1 Ma nap’an ni weliy Jesus e pi thin nem ni gubin ngak e girdi’ nge mu’, me yan nga Kapernaum. 2 Ma bay be’ nreb e tolang ko salthaw nu Roma u rom, ni bay ba tapigpig rok nrib t’uf rok; nre mo’on nem e ke m’ar ni be chugur ni nge yim’. 3 Fa’ani rung’ag e re salthaw nib tolang nem murung’agen Jesus, me l’oeg boch e girdi’ nu Israel ni pi’ilal ngak ni ngar weniggad ngak nge yib nge chuweg e liliy rok e tapigpig rok. 4 Marbad ngak Jesus ngu’ur weniggad ngak ni be lungurad, “Re mo’on nem e bay rogon ni ngam ayuweg. 5 Ya ba t’uf e girdi’ rodad rok me ir e ke toy ba tafen e mu’ulung romad.”

6 Ma aram me un Jesus ngorad ngranod. Ke chugur ko naun me l’oeg fare tolang ko salthaw boch e tafager rok ni ngrogned ngak ni nge lungurad, “Dab mu gafgownigem. Ya dariy rogog ngabang ni nga mub ngalan e naun rog, 7 ma ku dagur finey ni bay rogog ngabang ni ngad mada’gow. Ere yugu mog ni nge chuw e m’ar rok e tapigpig rog, nge gol. 8 Ya ku errogon gag ni kan tiyeg nga tan i pa’ boch i pilungen e salthaw, ma bay boch e salthaw nga tanginag. Ra lungug ko biney, Mman! me yan; mra lungug ko binem, Moy! me yib; mra lungug ko sib rog, Mu rin’ e biney! me rin’.”

9 Ri gin Jesus ko re bugithin ney ni rung’ag; me cheal u luwan nge yog ngak fapi girdi’ ni pire’ ni yad be un ngak ni ga’ar, “Dawor gu pir’eg be’ nrib mich Got u wan’ ni bod gelngin nib mich Got u wan’ e cha’nem, nggog ngomed, ni mus nga Israel ma dari’ riy!”

10 Me sul fa pi’inem nnol’oegrad nga tafen fare tolang ko salthaw miyad pir’eg fa’anem ni tapigpig rok nike gol.

11 De n’uw nap’an* De n’uw nap’an; boch e babyor e bay riy ni Bin miged e rran. me yan Jesus nga bbinaw nu Nain fithingan; me un pi gachalpen ngak nge boch e girdi’ ni pire’ ni pire’. 12 Ma nap’an ni yigi mada’ nga langan e garog ko fare binaw, me guy e girdi’ ni karbad ni ngranod ko gum’eyag. Ma re pagel ni ba’aram nike yim’ e bochi cha’ ni kari maagirag rok be’ ni bpin ni ku ke yim’ e pumo’on rok, ma bo’or e girdi’ ni kar uned ngak u lan e binaw i yib. 13 Ma fa’ani guy Somol e re pin nem, me taganan’ ngak me ga’ar ngak fare pin, “Dakumur yor.” 14 Me yan ngorad nge yan i math ko kahol rok fare yam’, me tal fapi pumo’on ni yad be fek fare yam’. Me ga’ar Jesus, “Fachi cha’! Be lungug ngom, mu suwon!” 15 Me suwon fare yam’ ngalang me non, ni aram e ke fulweg Jesus fachi cha’ ngak e chitiningin.

16 Ma gubin e girdi’ nra mudugdaggad, miyad yog e sorok ngak Got ni be lungurad, “Ke yib i m’ug reb e profet ni ba ga’ u fithik’dad!” Miki lungurad, “Ke yib Got ni nge thapeg e girdi’ rok ngak!”

17 Me wear e re bugithin ney ni murung’agen Jesus u urngin yang u Judea nge yungi n’en nib liyeg yu Judea.

18 Pi gachalpen John e rogned ngak John murung’agen e pin’ey ni gubin. Me pining John l’agruw i yad ngar bow ngak 19 me l’oegrow ngak Somol ni ngar fithew ni nge lungurow, “Gur fa’anem ni yog John ni bay yib fa kabay be’ ni ngu’ug son niged?”

20 Ma fa’anra bow ngak Jesus me lungurow ngak, “John nma tawfe e ke l’oegmow ni nggu fithew gur ni nge lungumow, Gur fa’anem ni yog John ni bay yib fa kabay be’ ni ngu’ug son niged?”

21 Ka re ngiyal’ i n’em me golnag Jesus bo’or e girdi’ ko m’ar nge liliy, me tuluf e mo’onyan’ rok bo’or i yad ngar golgad, ma bo’or e girdi’ nib malmit ni chuweg e malmit rorad. 22 Me fulweg ngak fa gali cha’ ni l’oegrow John ngar bow ni ga’ar, “Mu sulow nga mognew ngak John e tin kam guyew nge tin kam rung’agew ni nge lungumew: pi’in malmit e kar guyed ban’en, ma pi’in mugutgut e kar uned ko yan, ma pi’in kar gafgowgad ko m’ar ni daraw e kan be’ech nagrad,† KAN BE’ECH: Mu guy e 5:12. ma pi’in biling e ke yag ni ngar rung’aged ban’en, ma pi’in karm’ad e kan fasegrad, ma fare Thin Ni Bfel’ e yibe machibnag ko pi’in gafgow. 23 Rib felan’ e en ndagur maruwar u wan’!”

24 Ma fa’ani sul fa gali cha’ ni l’oegrow John, me weliy Jesus murung’agen John ngak fapi girdi’ ni aram urngirad ni ga’ar, “Fa’an mmarod ngak John nga daken e ted, ma mang e mfineyed ni bay mu guyed? Ba gaf i pan ni be buguy e nifeng? 25 Mang e mmarod ni ngam guyed? Be’ nike yin’ e mad nrib tolang puluwon? Pi’in karon’ed e mad ni aram rogon ma yad be adbey e salpiy u rogon e par ni yad be tay e yima pir’egrad u tafen e pilung i yan! 26 Mogned ngog, mang e um fineyed ni bay mu guyed? Ba profet? Er rogon, nggog ngomed ni kam guyed be’ ni ka ba ga’ ngak ba profet. 27 Ya John e eram fa’anem ni yog e babyor nib thothup murung’agen ni ga’ar, I ga’ar Got, ba’aray e mol’og rog; bay gu l’oeg nge m’on rom nge bing e kanawo’ rom.” 28 Me ul ul Jesus ngay nge ga’ar, “Nggog ngomed, ni John e dariy be’ ni kan gargeleg ni ba ga’ ngak; machane en ni ir e th’abi sobut’ u fithik’ e gagiyeg rok Got e ka ba ga’ ngak John.”

29 Ma urngin e girdi’ nge pi tamukun tax nra motoyilgad ngak; miyad nang ni tin nike yog Got ni ngan rin’ e bmat’aw, me tawfe nagrad John. 30 Machane pi Farise nge pi tamchib ko Motochiyel e dar folgad ko tin nike finey Got ni fan ngorad, miyad siyeg ni nge tawfe nagrad John.

31 “Ere susun e mang e ra gu ta’reb rogonnag e girdi’ ko bin daba’ e rran ngay? Yad bod e mang? 32 Yad bod e bitir ni kar pired nga but’ ko gin ni bay e market riy, ni be tolul ba ulung i yad ngak ba ulung i yad ni be lungurad, ‘Kug chubeged e musik ni yima tay ko m’agpa’ ni fan ngomed, ma da mu churu’gad! Ma ku gon’ed e tang ni yima tay ko gum’eyag, ma da mu yorgad!’ 33 Me yib John nma tawfe, mi i par yungiyal’ nike pag e abich ma der unum e wayin, me lungumed e be’ nib aliliy! 34 Me yib e en ni Fak e Girdi’ mi i abich ma be garbod me lungumed, ‘Mu guyed e re mo’on nem! I ir e be’ nib ta’abich mma unum e wayin, me ir e fager rok e pi’in ntamukun tax nge pi’in ndabuy dakenrad u lan binaw!’ 35 Machane gonop rok Got e ke m’ug nib riyul’ rok e pi’in kar folgad riy.”

36 Ba Farise e non ngak Jesus ni nge un ngak ngranow nga tabinaw rok ngar abichgow. Me yan Jesus nga tabinaw rok nge yan i par nga but’ ni nge abich. 37 Ma bay be’ ni bpin u lan e re binaw nem ni be’ nrib tadenen. Me rung’ag e re pin nem ni be abich Jesus u lan e naun ko re Farise nem, me ere fek ba rume’ nni ngongliy ko alabaster nib sug ko florida 38 me yib i sak’iy u keru’ Jesus u to’oben e rifrif u ay, ngi i yor nge munurnag e rifrif u ay Jesus ko lu’ rok. Me faley nga piyan lolugen, me mu’ me faray e rifrif u ay me pu’og fare florida nga daken rifrifen ay Jesus. 39 Ma fare Farise ni ir e pining Jesus nge yib, e fa’ani guy e ren’em, me ga’ar u wan’, “Fa’anra riyul’ nre mo’on ney e ba profet, ma kenang ko mini’ e re pin ney ni be math ngak, ma kenang e re mit i ngongol nib kireb nma ngongliy!”

40 Me ga’ar Jesus ngak, “Simon, bay ban’en ni gub adag ni nggog ngom.”

Me ga’ar Simon, “Tamchib, mog ngog.”

41 Me tabab Jesus ngay ni ga’ar, “Immoy l’agruw i mo’on nra tew e malfith ni salpiy ngak be’ nma pi’ e salpiy ko girdi’ ngan maruwel ngay nge mu’ mi ni fulweg: bagayow e lal mir’ay e salpiy ni wasey nib silber e tay ngak ni malfith ma bagayow e wugem. 42 Dariy bagyow ni ku rayag rok ni nge thang ngak, ma aram me thang e malfith rorow ni yow l’agruw u lan babyoren e malfith. Ere mini’ e arorow nrib gel feni t’uf e cha’nem rok?”

43 Me fulweg Simon ni ga’ar, “Gu be finey ni facha’ ni bo’or e malfith rok nthang u babyor.” Me ga’ar Jesus ngak, “Re fulweg nir ni kam pi’ e bfel’.”

44 Me cheal u luwan nge sap ngak fare pin me ga’ar ngak Simon, “Ga be guy e re pin ney? Gub ngalan e naun rom, ma da mpi’ e ran ngog ni nggu luknag eg ngay, machane ir e ke maluknag e rifrif u eg ko lu’ rok ma ke faley nga piyan lolugen. 45 Me gur e nap’an ni gub nga tabinaw rom ma da mfaray owcheg, me ir e nap’an ni gub nga naun ma dawori tal ni yugu be faray e rifrif u eg. 46 Da mpi’ e gapgep ni nggu tay nga lolugeg, machane ir e ke liyef e rifrif u eg ko florida. 47 Ere nggog ngom ni gelngin nri gub t’uf rok nike dag e ir e ke micheg ni denen rok nib pire’ e ke m’ayfan. Machane cha’ ni bochu’uw e denen rok ni ke m’ayfan, e ri bochu’uw e t’ufeg ni be dag.”

48 Me ere ga’ar Jesus ngak fare pin, “Ke m’ayfan e denen rom.”

49 Ma boch e girdi’ ni kar pired nga tebel e ra tababgad i yog u lanin’rad ni be lungurad, “I mini’ e cha’ney, ni mus ko denen ma be n’ag fan?”

50 Machane me ga’ar Jesus ngak fare pin, “Michan’ rom ngak Got e ke thapegem ngak; ere mman u fithik’ e gapas.”