10
1 Nigivénegita, Zuta vegená Ómasímo kugutó vizitive loko nigikatunú lamaná gelekuke keikumú Ómasiloka loaká noumóza, 2 keza nene Ómasi gelekelé otatune liki amuza miliki niago, ánigokuke lamaná noluve. Lá niamóza, gapováa gili hehe lisá amave. 3 Ómasímitoka lihimáini asú okimikiko minata mogonáa gili vevesamave. Itó Ómasímini avogisaló lihimate nomitimó minatune liki kezáini iki miliki ita gapoló viake, lihimáini asú okimikiko minata gapo Ómasímo veleletamó neneló visá amave. 4 Leza Kilistokumú gele alévolé okuko, gili alévolé amake Ómasímo lo huka gakó ámegetokuko lamaná itune liki lina vegenalitini gapováa hize lí okave. Lá okago, aikumú gili alévolé ina vegená mukitoka nene lihimáini ale ahulo asú okimikago niave.
Guivahanimú sele lita vegená mukitoka kugutó vizinogo ive
5 * Liv 18:5 Nenemú Mosé láa loko luhuva gizamóma neve:
Ve makó keza lo hukoko li gakó nenémini hozaváa aliliki viva viva iki ali asú itamó nenete alévolé iki minanigave.
Loko Mosé limó nene Ómasímo lo huka gakó gele alekoko lihimavate asú olimikiko minatuni mogonamú limóma neve. 6 * Gapo 30:12-14 Lá onoimóza, Izesunimú gele alévolé inake lihimate asú olimikiko minatuni mogonamú nene monó gotolaú láa liki luhuva gizinamóma neve:
Gigikauka nene éaho okulumakuka ititive, 7 itó éaho galegú limitive loko lamo.
Nenémini mogona nene itína Kilistoni aleloko limitive loko okulumakuka itesaláa nomive, itó Kilistoni nene hele vegenatokatí lugutó viziti gakó aleloko ititive loko galegú lemesaláa nomive. 8 Lá oko nomive. Nenemú monó gotolaú láa liki luhuva gizinamóma neve:
Monó nene hotoka nomive. Gemetoka neve. Gegepaló neve. Itó gigikagú neve.
Kilistokumú gili alévolé ita gakó lo utó oko lo lekemeaká nouhá gakó nenemú noluve. 9 Láa loko lo utó oaká noune: Izesú nene není Guivahaníne noive loko gegepatunú lo utó itanimó, itó Ómasímo nene Izesú heleneikutí alémo otimó neve loko gigikatunú gele alévolé itanimó nene, Ómasímo gugutó vizinogo ive. 10 Ligikatunú gele alévolé itunimó nene, lihimate asú olimikiko minanogo une, itó legepatunú nene Izesuni agulizá lo utó itunimó nene, Ómasímo lugutó vizinogo ive. 11 * Isa 28:16 Nenemú monó gotolaú luhuva gizinamó nene láa loko neve:
Aikumú gili alévolé itamó nenete hizeko kememikumú kovoza heleminogo ive.
12 Zuta vegenaki hetoka vegenaki etó iki niamave. Hamó lelegitó loló olimiaká noive. Hamokó Guivahani nenémo ve mukilitini Guivahani noike, aí sele li amiaká nia vegená mukitoka nene vauva aleko nónohá zekimiaká noive. 13 * Zoe 2:32 Guivahanimú sele liaká nia vegená mukitoka kugutó vizitimó neve liki monó gotolaú luhuva gizinamóma neve.
14 Lá oko nemóza, aikumú gili alévolé amitamó nene, nana iki sele li amitave. Itó aí gakó gelemitamó nene, aikumú nana iki gili alévolé itave. Itó makolímo lo utó oko aí gakola lo kememitimó nene, aí gakó nana iki gilitave. 15 * Isa 52:7 Itó Ómasímo gakó liaká ve kimiselemitimó nene, nana iki li utó iki li kimitave. Liki loká inimikikoma neza láa loko litove: Izesuni gakó li kimita vegená mota kimiseleneimóma neve. Nenemú monó gotolaú gakó makó lá oko neve:
Gakó lamaná li utó iaká nia ve keza gapo niago, kigisagutí liti liti ligo, ikago, gelekunike, ligika vávani okave.
16 * Isa 53:1 Lá onoimóza, Zuta vegená mukitó ámina gakó lamaná gili alemakumú nene Isaiá luhuva láa loko gizamóma neve:
Guivahanínemaka, gakó lo kumunimó nene ma gili alévolé inamamóma neve.
17 Nenemú láa loko gilitune: Ómasímini gakó gelekunikegó gele alévolé oaká noune, itó Kilistoni agepagutí gakó li utó niagogó gakola geleaká noune. 18 * Age 19:4 Geza nene Zuta vegenalite monó gelemamó nehe loko loká itanimó nene, neza lá oko nomive loko litoze. Monó gotolaú láa liki gizinamóma neve:
Kegepagutí gakó nenémo numutó namató vo alimó. Itó gakóini nenémo mikasi nekisa vokisauka vo alimó neve.
19 * Gapo 32:21 Lá onoimóza, geza nene Isilae vegenalite gili vevesamamó netihe loko goha loká itanimó nene, neza lá oko nomive loko litoze. Mosé nene Ómasímo Zuta vegená lo kimi gakó láa loko luhuva gizamó nene apí oko gelezo:
Lekeza hetoka vegenakumú gelemó nene ha netá lilí inamoláa kelémo molokugo, lekeza kemekugú nanigave. Ve lugáa negi hizi minamó nene sele lo kemekugo, keikumú mulutikú golesa gilinigave.
20 * Isa 65:1 Itó Isaiá ahelele vizemigo Ómasímo li gakó láa loko limó neve:
Nenikumú vitagá amatite není ániganigave. Nenikumú loká amake minamó keitoka anitinogo uve.
21 * Isa 65:2 Itó Isilae vegenakumú Ómasímo li gakó láa liki luhuva gizinamóma neve:
Neza nene giliki amanapa iki miniaká nia vegená gili ahuliaká nia vegená gínikaha iki miniaká nia vegená nene gamena hána nigizani gumí zeko alo loko sele lo kumumóma neve.