PIN’EN NDAG NGAK JOHN
REVELATION
Pin’en ndag ngak John e yoloy ko ngiyal’ nni gafgownag girdi’en Kristus ni bochan e michan’ rorad ngak Jesus Kristus ni ir e Somol rorad. Ri ba’adag John ni nge pi’ e Pagan’ nge athamgil nga laniyan’ e pi’in yad ra be’eg e re babyor ney, me tay ir ngorad ngar pired ni yad ba yul’yul’ ngak Got ko ngiyal’ nike yib e gafgow nge togopluw ngorad ni bochan Jesus.
Pire’ ban’en ni bay ko re babyor ney nike dag Got ngak John ko ngiyal’ nni piliyeg e changar rok nge guy. Rogon ni yoloy John e go’ pi’in ke mich Jesus u wun’rad e yad manang fan e ngiyal’ i n’em, ma pi’in nde mich Jesus u wun’rad e dar nanged fan. Ba thilthil rogon nma leamnag e girdi’ fan e thin ko Revelation, machane tin ni ba ga’ fan e rib gagiyel riy, ni aram e Got e ra gel ngak urngin e pi to’ogor rok u daken Kristus ni Somol, ni mus ku Satan ma ra gel ngak. Mi Got e ra pi’ puluwon girdi’en ni yad ba yul’yul’ ngak, ni aram e yad ra felfelan’ ko par ko bin be’ech e tharmiy nge bin be’ech e fayleng.
Tin ni bay riy
Tabolngin 1:1–8
John nni piliyeg e changar rok nge guy Kristus, nge fapi babyor ni yoloy John ngak fa medlip i galesiya 1:9—3:22
Fare gi babyor ni kan bachiy kan tay medlip i hang ngay 4:1—8:1
Fare medlip i rappa 8:2—11:19
Fare dragon nge fa gal gamanman 12:1—13:18
Yugu boch ban’en nni piliyeg e changar rok John nge guy 14:1—15:8
Fa yu raba’ i plet ni bay e damumuw rok Got riy 16:1–21
Babylon ni waer nge rogon ni ki waer fare gamanman, nge fare profet ni yugu ban’en, nge fare mo’onyan’ 17:1—20:10
Bin tomur e pufthin 20:11–15
Bin be’ech e tharmiy nge bin be’ech e fayleng nge bin be’ech e Jerusalem 21:1—22:5
Tin tomur e thin 22:6–21
1
1 U lan e re ke babyor ney e kan yoloy fa pin’em ngay ni fini dag Jesus Kristus nga ni guy. Pin’ey e pi’ Got ngak John ni nge dag ngak e pi tapigpig rok Got e n’en nthingari m’ug ndab ki n’uw nap’an. Kristus e l’oeg e engel rok nge yan i dag me weliy e pin’ey ngak John, ni ir e tapigpig rok Kristus. 2 Ere John e ke weliy urngin e tin ni guy ban’en. Ba’aray e tin keyog ni murung’agen e re thin ni ba’aram ni pi’ Got ngeb ngak nge n’en nib riyul’ ni dag Jesus Kristus ngak. 3 Nge felan’ e en nra be’eg e re ke babyor ney, ma nge felan’ e pi’in yad ra motoyil ko pi thin ney ni yib rok Got ni be weliy e tin ni bayi m’ug miyad fol ko pin’en ni kan yoloy ngalan e re ke babyor ney! Ya ngiyal’ ni bayi m’ug e pin’ey ni urngin e ke chugur.
Thin ni nge yan ngak fa medlip i galesiya
4 Re babyor ney e yib rok John ni nge yan ngak fa medlip i galesiya ni bay ko nug nu Asia:
I Got ni ir e bay e chiney, me ir e immoy, me ir e bay yib, nge fa medlip i kan ni bay u m’on ko gin ntagil’ Got e ngu’ur ayuweged gimed ma yad be pi’ e gapas nga lanin’med, 5 mi Jesus Kristus ni fa’anem nib yul’yul’ ni i weliy murung’agen Got ngak e girdi’, ni ir e bin ni m’on i Fak Got, ma ku ir e som’on ni faseg Got ko yam’ ndab ki yim’, ni ku ir e be gagiyegnag urngin e pilung nu fayleng e ngi i ayuwegmed ma be pi’ e gapas nga lanin’med.
Gadad ba t’uf rok ma ke pithigdad ko denen rodad u daken racha’en ni map’ u kuruth 6 ke ngongliydad kad manged ba nam i prist ni ngad pigpiggad ngak e Got rok ni Chitamngin. Ngan tayfan minog e sorok ngak Jesus Kristus, me ir e bay rogon ni nge mil suwon urngin ban’en ngak ndariy n’umngin nap’an! Amen.
7 Mu sapgad, bay yib ngodad u daken e manileng! Ma gubin e girdi’ ni bay ra guyed, nib mu’un e pi’in nra kurfed p’eyon ngay. Ma urngin girdi’en e pi nam nu roy u fayleng e bay ra yorgad ni ba ga’ lamrad ni bochan. Rib muduwgil ni aray rogon! Amen.
8 Ke yog Somol ni ir Got ni Gubin ma Rayag Rok, ni ir e bay e chiney, me ir e immoy, me ir e bay yib ni ga’ar, “I gag fare Alfa nge fare Omega, ni aram e tabolngin nge tungun.”
John nni piliyeg e changar rok nge guy Kristus
9 I gag John ni walagmed, ni kad ta’ab girdi’gad Jesus ni gu be un ngomed ko gafgow nge k’adan’ ni bochan, ma gadad bmuun ko gagiyeg rok Jesus. Kan tiyeg nga daken bochi nam ni Patmos fithingan ni bochan e ug weliy e thin rok Got nge tin riyul’ ni weliy Jesus ngan nang. 10 Chirofen ni rran rok Somol me yib fare Kan Nthothup i ying ngog, mu gu rung’ag ba lam ni ba ga’ ni bod laman ba rappa ni be non u keru’ug. 11 Me non ni be ga’ar, “Mu yoloy nga but’ e n’en ni ga be guy, ma ga pi’ e re ke babyor nir nge yan ngak fa medlip i galesiya, ni aram e galesiya nu Efesus, ngu Smyrna, ngu Pergamum, ngu Thyatira, ngu Sardis, ngu Filadelfia, ngu Laodicea.”
12 Mu gu cheal u luwag nggu changar nga tomur ni ngug guy e en ni be non ngog. Mu gguy medlip ley i ban’en ni yima tay e magal nga daken ni kan ngongliy ko gol. 13 Ma bay be’ nike sak’iy u fithik’ fa yu ley i n’en ni bod ya’an ba girdi’, nike yin’ ba mad nib n’uw nike yan i mus ko rifrif u ay, ma bay bangi leed ni gol nib longob nga ngorongoren nike yib u lik’ipon nge yib i th’ab daken ngorongoren. 14 Ma piyan lolugen e ba wechwech ni bod bunu’en e saf, ara ayis nma mul u lang nga but’, ma lan mit e be gal ram’en ni bod e daramram u ba nifiy; 15 ma rifrif u ay e be galgal ram’en ni gowa wasey ni brass ni kan rannag ko nifiy nge mu’ min gichiy downgin, ma laman e bod lingan ba lul’ ni ba ga’ ni beb i map’ u taban bangi war nib tolang ngalan e yibu’. 16 Ma bay medlip i t’uf u lan e ba’ ni mat’aw i pa’, me m’ug ba saydon u l’ugun ni l’agruw raba’ ma mm’uth. Ma owchen e bod owchen e yal’ ni misiw’. 17 Nap’an ni gguy mu gu aw u to’oben ay nga but’ ni gowa be’ nike yim’. Me tay e ba’ ni mat’aw i pa’ nga dakenag me ga’ar, “Dab mu rus! Yi gag fa’anem ni tabolngin nge tungun. 18 I gag fa’anem ni gu be par ni gub fos! I gag e gum’, machane mu sap, kug fos ndab ku gum’ bayay. I gag e bay e yam’ u pa’ag nge gin ni bay e pi’in ni karm’ad riy. 19 Ere mu yoloy e pin’en ni ga be guy, ni pin’en ni bay e chiney nge pin’en ni bay fini yib i m’ug. 20 Ba’aray e n’en nda nnang fan mi murung’agen fa medlip i t’uf ni ba’aray ni ga be guy u lan e ba’ ni mat’aw i pa’ag, nge fa medlip ley i tagil’ e magal ni ba’aray ni kan ngongliy ko gol: re medlip i t’uf ney e ireray fa medlip i engel ko fa medlip i galesiya, ma medlip ley i tagil’ e magal ney e fa medlip i galesiya.”
DRAFT VERSION — Proofreading in progress