1 Neda' Pablo chona' xšin Diosen' na' naca' postlw c̱he Jesucriston' cont gaclena' beṉe' ca' gwlej Diosen' yesejnilaže'ne', cont yeseṉezde' can' ža diža' ḻi c̱he Diosen'. Na' diža' ḻi c̱hen' chzejni'in can' goncho da' chazlaže', 2 na' chzejni'in zoacho lez šjayzoacho len Diosen' toḻi tocaṉe. Za' x̱e yežlion' Diosen' gwne' beṉe' yesejnilaže' ḻe' šjasyenite' len ḻe' toḻi tocaṉe, na' Diosen' bi chonḻaže' bite'teze da' že'. 3 Na' ṉa'a ba chac da' bžie' bia' gac da' ba chzejni'ida' beṉe' xtižen', ḻe Dios ben' noṉe' yeḻa' mban c̱hecho toḻi tocaṉe gwlo'e ḻo na' chyix̱jue'eda' beṉe' xtižen'. 4 Chzoja' le' Tito, naco' ca dogualje xi'iṉa' da' bzejni'ida' le', na' naccho txen chejnilaže'cho Jesucriston'. X̱acho Diosen' na' X̱ancho Jesucriston' ben' noṉe' yeḻa' mban c̱hecho toḻi tocaṉe yesaclenšque' le'e na' yesyeyaše'de' le'e na' yesone' cont soa cuezle binḻo len xbab c̱helen'.

5 Cate' bocua'aṉa' le' gan' zoa yežlio da' nzi' Creta dan' chi' ḻo nisdaon', gwnia' gwzožo' gono' dan' chona' cate' gwzoa' na', to to yež cuejo' beṉe' blao beṉe' yosozejni'i na' yosogüia yeseṉe'e yezica'chle beṉe' chesejnilaže' Jesucriston'. 6 Na' še zoa beṉe' zoacze' chone' da' güen cont bibi de da' yosode'e beṉe' yesene' da' xiṉjen' chone', še naque' beṉe' zoa toz no'ol c̱he', še xi'iṉe' ca' chesejnilaže' Criston', na' še bi zjanaque' beṉe' chesyedabaga', san chosozenague' cont bi zjalaže' chesone' da' xiṉj, ca beṉe' nac ca' cheyaḻa' cuejo' güia ṉa' ḻježe'. 7 Cate' cuejo' beṉe' co' Diosen' ḻo ne'e güia ṉe'e yezica'chle beṉe' chesejnilaže' Jesucriston', cuejo' beṉe' zoacze' chone' güen. Bi cuejo' beṉe' ya'laže', beṉe' naque' beṉe' loc, na' beṉe' borrašw. Bi cuejo' beṉe' chebede' cueque' žaš, na' ṉeca cuejo' beṉe' zelaže' gone' da' xiṉj cont gone' gan mechw. 8 Beṉe' cuejo' cheyaḻa' gaque' beṉe' chbede' chlebe' beṉe' zito' ližen'. Cheyaḻa' gaque' beṉe' zoateze' chone' da' güen na' beṉe' chon xbab, beṉe' chon da' zej to ḻicha, beṉe' chon da' chazlaže' Diosen' na' beṉe' chon con ga zelao chzaque'de' cont chone' bi da' ža Diosen'. 9 Cheyaḻa' gaque' beṉe' zoac̱hac̱he' do laže' chzenague' diža' ḻi c̱he Diosen' da' bzejni'ida' cont gac gwzejni'ide' beṉe' yoble diža' güenṉa', na' gone' c̱hac̱hlaže' cont yesenite' yesejḻe'e da' naquen da' ḻi, na' gac gwlo'ede' beṉe' ca' cheseṉe' contr diža' ḻi c̱he Diosen' cont yeseṉezde' clelen' chesone'.

10 Chnia' gono' ca', ḻe nita' beṉe' zan beṉe' Israel gualaž c̱hia' na' yebaḻ beṉe' yoble chesene' zjanaque' chio' txen, perw bi chosozenague' c̱he Diosen'. Bibi zaca' xtiža'gaque' da' chosozejni'ide', con chesonḻede' beṉe'. 11 Na' da' zjachi' yic̱hjgaque' yesone' gan mechw, da'nan' chosozejni'ide' da' zej clele. Cheyaḻa' gonḻe cont yesenite' šize bich yosozejni'ide' diža' güenḻažen', ḻe clelen' chesone'. Na' beṉe' zan len beṉe' ḻo' yo'o c̱hegaque' chesacžejlaže' c̱he xtiža' Diosen' ṉec̱he xtiža'gaquen'.

12 Cana' gwzoa to beṉe' gwṉeya'a, goque' beṉe' Creta, na' gwne' c̱he beṉe' gualaž c̱he' ca': “Beṉe' Creta bate'teze zjanaque' beṉe' güenḻaže' na' zjanaque' ca bež znia' yeḻa' güen da' xiṉj c̱hegaquen'. Ḻecze zjanaque' beṉe' lia na' beṉe' xagüed.” 13 Na' da' ḻi can' gwnen'. Da'nan' tiḻo' ḻegaque' c̱he da' xiṉjen' chesonen' cont ṉita'c̱hac̱he' yesejḻe'e xtiža' Criston'. 14 Gono' ca' cont bich yosozenague' c̱he diža' güenḻažen' chesaljlaže' beṉe' Israel gualaž c̱hia' ca', na' ṉeca yosozenague' c̱he nochle beṉe' ba gosebejyic̱hje' diža' ḻi c̱he Diosen'.

15 Diosen' ba none' yic̱hjlažda'ochon' xilaže', na' ṉe da' chagwcho ṉe da' chox̱e'cho bi chžonen gac yic̱hjlažda'ochon' xilaže'. San ca nac beṉe' yic̱hjlaždao' mal ca', beṉe' bi chesejnilaže' Criston', bibi de da' naquen da' xilaže' len ḻegaque'. Chesone' xbab mal, na' bibi de cheseza'laže' cate' chesone' da' xiṉjen'. 16 Chesene' zjanombi'e Diosen', perw nacbia' bi zjanombi'ene', ḻe chesonteze' da' xiṉjen'. Chesone' da' chgue'e Diosen'; zjanaque' beṉe' güedenag len xtižen' na' bi chesac yesone' da' güen.