1 มอยฮ ปุย โม เฮี มัฮ มอยฮ โม ฮัวนา ซฆลาวม ยุฮ โม อิซราเอน ป เอีญ ไม่ เอซรา เน่อึม นึง เวียง บ่าบี่โลน, เจน แปน อาทาเซอซิต กซัต เซ. มอยฮ โม เซ มัฮ ตอก เฮี,

2 เน่อึม จัตเจือ ฟิเนฮัต มัฮ เกอโชม.

เน่อึม จัตเจือ อิทามา มัฮ ด่านีเอน.

เน่อึม จัตเจือ ด่าวิต มัฮ ฮัตทัต.

3 เน่อึม จัตเจือ เชคานิยา ป มัฮ ซฆลาวม โม ปาโรต นึง อื มัฮ เซคาริยา, ไม่ โม ปรเมะ นึง อื ป เอีจ โจต ปุย มอยฮ อื นึง บั่นชี เซ ไก ติ รอย ไม่ รฮอน ปุย.

4 เน่อึม จัตเจือ ปาฮัต-โมอัป มัฮ เอลีไน กวน เซราฮิยา. ป ฮอยจ ไม่ อื มัฮ ปรเมะ ลอา รอย ปุย.

5 เน่อึม จัตเจือ ซัตทู มัฮ เชคานิยา กวน ยาฮาซีเอน. ป ฮอยจ ไม่ อื มัฮ ปรเมะ ลอวย รอย ปุย.

6 เน่อึม จัตเจือ อาดิ่น มัฮ เอเบ่ต กวน โยนาทัน. ป ฮอยจ ไม่ อื มัฮ ปรเมะ รฮอน ปุย.

7 เน่อึม จัตเจือ เอลัม มัฮ เยชายา กวน อาทาลิยา. ป ฮอยจ ไม่ อื เซ ไก ปรเมะ นึง อาลแฆลฮ ปุย.

8 เน่อึม จัตเจือ เชฟาทิยา มัฮ เซบ่าดิ่ยา กวน มีคาเอน. ป ฮอยจ ไม่ อื เซ มัฮ ปรเมะ รเตะ ปุย.

9 เน่อึม จัตเจือ โยอัป มัฮ โอบ่าดี่ กวน เยฮีเอน. ป ฮอยจ ไม่ อื เซ ไก ปรเมะ นึง ลอา รอย ไม่ กาว โรฮ ซเตะ ปุย.

10 เน่อึม จัตเจือ บ่านี มัฮ เชโลมิต กวน โยซิฟียา. ป ฮอยจ ไม่ อื เซ ไก ปรเมะ นึง ติ รอย ไม่ ลแฆลฮ ปุย.

11 เน่อึม จัตเจือ เบ่ไบ่ มัฮ เซคาริยา กวน เบ่ไบ่. ป ฮอยจ ไม่ อื เซ ไก ปรเมะ นึง ง่า โรฮ ซเตะ ปุย.

12 เน่อึม จัตเจือ อัตกัต มัฮ โยฮานัน กวน ฮักคาทัน. ป ฮอยจ ไม่ อื เซ ไก ปรเมะ นึง ติ รอย ไม่ กาว ปุย.

13 เน่อึม จัตเจือ อาโด่นีคัม ไก โม ป ฮอยจ รเคะ นึง, เฮี มัฮ มอยฮ ปุย เซ. มัฮ เอลีเฟเลต, เยอูเอน ไม่ เชไมยา. ป ฮอยจ ไม่ อื เซ ไก ปรเมะ นึง ลแฆลฮ ปุย.

14 เน่อึม จัตเจือ บิ่กไว มัฮ อุไท ไม่ ซักเคอ. ป ฮอยจ ไม่ ปุย ลอา เซ ไก ปรเมะ นึง อาลแฆลฮ ปุย.

15 อาึ เอีจ รโจะ ปุย โม เซ เกือฮ อาวต นึง เฆียง รอาวม เวียง คื ป ปัต เลีฮ ลั่ก ย่วง อาฮะวา. เอะ ยุฮ ไคะ อาวต แตะ นา เซ ลอวย ซเงะ. เญือม ซาวป อาึ แลน โม ลัปซด่อน ไม่ โม ซตุ เซ, อาึ ยุ โตว จัตเจือ โม เลวี นา เซ ติ ตื เนอึม. 16 ฟวยจ เซ อาึ เกือฮ ปุย โฮว กอก เอลีเยเซอ, อารีเอน, เชไมยา, เอนนาทัน, ยาริป, เอนนาทัน, นาทัน, เซคาริยา ไม่ เมชูลัม, โม ป มัฮ ฮัวนา ปุย, ไม่ เกือฮ ซาวป กอก โยยาริป ไม่ เอนนาทัน ป มัฮ ปุย ไมจ พันญา. 17 อาึ ดวน ปุย โม เซ โฮว เคะ อิตโด่ ป มัฮ ป ระ ป คาว นึง ย่วง คาซิเฟีย. คระ เฌือต ปุย เซ มัฮ ป ยุฮ กัน นึง วิฮัน ไพรม อื. มัฮ ปัว เยอะ โม เซ เกือฮ ตาว ปุย เกือฮ โฮว ไม่ เอะ ละ ซ รซอฮ อื นึง วิฮัน ยุฮ พะจาว ทื เอะ. 18 เญือม เซ อัมนัต พะจาว ไม่ กุนมุ่น ยุฮ อื อาวต ไม่ เอะ. ปุย โม เซ ตาว เนอึม ปุย ป ไก เนอึม ป ยุ ป ยุง ไม่ ที รพาวม แตะ ฮอยจ ละ เอะ. มอยฮ อื มัฮ เชเรบี่ยา, มัฮ จัตเจือ โม มาลี กวน เลวี เซ. เชเรบี่ยา ไม่ กวน รเมะ อื ไม่ โม เอียกปุ คระ เฌือต อื, รโจะ เตือง โอยจ อื แปน กาว โรฮ ซเตะ ปุย. 19 ปุย โม เซ ตาว โรฮ ฮาชาบี่ยา ไม่ เยชายา ไม่ โม เอียกปุ คระ เฌือต อื ไม่ โม กวน อื รโจะ แปน ง่า ปุย. ปุย โม เซ เยอ มัฮ จัตเจือ เมรารี. 20 โนก ฮา ปุย โม เซ เยอ, ไก แม ลอา รอย ไม่ ง่า ปุย ป ลัง รซอฮ นึง วิฮัน เซ. เอีจ มัฮ ตื จัตเจือ โม ป โจต ด่าวิต อาึง มอยฮ อื ละ ซ เรอึม อื โม เลวี นึง วิฮัน เซ.

21 เญือม เซ อาึ ครอฮ ละ ปุย ดวน ปุย เออึป ป โซม ป ปอน แตะ, นึง โบ รอาวม เวียง คื อาฮะวา เซ, ละ ซ โฮลฮ เอะ เรีจ ติ แตะ เตียม ซองนา พะจาว ยุฮ แตะ, ละ ซ ปัว พะจาว นัม คระ นัม โครง ละ แตะ นึง กัน เอีญ เอะ นึง เมือง แตะ. มัฮ โรฮ ละ ซ ปัว พะจาว โซะโกะ ฮรักซา นึง โม กวน เฌือต แตะ, ไม่ คาวคอง เงอะ เตือง โอยจ อื. 22 ดัฮ อาึ ซ ปัว โม ตฮัน บุก บรอง นึง กซัต ละ ซ เกือฮ แปน ป เฆีญ เอะ นึง คระ เอีญ เญอะ เซ อาึ โซะกิจ โรฮ ฆาื, นึง เอีจ อัฮ อาึ อื ละ กซัต เซ ตอก เฮี, “อัมนัต พะจาว ไม่ กุนมุ่น ยุฮ อื เอีจ อาวต ไม่ โม ป อาึง รพาวม แตะ นึง อื. ละ โม ป ละ โปวฮ แตะ เซ, พะจาว ปังเมอ ซ เกือฮ อื ลอก ตุต แตะ,” อาึ เอีจ อัฮ ตอก เซ. 23 เอะ เออึป เนอึม ป โซม ป ปอน แตะ ฆาื อื ละ ซ ไววอน ปัว พะจาว ยุฮ แตะ เรอึม แตะ นึง ไลลวง เฮี. เญือม เซ พะจาว เอีจ โลยฮ เนอึม รซอม ไววอน เอะ เซ.

24 ฟวยจ เซ อาึ เลือก อาึง โม ซตุ ระ กาว โรฮ ลอา ปุย, มัฮ เชเรบี่ยา ไม่ ฮาชาบี่ยา, ไม่ โม ซตุ ไฮญ นึง อื แม กาว ปุย. 25 เญือม เซ อาึ แฆ ไคร มาื ไม่ เครอึง โกว ปุย. โอเอีฮ โม เซ มัฮ ป ทไว โม กซัต ไม่ โม ปุ ซิงซา อื โอเอีฮ, ไม่ จาวไน ป รซอฮ ละ อื, ไม่ โม อิซราเอน เตือง โอยจ อื. เอีจ มัฮ ละ ซ โกว อื ละ วิฮัน ยุฮ พะจาว ป ทื เอะ เซ. โอเอีฮ โม เซ อาึ เอีจ มอป ละ โม ซตุ เซ. 26 ป แฆ อาึ มอป ละ อื เซ มัฮ มาื ไก 650 ตะลัน, มัฮ เครอึง โกว ปุย ป ยุฮ ปุย นึง มาื 100 ตะลัน* 8:26 มาื ติ ตะลัน ไก นัมนัก ด่าว ง่วย โรฮ ปาวน กิโลกรัม. มัฮ แม ไคร นัมนัก 100 ตะลัน. 27 มัฮ ซโลวง ไคร ง่า โม่ว นัมนัก 1,000 แทป, มัฮ แม ซโลวง ไร ซเงี ญื ปุย เกือฮ ตอฮ ลอา โม่ว, งวยฮ อื เมาะ โรฮ งวยฮ ซโลวง ไคร เซ.

28 ฟวยจ เซ อาึ อัฮ ละ ปุย โม เซ ตอก เฮี, “โม เปะ เตือง โอยจ เปอะ เอีจ มัฮ เปอะ ปุย ซัมคัน นึง เอีจ ทไว ปุย เปอะ ละ พะจาว. เครอึง โกว ปุย ไม่ ไคร มาื นึง อื เอีจ มัฮ ตื โรฮ ป ซัมคัน นึง มัฮ อื ป ทไว ปุย ไม่ เตม รพาวม แตะ ละ เยโฮวา พะจาว ทื โม จัตเจือ ไพรม โม เปะ เซ. 29 ไมจ เปอะ โซะโกะ ฮรักซา นึง โอเอีฮ โม เซ ฮอยจ ละ ฮอยจ เปอะ นึง วิฮัน ยุฮ พะจาว เซ. ดัฮ เปอะ เอีจ ฮอยจ นา เซ ไมจ เปอะ เลียก แฆ นึง โตะ ฮอง อาวต โม ซตุ เซ. ฟวยจ เซ ไมจ เปอะ มอป ละ โม ฮัวนา ซตุ ไม่ โม เลวี ไม่ โม ฮัวนา ซฆลาวม ยุฮ โม อิซราเอน ป อาวต นึง เวียง เยรูซาเลม เซ เตือง โอยจ อื,” อัฮ เซ ละ. 30 โม ซตุ ไม่ โม เลวี เซ โซะโกะ ฮรักซา เนอึม นึง ไคร มาื ไม่ เครอึง โกว ปุย ป เอีจ แฆ ปุย ละ แตะ เซ, ละ ซ โรวก อื ฮอยจ นึง วิฮัน ยุฮ พะจาว ป ไก นึง เวียง เยรูซาเลม เซ.

31 เญือม เซ เอะ โอก โฮว เน่อึม นึง โบ รอาวม เวียง คื อาฮะวา เซ, ละ ซ โฮว เยอะ ฮอยจ นึง เวียง เยรูซาเลม. อัมนัต พะจาว ไม่ กุนมุ่น ยุฮ อื เอีจ อาวต ไม่ เอะ, เฆีญ เอะ เกือฮ โปน ฮา ป ฆวต รุป ไม่ เยอะ, ไม่ โม คะมุย มอง ซะ เต เยอะ นึง คระ เซ. เญือม โอก เอะ ฮา นา เซ ปุก ฮาวก เคิ ติ กาว โรฮ ลอา ซาวม. 32 เญือม เอีจ ฮอยจ เอะ นึง เวียง เยรูซาเลม เซ, ลอต เอิน ลโล่ะ นา เซ ลอวย ซเงะ.

33 ซเงะ ปาวน นึง อื เอะ โฮว ฮอยจ นึง วิฮัน ยุฮ พะจาว เซ. เอะ แฆ ไคร มาื ไม่ เครอึง โกว ปุย นึง วิฮัน เซ. ฟวยจ เซ มอป ละ เมเรโมต กวน อุรียา ป มัฮ ซตุ, ไม่ โม ป อาวต ไม่ อื, ป มัฮ เอเลอาซา กวน ฟีเนฮัต ไม่ โม เลวี ลอา ปุย ป มัฮ โยซาบั่ต กวน เยชูวา, ไม่ โนอัตยา กวน บิ่นนุย. 34 ปุย โม เซ เมีญ เมาะ ไก อื, แฆ แม โรฮ เมาะ นัมนัก โอเอีฮ โม เซ ไม่ โจต อื อาึง นึง นังซื ยุฮ แตะ โครยญ เจือ.

35 เญือม เซ เมาะ ป เอีญ เน่อึม โฮว แปน แตะ ครา นึง เมือง ปุย เซ, โรวก ตอง ทไว โอเอีฮ ละ พะจาว ทื โม อิซราเอน, มัฮ โมวก โปก กาว โรฮ ลอา ตัว รโตง โม อิซราเอน เตือง โอยจ อื, มัฮ แกะ โปก รไตม โรฮ แลฮ ตัว, มัฮ แม กวน แกะ อาลแฆลฮ โรฮ อาแลฮ ตัว, ไม่ ปิ โปก กาว โรฮ ลอา ตัว ละ ซ แปน อื ควน โตฮ อื ติ แตะ ฮา มั่ป. โอเอีฮ โม เซ โครยญ เจือ มัฮ ตื ป ตอง อื ทไว ละ พะจาว. 36 ปุย โม เซ โรวก นังซื รซอม กซัต เซ, เกือฮ อื ละ โม กวนไจ โกะ อื, ไม่ โม จาวเมือง ป อาวต แควน บลัฮ โกลง ยูฟะเรตี ลวง ลั่ก เลียก ซเงะ เซ. ปุย โม เซ ลอต แปน ป เรอึม รโพ โม ลัปซด่อน เซ นึง กัน ป เกว ไม่ วิฮัน ยุฮ พะจาว เซ.