21
Falan Babilɔn yamanan xili ma
1 Waliyiya falan ni i ra tonbonna xili ma fɔxɔ igen dɛ.* Tonbonna: A Babilɔn nan ma fe falama na ra.
Yaxun fama nɛn
sa keli tonbonni yamana magaxuxini
alo kala ti foyen nɛma fɛ yiifari ma tonbonna makɔɛ.
2 Ala bata fe magaxuxin yita n na.
Yanfantenna bata keli yanfa sodeni.
Halagi tiin bata halagin ti fɔlɔ.
Elan kaane, ɛ siga yɛngɛni!
Mede kaane ɛ taan nabilin!† Elan kaane nun Mede kaane yi Babilɔn kaane xɔyine nan na benun e xa e yɛngɛ, e yi e nɔ.
Muxune yi kutunma e bun ma,
koni n fa danna sama nɛn na ma!
3 Nanara, n tagin xuruxurunma.
N ɲaxankataxi
alo ɲaxanla tinna ma.
N naxan mɛma,
na bata n gaxu ki faɲi!
N naxan toma,
na bata n kɔntɔfili.
4 Wɛkilɛ mi fa n yii,
n xuruxurunma gaxuni.
N yi ɲinbanna nan mamɛma nun
alogo n xa bɔɲɛ xunbeli,
koni kɔɛɛn fan bata magaxu ayi.
5 Donseen bata rafala,
dagine bata yisa,
muxune dɔxi e dɛgedeni,
e minma.
Kuntigine, ɛ keli!
Ɛ yɛngɛ so seene yitɔn.
6 Marigina ito nan falaxi n xa, a naxa,
“Sa kantan tina nde ti,
a na naxan to, a na fala i xa.
7 Xa a yɛngɛ so wontorone to,
soone naxanye bandunma,
soo ragine dɔxi sofanle fari,
ndee fan dɔxi ɲɔgɔmɛne fari,
a xa a liga a yeren ma ki faɲi.”
8 Kantan tiin xa sɔnxɔ, a naxa,
“N Marigina, n tixi yinna xuntagi fɛriɲɛn gbɛn!
N nan n ma kantan tideni kɔɛna ngaan na.
9 Ɛ a mato, xɛmɛna nde fama yɛngɛ so wontoron kui
soo firin naxan bandunma.
Na yi a xuini te, a naxa,
‘Babilɔn taan bata kala!
A bata kala!
E ala sawurane birin bata bira
e xuya ayi bɔxɔni.’ ”
10 N ma yamana,
ɛ tan naxan bata bɔnbɔ
alo murutun lonna ma,
n na nan mɛxi Alatala Sɛnbɛn Birin Kanna ra, Isirayilaa Ala,
n yi a rali ɛ ma.
Falana Edɔn yamanan xili ma
11 Waliyiya falan ni i ra Duma taan xili ma.
Xuina nde minima Seyiri yamanani,
a naxa, “Kantan tina, kɔɛɛn di?
Kantan tina kɔɛɛn di?”
12 Kantan tiin yi a yabi,
a naxa, “Xɔtɔnna a lima nɛn,
kɔɛɛn fan yi so.
Xa i mɔn waxi maxɔdinna ti feni,
maxɔdinna ti.
Waxati gbɛtɛ, i mɔn yi fa.”
Alaa falana Arabi xili ma
13 Waliyiya falan ni i ra Arabi yamanan xili ma.
Ɛ xima nɛn Arabi burunna ra,
Dedan bɔnsɔnna, sigatiine tonbonni.
14 Ɛ tan Tema kaane,
ɛ sa fa igen na muxune xa
min xɔnla naxanye ma
ɛ fa balon na muxu gixine xa.
15 Muxune bata e gi silanfanna bun
silanfanne yi texi e xili ma,
xanle bandunxi e xili ma,
e gixi yɛngɛn gbalon bun.
16 Marigina ito nan falaxi n xa, a naxa, “Benun ɲɛɛ keden yatɛ, Kedari bɔnsɔnna‡ Kedari findixi Sumayilaa diin nan na. Na feen sɛbɛxi Dunuɲa Fɔlɔn 25.13 kui. binyen birin ɲanma nɛn. 17 Muxu wuyaxi mi fa luma e nii ra e xali wonle yɛ, Kedari yɛngɛsone.” Alatala, Isirayilaa Ala nan na falaxi.