1 Neda' chona' con can' ben Criston', na' chṉeyoeda' le'e gonḻe can' chonan'.

2 Na' ṉa'a chnia' le'e chonḻe güen zoale chjayze'ele neda' na' chonḻe ca ba bzejni'ida' le'e. 3 Na' chaclaža' šejni'ile da' nga. Yogo' beṉe' byo cheyaḻa' yosozenague' c̱he Criston', ḻe Criston' naque' blaoch ca ḻegaque', na' yogo' no'ole cheyaḻa' yosozenague' c̱he beṉe' c̱he', ḻe beṉe' c̱hen' naque' blaoch ca no'olen'. Ca'cze chon Criston', chzenague' c̱he X̱e' Diosen', ḻe ḻecze naque' blaoch ca ḻe'. 4 Note'teze beṉe' byo še nzoa xḻape' cate' choḻ güiže' Diosen' šlac ndop nžagle txen o cate' chyix̱jue'ede' bi da' ža Diosen', naquen da' yeḻa' zto', ḻe zejen bi nac Criston' beṉe' blao len ḻe'. 5 Na' note'teze no'ole še choḻ güiže' Diosen' o chyix̱jue'ede' xtiža' Diosen' sin cbi gwcuaše' yic̱hje' cate' chdop chžagle txen, naquen yeḻa' zto' par beṉe' c̱he', ḻe naque' blaoch ca ḻe'. Na' no'olen' chon ca' naque' lebe len no'ol ca' nšibdi yic̱hjgaque', no'ole ca' bibi yeḻa' zto' zjanombi'e. 6 Na' še no'olen' bi chaclaže' gwcuaše' yic̱hje' can' ba gwnian', yejṉi'a gwšib doxen yic̱hjen'. Da'nan' še chaquele zto' gwšiblen, nach gwcuaše'czlen can' cheson yezica'chle no'ol ca'. 7 Na' le'e beṉe' byo, bi cheyaḻa' gwcuaše' yic̱hjlen' cate' yoḻ güižle Diosen' o cate' c̱hix̱jue'ele bi da' ba gwna Diosen' le'e, ḻe Diosen' gwleje' le'e cont gwlo'ele beṉe' nacchgüe' beṉe' zaca'. Na' le'e no'ole, Diosen' gwleje' le'e cont gwlo'ele nac beṉe' c̱he to tole beṉe' zaca'. 8 Diosen' bi bene' beṉe' byo len žit costiy c̱he no'olen', san gwleje' žit costiy c̱he beṉe' byo nechon' benen' no'ole. 9 Na' Diosen' bi bene' beṉe' byon' cont gaclene' no'olen', san bene' no'olen' cont gaclene' beṉe' byon'. 10 Da'nan' no'ol ca' cheyaḻa' yosocuaše' yic̱hjgaque' cont yosolo'e nac beṉe' byon' blaoch ca ḻegaque', ḻe angl ca' chosocuaše' laogaque' lao Diosen'. 11 Perw naccho txen len X̱ancho Jesucriston' ḻa'czḻa' še naccho beṉe' byo o še no'ole, na' bi cheyaḻa' yeson no'olen' xbab bi cheseyažjde' beṉe' byo na' ṉeca beṉe' byo yesone' xbab bi cheseyažjde' no'olen'. 12 Naquen da' ḻi Diosen' gwleje' žit costiy c̱he beṉe' byo na' benen' no'ole, na' ḻecze naquen da' ḻi yogo' beṉe' byo zoa no'ole gwxan ḻe', na' Diosen' bene' yogo' beṉac̱h len bica'chle da' zjade.

13 Ḻe gon xbab c̱hele na' gacbe'ele bi chazlaže'cho cate' to no'ole choḻ güiže' Dios sin cbi chcuaše' yic̱hje', ḻe can' nac costumbr c̱hechon'. 14 Na' ḻecze bi chazlaže'cho še beṉe' byo bi gwšib yic̱hjen' na' con chosožien' ca cheson beṉe' bxej. 15 Perw no'olen' xdanchgua nac yiša' yic̱hjgaquen' cate' žian' da' toṉe, na' Diosen' none' yiša' yic̱hjgaquen' gaquen to da' gwcuašen' yic̱hjen'. 16 Še nole chaquele gwšašle c̱he da' nga ba gwnia', cheyaḻa' ṉezele neto' postlw bi choe'to' latje yesone' nža'le gate'teze chesedop chesežag beṉe' chesejnilaže' Diosen'.

17 Na' de yeto da' ṉia' le'e, ḻe bi chonḻe güen cate' chdop chžagle chonxenḻe Criston' na' bi chaclenen le'e, san chonen mal. 18 To da' bi chonḻe güen, chesene' cate' chdop chžagle chonxenḻe Criston' bi chonḻe txen len ḻježle, na' chacda' nacḻjan' ḻi can' chesenen'. 19 Na' ca'ḻjan' cheyaḻa'cze gac da' bi chon ḻježle txen, ḻe chlo'en non' chejnilaže' Criston' do yic̱hj do laže' na' non' gague da' ḻi chejnilaže'ne'. 20 Na' cate' chežagle chagwle txen, bi chonḻe xbab bnežjw cuin X̱ancho Jesucriston' ṉec̱he xtoḻa'chon', ḻa'czḻa' chdop chžagle cont šjayze'elen. 21 To tole che'ej chagwle da' chyob chdox̱e'le, ṉeca chbez ḻježle. Da'nan' baḻle ṉe' chdonḻe cate' chedagwle na' yebaḻle che'ej chagwx̱attele na' chzože'le. 22 Yejṉi'a yega'aṉ ližle ye'ej gagwle clel ca gagwle lao beṉe' yaše' beṉe' bi de c̱hegaque'. Da' chonḻe ca', nacbia' chgue'e ḻježle beṉe' cheyaḻa' yesaque' txen len le'e da' chonxenḻe Diosen', na' chonḻe cont chesaque' tole da' bi de c̱hegaque'. Na' naquen malchgua da' chonḻe ca', bi gac ṉi'a chonḻe güen.

23 X̱ancho Jesúsen' bzejni'ide' neda' can' šjayze'echo da' bnežjw cuine' ṉec̱he xtoḻa'chon'. Na' neda' ba bzejni'ida' le'e can' goquen', že' cate' Judasen' bdie'ne' ḻo na' ben' besegue'ede' ḻe', X̱ancho Jesúsen' bex̱ue' to yetextil. 24 Na' be'e yeḻa' chox̱clen c̱he Diosen' na' beyož be'e yeḻa' chox̱clen c̱he' na' bzoxjen', na' gwne': “Ḻe gagw yetextil nga. Ḻenṉa' naquen cuerp c̱hia' da' chnežjua' ṉec̱he xtoḻa'le. Na' quinga gonḻe šjayze'ele bi zejen len le'e dan' gwnežjw cuina' yesote' neda'.” 25 Na' ḻecze ca' bene' cate' beyož gosagüe' xše', bex̱ue' to vas nis uvas na' gwne': “Dan' yože ḻo vas nga zejen da' cobe dan' gwna Diosen' gone' gaclene' le'e. Na' ḻalje xc̱henan' cont gac can' gwne' gonen'. Na' bate'teze ye'ejle ca da' nga choṉa' che'ejle ṉa'a, ḻe šjayze'e bi zejen len le'e dan' gwnežjw cuina' yesote' neda'.” 26 Nachen' yogo' ṉi'a cate' chagwcho yetextilen' na' cate' che'ejcho nis uvasen' chjayze'echo can' bene'na', na' chyix̱jue'echo can' bnežjw cuine' gote' ṉec̱he xtoḻa' beṉac̱hen'. Na' can' gonchczcho šlac biṉa' yide' da' yoble.

27 Can' naquen, še chagwcho yetextilen' na' che'ejcho nis uvasen' cont chjayze'echo yeḻa' got c̱he X̱ancho Jesúsen' perw še bi chonxenchone' cate' choncho ca', napcho doḻa', ḻe chonchon ca da' bibi zaca' cuerp c̱he' dan' bnežjue' na' xc̱hene' da' blalje' ṉec̱he xtoḻa'chon'. 28 Da'nan' cheyaḻa' gonyaṉe'cho xbab še choncho can' chazlaže' Diosen' cate' za' gagwcho yetextilen' na' ye'ejcho nis uvasen' cont šjayze'echo yeḻa' got c̱he X̱ancho Jesúsen'. 29 Ḻe še ye'ej gagwcho sin cbi gonxencho X̱ancho Jesúsen' da' bnežjw cuine' gote' ṉec̱he xtoḻa'chon', Diosen' goṉe' chio' castigw. 30 Na' zanḻe bi zoale güen na' chacšenele na' baḻ beṉe' ba gosate' da' bi gose'ej gosagüen' do laže'. 31 Na' še gacbe'echo na' goncho byen soacho binḻo len X̱ancho Diosen', bi goṉe' chio' castigw cate' che'ej chagwchon. 32 Na' cate' napcho doḻa' can' che'ej chagwchon, X̱ancho Diosen' choṉe' chio' castigw cont yetiṉjecho da' malen' choncho na' bi si'cho castigw toḻi tocaṉe can' yesezi' beṉe' bi chesejnilaže'ne'.

33 Da'nan' beṉe' migw c̱hia', cate' chdop chžagle txen che'ej chagwle, ḻe cueze ḻježle na' ye'ej gagwle txen. 34 Na' še chbiḻ chdonḻe, yejṉi'a yega'aṉ ližle ye'ej gagwle, clel ca gon Diosen' le'e castigw can' chonḻe caten' chdop chžagle. Na' c̱he bichle da' chaclaža' gwzejni'ida' le'e, cate' yida' gan' zoalena' nach ṉia' can' gonḻen'.