1 เนอึม โฮลฮ โรง ไซรัต* 1:1 กซัต ไซรัต เป เมือง บ่าบี่โลน ไน เนอึม 539 กา เกิต พะเยซู, ลอต โฮลฮ แปน กซัต ระ. เคียง เซ ปุน เตียง ปุย โฮวน เมือง. กซัต เมือง เปอเซีย แปน กซัต ระ อา, เญือม เซ พะจาว โบว รพาวม อื เกือฮ อื เนอึง ป อัฮ แตะ. มัฮ ยุฮ อื ตอก เซ นึง ซ เกือฮ แตะ โอเอีฮ เกิต ตัม ป อัฮ เยเรมี อาึง. กซัต เซ เกือฮ ปุย โฮว ครอฮ ไลลวง เฮี ละ ปุย เลี่ป เมือง เตียง แตะ เซ. เกือฮ โรฮ ปุย ไซฮ อื แปน นังซื ตอก เฮี, 2 “เฮี มัฮ รซอม ไซรัต กซัต ระ เมือง เปอเซีย, พะเยโฮวา ป มัฮ พะจาว กุม เมือง มะลอง เอีจ มอป เมือง ปุย ติ ปลัฮเตะ ละ อาึ เตือง โอยจ อื. เอีจ ดวน โรฮ อาึ ยุฮ วิฮัน ละ แตะ นึง เวียง เยรูซาเลม ป ไก นึง เมือง ยูด่า เซ. 3 โม เปะ เตือง โอยจ เปอะ เมาะ ป มัฮ ปุย ไน พะจาว เซ ปัว พะจาว ยุฮ เปอะ อาวต ไม่ เปอะ. ไมจ โม เปะ เอีญ ฮอยจ นึง เวียง เยรูซาเลม ไน เมือง ยูด่า เซ, ละ ซ ยุฮ โคระ แม เปอะ วิฮัน ละ พะเยโฮวา พะจาว ทื โม อิซราเอน. พะจาว เซ มัฮ ป อาวต นึง เวียง เยรูซาเลม เซ. 4 โม ป มัฮ ลั่ง ปุย ไน พะจาว ปัง อาวต นา ออฮ นา เอีฮ ญุ่ก, ดัฮ ไก ป ตองกัน ปุย เรอึม แตะ นึง กัน ซ เอีญ อื ฮอยจ นึง เมือง แตะ เซ, เกือฮ เอิน ปุย ย่วง อาวต อื เซ เรอึม. ไมจ อื เกือฮ ไคร มาื ละ ไม่ จลิต คอง กิน ไม่ ซัตซิง ละ ซ ตัง อื โรวก โอเอีฮ นึง อื. ไมจ โรฮ อื เกือฮ ไม่ โอเอีฮ ละ ซ ทไว อื ละ พะจาว ตัม รพาวม ฆวต ทไว แตะ นึง วิฮัน ป ไก นึง เวียง เยรูซาเลม เซ,” อัฮ เซ รซอม กซัต เซ.

5 เญือม เซ พะจาว โบว รพาวม ปุย ง่อน เกือฮ อื ฆวต เอีญ. มัฮ โม ฮัวนา ซฆลาวม โม ยูด่า ไม่ โม เบ่นยามิน ง่อน ไม่ โม ซตุ ไม่ โม เลวี ง่อน. โม เซ เพรียง ติ แตะ ละ ซ เอีญ ยุฮ โคระ แม แตะ วิฮัน ละ พะจาว ป อาวต นึง เยรูซาเลม. 6 โม ปุ ย่วง อื เตือง โอยจ อื เรอึม เนอึม อื นึง เครอึง ไคร เครอึง มาื ไม่ ป โซม ป ปอน อื ไม่ ซัตซิง ไม่ โอเอีฮ ไฮญ เตือง ป ซ ทไว อื ละ พะจาว ตัม รพาวม ฆวต ทไว แตะ. 7 กลอง เชือม ไม่ โอเอีฮ ไฮญ ป ตุย กซัต เนบู่คัตเนซัน โรวก ฮา วิฮัน ยุฮ พะจาว นึง เยรูซาเลม โฮ, ไม่ อาึง อื นึง เวือต พะ ทื แตะ ไพรม อื เซ, กซัต ไซรัต เซ เกือฮ แม อื ละ โม ยิว. 8 กซัต ไซรัต เซ เกือฮ มิตเรดั่ต ป แลน คอง ระ งวยฮ ยุฮ แตะ ตาว โอเอีฮ เซ โอก. เกือฮ อื เมีญ เมาะ ไก อื. เกือฮ เซน อื ละ เชตบั่ตซา ป มัฮ จาวเมือง ยูด่า. 9-10 เครอึง โม เซ มัฮ ตอก เฮี เซน อื. ไก เชือม ไคร 30 ไม่ เชือม มาื 1,000 ไม่ ทัต มาื 29, ไม่ กลอง ไคร 30 ไม่ กลอง มาื แตวะ 410 ไม่ เครอึง ไฮญ 1,000. 11 เตือง โอยจ อื ไก 5,400 เจือ ป มัฮ เครอึง ไคร เครอึง มาื โรวก อื เซ. โอเอีฮ โม เซ มัฮ ป โรวก เชตบั่ตซา ไม่ แตะ เญือม นัม อื โม ป เอีญ เน่อึม นึง แปน แตะ ครา นึง เมือง บ่าบี่โลน ฮอยจ นึง เยรูซาเลม.