Jonr
dwandfamo barkof gontwat
Barkof kfo nuhas mrokfot
Jonr ndar barkof gontwat wandfamohat, hus bro dukefetrn ndar gontwat wandfamort. Duka memor, “Gontwaye Kristenm bi kfo dukarhotanm Bro Nkifra nitohfpno nayakitohruhamn rpat tohrahm.” Yo nhai wofnrmor kspitat tohyuk yimam yihato Kristenm mfrnheh bonhehakhato rom Bro Nkifrar frtrohneft.
Nd kspitat tohwa yimam kfo kangm, “Bbinysoft dborhayuk wuskar yo yimam nhai tu dboriohm rhukahm. Tu faso mif korhm. Bro Nkifrarhu yon Jisasr ndar bbinysoft adborhar nhai dboriohr rhurfotr. Yima mifm kanjo inji faso rhurfor.” Yo kfo kangm, “Bro Nkifrar nhai ndar bbinysoft nom tohhato niwa nefm htihato kfo ptha inji nakahr. Nhai. Kukatoh marsisa hasiwurnom. Ndnetnomn nom tamoh neft to frohm kforuhamnom, be nafura bofurakfot. Dborioh nefm o fasoh nefm be nafura bofurakfot. Bro Nkifrar nhai ptha inji nakahrm nom niwa nefm. Ndnetnomn tamoh nefm be tunmoh fijo nafura bofurakfot.”
Jonr duka memor, “Ndhtet kfet yimam Kristenm wany yakio duha.” Kfo memor, “Jisasr tu yima mif mifr tohmor. Fitoh yimaroh yima yuhum kfo kangm, Jisasr tu yima mif mifr tohmor yo Bro Nkifrar rpat kakitohwomr, nd yimam womm yak marnyakfot.”
Mirahko yifungt ritohwa yimaroh nefm ahiknom. Bro Nkifrarhu nukeft wiyauyaukfot.
1
(Sapta 1.1—3.10)
Bro Nkifrarhu mrokfot yafothetet
1 Nda gontwat na wandfiwat wom mrokfot kfo nuhasruhanko. Nd mrokfot tu yafothet mrokfot kfo nuhasruhanko. Ndar bbinysoft tafi trha duha nd mrokfot bi ritohngotakmot. Nom bi riwanyakmonomt nd mrokfot. Yo tunmoh nyingaye htimonomt. Yo tunmoh tire faktiwonmonomt.
2 Nd yafothet mrokfot yarim fnahmott htimonomt. Nom nd mrokfot htihato kfo nuhaswonomko. Nd rhu nkifrayet mrokfot bingotn bi Bro Yifemrpno rhumout.
3 Nom htihato wanyuk mro-kfom kangnom akfo nuhaskahtnomko, niko wanyhato nom tohwa toh yuhat rpat tohrahnom. Rpat tohhato nom Bro Nkifrari rorhu yon Jisas Kraisrpno tohwa tohefrpat toh bugarahnom.
4 Nom kangnom, gontwaye akfo nuhaskahtnomko niko wanyhato be bro yindhorefrparpno rhurahnom.
Bro Nkifrarhu nukeft wiyauyaukfot
5 Jisas Kraisr pthayuk mrokfom nom wanyhato kfo ptha nuhaswam inji kfiwum, “Bro Nkifrar nhai wom tefi kspitefenrpno rhukahr. Nhai. Ror bro mar nukefrparpno korhr.”
6 Wom yimar kfo kangr, “Na Bro Nkifrarpno hifa hifa tohwa. Nhai na wom nefm nakaha.” Inji kfet yimar wiyauyau marnyakfot. To tfit rorhu wiyauyau nmbuhat nndo nndo rinewunineft, nd yimar be tngrpatn kfo furewur. Nhai Bro Nkifrar hikkahr.
7 Nom Bro Nkifrarhu mar nukeft tohhato rorhu dborioh nefrpam hikneft, tu Bro Nkifrar dborioh nefm niwa kanjo nom wom Kristenmpno be rpat toh marnya-hato nhai wom beb nmbuham rhu-ruhatmnom. Rpat tohruhanomn rorhu yon Jisas Kraisrhu kkupaye nmoh fasoh fasoh nefm yak wus bowuswatrm nmoh yima yuhum wutham rhurahm.
8 Nom be tunmoh rhu nmbuharpam hti yukatohhato kfo mirahnom, “Nom nhai wom fasoh nefenm rhukahmnom.” Mrokfot inji kfoneft be tunmoh nefm kak wunewunom. Nhai tu kfo mifkfot kfokahnom.
9 Nd nom nahnayuk fasoh fasoh nefm Bro Nkifrarpno yihato kfo ptha nriyafrahnomm, nhai wanyhato rhu mongruhatrnom. Tur kfomo yuhatn nd fasoh nefm yak wus bowus thurahrm. Yak wus bowus thuhato duka mumaforahrm nmoh fasoh nefm.
10 To tfit nom kfo manyeft, “Nom nhai wom fasoh nefenm nakahnom.” Inji kfonefte ka Bro Nkifrar kfo furamor ror dkfo memohat, “Yima bugam fasoh nef bugayetem?” Nd mrokfot ka kfo furamot. Niko ka nhai mdukakkahnom ror bi kfoyuk mrokfom?