kinada8enimisinona8aban kidji kackendameg. Kije Manido nikikenimig e teb8e8ag. 24 Ka8in nidiji nda8endasinanan kidji 8idamago8eg adi ke iji teb8etameg, aja mega kikitci sogigaba8im kiteb8etamo8ini8akag. Pekic dac, ninada8endananan kidji 8idji mikimomigo8eg, na8adj kidji gi odji mina8azieg.