1 Me sul Jesus u Jordan nib sug ko Kan Nthothup, me mang fare Kan ni Thothup e pow’iy nga daken e ted, 2 ko gin ni i guy mo’onyan’ rogon e n’en nra rin’ me denen Jesus, ni aningeg i ragag e rran ni yodoromnag. Ma aram n’umngin nap’an nde kay ban’en, ere fa’ani m’ay e pi rran nem ma ke yib e bilig ngak.

3 Me ga’ar fare mo’onyan’ ngak, “Fa’anra Fak Got gur, me ere mu non ko re malang ney nge ngal’ ni flowa.”

4 Me fulweg Jesus ni ga’ar, “Fare babyor nib thothup e be ga’ar, ‘Girdi’ e dabiyag ni yigo’o flowa e ra i kay mi i par nib fos.’ ”

5 Me fek fare mo’onyan’ Jesus ngabang nib tolang me dag ngak urngin e pi nam nu fayleng nnap’an e talab ni tay be’. 6 Me ga’ar fare mo’onyan’ ngak, “Gu ra pi’ mat’wum ni ngu’um gagiyegnag e pi nam ney nge urngin e pi fla’ab ney. Ya ni pi’ ngog ni gubin nrayag ni gu pi’ ngak e en ni gub adag ni nggu pi’ ngak. 7 Urngin e pin’ey mra mil suwon ngom ni fa’anra mu ragbug nga but’ u p’eowcheg.”

8 Me fulweg Jesus ngak ni ga’ar, “Fare babyor nib thothup e be ga’ar, ‘Mu siro’ ma ga meybil ngak Somol ni Got rom ma yigo ir e ngam pigpig ngak!’ ”

9 Me fek fare mo’onyan’ Jesus nga Jerusalem nge yan i tay ko gin nth’abi tolang u daken e Tempel, me ga’ar ngak Jesus, “Fa’anra Fak Got gur, ma ga og u roy nga but’. 10 Ya be ga’ar e babyor nib thothup, ‘Bayi non Got ngak e pi engel rok ngar ayuweged gur.’ 11 Ma ku be ga’ar, Bay ra feked gur i yan nga but’ ni dabi maad’ad em ko malang.”

12 Me fulweg Jesus ngak ni ga’ar, “Fare babyor nib thothup e be ga’ar, ‘Ri dab mu sikengnag Somol ni Got rom.’ ”

13 Ma fa’ani mu’ fare mo’onyan’ i guy rogon u gubin i kanawo’en e n’en nra rin’ me denen Jesus, me pag nge yan nib ngoch nap’an.

14 Me ere sul Jesus nga Galile, ni bay gelngin fare Kan Nthothup rok. Me wear murung’agen u daken e gi nug nem. 15 Me machib u lan e pi tafen e mu’ulung rorad i yan, ma urngin e girdi’ ni yog e sorok ngak.

16 Me ere sul Jesus nga Nazareth ko gin ni ir e nchuguluy riy nge ilal, me chirofen ni Sabbath me yan ngalan tafen e mu’ulung ni bod nma rin’. Me sak’iy ngalang ni nge be’eg fare babyor nib thothup, 17 mi ni pi’ e babyor rok Isaiah ni profet ngak. Me pithig fare gi babyor ni kan bachiy ko fa gin’en ni kan yoloy ni ga’ar:

20 Me bachiy Jesus fare gi babyor me pi’ ngak e en nma pigpig u tafen e mu’ulung, me par nga but’. Ma urngin e girdi’ ni yad bay u lan e re tafen e mu’ulung nem e ra pired ni yad be sap ngak. 21 Me tabab ko welthin ngorad ni ga’ar, “Fare gin’en ni kad be’eged u lan e babyor nib thothup e ke yib i m’ug nib riyul’ e bin daba’ e rran, ni bod rogon ni kug be’eg kam rung’aged.”

22 Ma gubin e girdi’ ni immoy u rom e rogned e sorok ngak, miyad gin ko pi thin nem ni bfel’ nike weliy ngorad. Me lungurad, “Gathi ireray fa’anem ni fak Josef?”

23 Me yog ngorad ni ga’ar, “Gu manang ni bay mogned fare bugithin ngog ni fa’ani ga’ar, ‘Togta, mu gol nigem ko liliy.’ Ma bay kumoged ngog ni ngkug rin’ u roy u lan e binaw rog e pin’en ni kam rung’aged ni kug rin’ u Kapernaum.” 24 Miki ul ul Jesus ngay nge ga’ar, “Ba’aray bbugithin ni nggog ngomed, be’ nib profet e ri danir tayfan u lan e binaw rok. 25 Mu telmed ngog: riyul’ ni bo’or e ppin nu Israel nra pired nike yim’ figirngirad ko fa ngiyal’nem ni kabay Elijah riy, ni fa’ani par nde aw e n’uw ni dalip e duw nge baley, me yib e uyongol ni ba ga’ nga daken e nam ni ga’ngin. 26 Machane da nol’oeg Elijah ngak ta’a bagayad, ya kemus ni ta’abe’ nike yim’ e pumo’on rok u Zarefath, ni bay u lan e nug nu Sidon e nol’oeg ngak. 27 Ma bo’or e daraw u lan e nam nu Israel e re ngiyal’in’em nnap’an Elijah ni profet; machane dariy ta’a bagayad nchuweg e daraw rok, ya kemus ni yigo’o Naaman ni be’ u Syria e nchuweg e daraw rok.”

28 Ma urngin e girdi’ ni ur moyed u lan tafen e re mu’ulung nem e rrung’aged e pi thin ney miyad damumuw. 29 Miyad sak’iy ngar girngiyed Jesus i yan nga wuru’ e binaw, miyad fek i yan nga p’ebugul e re burey ni ba’aram ni ir e bay e binaw rorad riy ni ngron’ed u taban bangi war nib tolang nga but’. 30 Machane me yan u fithik’ fapi girdi’ ni aram urngirad nge yan ko gin ni be finey.

31 Ma aram me yan Jesus nga Kapernaum, nib binaw ni bay u lan yu Galile, ni aram e gin ni machibnag e girdi’ riy ko chirofen ni Sabbath. 32 Ma yad gubin nra gin gad ngarogon e machib ni tay, ya thin rok e bay gelngin. 33 Ma bay be’ nib mo’on u rom u lan tafen e mu’ulung nike ying ba mo’onyan’ ngak, me tolul ni be ga’ar, 34 “Mang e ngam rin’ ngomad, i gur Jesus nu Nazareth? Ka mub ngaray ni ngam thang owchemad? Gu manang ko gur mini’: i gur e mol’og rok Got ni gab thothup!”

35 Me non Jesus ngak fare mo’onyan’ ni ga’ar, “Mu th’ab gulungam, nga mub u fithik’ i downgin e cha’nir nga but’!” Me pingeg fare mo’onyan’ fare mo’on nge aw nga but’ u p’eowcherad ni yad gubin, me chuw u fithik’ fa’anem nde maad’adnag.

36 Ma urngin e girdi’ nra gin gad ngay, miyad yog u fithik’rad ni lungurad, “Mit i mang thin e biney e thin? Re mo’on ney e bay mat’wun nge gelngin nra non ngak e mo’onyan’ ni ngar chuwgad u fithik’ be’, miyad chuw!” 37 Me wear murung’agen Jesus nga gubin yang ko gi nug nem.

38 Me chuw Jesus u tafen e mu’ulung nge yan nga tafen Simon. Ma bay e chitiningin e en nleengin Simon nib m’ar nrib gel e gowel u daken, miyad yog murung’agen ngak Jesus. 39 Me yan Jesus i sak’iy nga to’oben e bet rok, me non ngak fare gowel ni bay u daken fa’anem ni nge chuw. Me chuw e gowel u daken me suwon ngalang ni kachingiyal’ nem, me tabab fare pin i ayuwegrad ko tin ni nge yag ngorad.

40 Ma fa’ani aw e lumor, ma urngin e girdi’ ni bay e tafager rorad nib m’ar nra bagayad ma rogon e mit i m’ar ni bay rok e ra feked yad i yib ngak Jesus; me tay pa’ nga dakenrad ni yad gubin nge gol nagrad ko liliy rorad. 41 Ma ku errogon e mo’onyan’ nra chuwgad u fithik’ bo’or e girdi’, ni ra tolulgad miyad chuw u fithik’rad ni be lungurad, “I gur fa’anem ni Fak Got gur!”

Me yog Jesus ngorad ni ngar th’abed gulungrad, ma daki pagrad ni ngar nonod, ya yad manang ni ir fare Messiah.

42 Ma nap’an ni be puf e woch me chuw Jesus u lan binaw nge yan ngabangi n’en ndariy e girdi’ riy. Me tabab e girdi’ i changarnag, ma fa’anra pir’eged miyad guy rogon ni ngar taled ni nge dabki yan. 43 Machane me ga’ar ngorad, “Dabisiy ni ngku gu machibnag u boch e binaw i yan fare Thin Ni Bfel’ ni murung’agen e gagiyeg rok Got, ya ke l’oegeg Got ku gub ni ireray e n’en ni nggu rin’.”

44 Ma aram me machib u lan tafen e mu’ulung u Judea i yan.