1 Na' le'e nacle x̱an žin, ḻe gon güen na' ḻe gac beṉe' šagüe' len beṉe' cheson xšinḻen', ḻe ṉezczele Criston' ben' zoa yaban' naque' X̱anḻe.

2 Yogo'te ža cheyaḻa' ṉabcho gaclen Diosen' chio' len da' choncho na' len bichle da' chac c̱hecho, na' cheyaḻa' güe'cho yeḻa' chox̱clen c̱he', na' bi cheyaḻa' güedcho yoḻ güižcho Diosen'. 3 Na' ḻe ṉabe X̱ancho Diosen' gone' cont gac güe'lento' beṉe' xtiža' Criston' da' biṉa' yesejni'ide', ḻe ṉec̱he dan' ba bia' xtiže'nan' dia' ḻižya nga. 4 Na' ḻe ṉabe Diosen' gaclene' neda' gwzejni'ida' beṉe' diža' güen c̱he Criston' binḻo cont yesejni'iden'.

5 Cheyaḻa' soacho goncho güen len beṉe' biṉa' yesejnilaže' Criston' ṉa'a šlac de latje. 6 Na' cheyaḻa' güe'cho diža' šagüe' diža' da' zejen len yogo'ḻoḻ beṉe', na' cheyaḻa' goncho xbab nac yoži'icho xtiža' yogüe'.

7 Beṉe' ḻježcho Tíquico ye'e le'e yogo'ḻoḻ can' chac c̱hia'. Chaquechone', ḻe zoacze' chaclene' neda' can' cheyaḻa' gone' na' chone' xšin X̱ancho Criston' txen len neda'. 8 Ba gwseḻa'ne' gan' zoalen' cont ṉezele can' chac c̱heto' na' cont gone' c̱hac̱h laže'le. 9 Na' txen len ḻe' zeza' beṉe' ḻježcho Onésimo ben' nac beṉe' gualaž c̱hele. Zoacze' chejnilaže' Criston' can' cheyaḻa' gone' na' chaquechone'. Ḻegaque' yese'e le'e yogo' da' ba chac nga.

10 Aristarco die' ḻižya nga txen len neda', na' ḻe' chguape' le'e tiox. Na' ḻecze Marcos ben' nac biše' ḻjež Bernabé chguape' le'e tiox. Ba gwnia' can' cheyaḻa' gonḻe güen len ḻe' cate' le'e gan' zoalen'. 11 Nach Jesús ben' ḻecze le' Justo ḻecze chguape' le'e tiox. Šoṉze beṉe' Israel ca' chesaclene' neda' len da' chona' cont beṉe' zan yosozenague' c̱he Diosen' na' ṉabi'e yic̱hjlažda'ogaquen'. Ba gosonchgüe' c̱hac̱h laža' can' ba gosaclene' neda'. 12 Nach ḻecze beṉe' gualaž c̱hele Epafras chguape' le'e tiox. Chone' xšin Criston' na' yogo' ṉi'a cate' choḻ güiže' Diosen' chṉabchgüe' gwzejni'i Diosen' le'e yogo'ḻoḻ da' chaclaže' gonḻe cont soac̱hac̱hle gonḻen na' gacle cayaṉen' chazlaže' Diosen'. 13 Che'nda' ṉezele zoateze' choḻ güiže' Diosen' ṉec̱he le'e chejnilaže'le Criston' le'e nita'le Colosas, Laodicea na' Hierápolis. 14 Nach Lucas ben' chon rmed, ben' chaquecho, chguape' le'e tiox na' ḻecze ca' Demas.

15 Ḻe gwguapšca tiox beṉe' ḻježcho ca' že' Laodicea, len Ninfas na' beṉe' ca' chesedop chesežag chesonxene' Diosen' ližen'. 16 Na' cate' yeyož gwlable cart nga, ḻe gwnežjon beṉe' ca' chesedop chesežag chesonxene' Diosen' Laodicean' cont yosolaben'. Na' ḻecze ḻe gwlab dan' gwseḻa' c̱he beṉe' Laodicean'. 17 Na' ḻe ye' Arquipo chṉeyoeda'ne' gwza'lagüe' gone' doḻoḻ xšin Diosen' da' gwlo'o X̱ancho Criston' ḻo ne'e gone'.

18 Cuincza' neda' Pablo chzoja' late' dao' da' nga ḻe'e carten'. Bi ganḻaže'le can' dia' ḻižya nga. Diosen' soašque' gaclenšque' le'e. Da' na'zen' chzoja' ṉa'a.