1 Ndiya ska yu kula ꞌin neꞌ judío nu naan Nicodemo, yu fariseo nu lka ndloo la ngwa yu. Loꞌo neꞌ fariseo ni, kti ꞌa ngiꞌni neꞌ, nxkeꞌ tiꞌ neꞌ. 2 Bra nu ngwiꞌya tla yaa yu kula kanꞌ seꞌen ndiꞌin Jesús:

―Mstru Jesús ―ndukwin yu―, jlyo tiꞌ nten chaꞌ nuꞌwin lkaa ska mstru nu msuꞌwa Ndiose ꞌiin ndijyaan lo chalyuu, chaꞌ ja ka ꞌiin kuꞌnii skaa chaꞌ tnun si ja loꞌo Ndiose ndayaꞌ ꞌiin. Jlyo tiꞌ ba chaꞌ ja ka ꞌin nten chalyuu kuꞌni neꞌ ngwañaꞌan ―ndukwin Nicodemo ꞌin Jesús.

3 Ykwiꞌ Jesús loꞌo yu bra kanꞌ:

―Chañi ꞌa chaꞌ nu nchkwiǐnꞌ loꞌoo ni, chaꞌ ngiꞌni Stiǐn Ndiose chaꞌ kala nten xiyaꞌ, xa nu xlyaa neꞌ sten neꞌ chaꞌ ꞌin Ndiose, chaꞌ ka Ni ndloo niꞌ kasiya ꞌin neꞌ ―ndukwin Jesús.

4 ―¿Ni sa ñaꞌan ka kalaan xiyaꞌ xa nu wa msuanꞌ? ―ndukwin Nicodemo ꞌin Jesús―. ¿Ta ka stean niꞌ jyaꞌaan xiyaꞌ a?, chaꞌ xiyaꞌ kalaan ―ndukwin yu.

5-6 ―Chañi chaꞌ nu chkwiǐnꞌ loꞌoo ni ―ndukwin Jesús―. Nten lka nu ndlya xa nu yꞌni kala nten chalyuu ꞌin neꞌ, loꞌo Tyiꞌi Ndiose lka nu ngiꞌni chaꞌ xaꞌan kasiya ꞌin nten ―ndukwin Jesús―. Ndiꞌin chaꞌ ka kwi kasiya ꞌwan si nchka tiꞌ wan chaꞌ kulo Ndiose tñan niꞌ kasiya ꞌwan. Ndiꞌin chaꞌ xuꞌwi wan lo tyiꞌa, kwiꞌ ngwañaꞌan ndiꞌin chaꞌ kanun Tyiꞌi Ndiose niꞌ kasiya ꞌwan ―ndukwin Jesús ꞌin Nicodemo―. 7 Ja kuwe ꞌa tiiꞌ ꞌin chaꞌ nu nchkwiǐnꞌ loꞌoo, chaꞌ ndiꞌin chaꞌ kala nten xiyaꞌ. 8 Kwiꞌin ni, nskwa kwiꞌin la seꞌen nchka tiꞌ ran; ni siya nganaan chaꞌ nganen nskwa kwiꞌin, ja nchka biyaꞌ tianꞌ la nde mdoꞌo kwiꞌin kanꞌ, la nde tsaa ran bra kanꞌ ―ndukwin Jesús―. Kwiꞌ ngwañaꞌan lka loꞌo Tyiꞌi Ndiose, ja nchka biyaꞌ tiꞌ nten sa ñaꞌan nu ngiꞌni Ndiose chaꞌ ka kwi kasiya ꞌin neꞌ ―ndukwin Jesús ꞌin yu.

9 ―¿Ni sa ñaꞌan ka chaꞌ kanꞌ ngwañaꞌan a? ―ndukwin Nicodemo bra kanꞌ.

10 Loꞌo mskwen Jesús ꞌin yu bra kanꞌ:

―¿Ta siꞌi mstru kula ꞌin neꞌ judío lkaa a? ¿Ni chaꞌ lka ja ndiꞌyaa kwenta ꞌin chaꞌ kanꞌ sikwa? ―ndukwin Jesús ꞌin yu―. 11 Chañi ꞌa chaꞌ nu chkwiǐnꞌ loꞌoo ni. Nu bare, ñi nchkwiꞌ ba chaꞌ ꞌin ska chaꞌ nu wa jlyo tiꞌ ba, ska chaꞌ nu wa naꞌan ba, loꞌo ja la ndukwa wan chaꞌ nu nchkwiꞌ ba ―ndukwin Jesús―. 12 Ndiya chaꞌ nu nchkwiǐnꞌ loꞌo wan chaꞌ ꞌin chalyuu re, loꞌo ja ndyaa ñaꞌan tiꞌ wan chaꞌ kanꞌ. ¿Ni sa ñaꞌan ka chaꞌ nu tsaa ñaꞌan tiꞌ wan ꞌñaǎn xa nu chkwiǐnꞌ loꞌo wan ska chaꞌ ꞌin Ndiose nu nka ndloo a? ―ndukwin Jesús ꞌin Nicodemo―.

13 ’Ja ya tsaa ska nten niꞌ kwan seꞌen ndiꞌin Ndiose. Skaǎn tiǎn nu msuꞌwa Ndiose ꞌñaǎn ndijyaǎn chaꞌ kaǎn nten, nde kwa mdoꞌoǔn chaꞌ ndijyaǎn lo chalyuu re; nde kwa lka naꞌan tyiǐn. 14 Xa nu mdiꞌin ayman Moisés lo ntenꞌ wtyi kanꞌ nu ngwa sꞌni, kwan mskwen yu ska kunan chkwan nu ndukwi chunꞌ yka, chaꞌ ñaꞌan nten kunan kanꞌ, chaꞌ chkaa neꞌ nu yku kunan tlá ꞌin ―ndukwin Jesús―. Sa ñaꞌan nu mskwen yu ꞌin kunan chkwan kanꞌ kwan, ngwañaꞌan ndiꞌin chaꞌ skwen neꞌ ꞌñaǎn lo wsi, naꞌ nu ndijyaǎn chaꞌ kaǎn nten. 15 Loꞌo nchga nten nu sten chaꞌ ꞌñaǎn, kaja chalyuu suꞌwe ꞌin neꞌ bra kanꞌ, chalyuu nu ja tsaa tii ꞌa ―ndukwin Jesús ꞌin Nicodemo―.

16 ’Suꞌwe ꞌa nka tiye Ndiose ñaꞌan Ni ꞌin nten chalyuu, kanꞌ chaꞌ msuꞌwa Ni ꞌñaǎn, skaǎn tiǎn nu lkaǎn Sñiꞌ Ni chaꞌ ndijyaǎn lo chalyuu, chaꞌ ja tsaa ꞌa nten lo jwlyaa xa nu xñi neꞌ chaꞌ ꞌñaǎn; kaja chalyuu suꞌwe ꞌin neꞌ kanꞌ, chalyuu nu ja tsaa tii ꞌa ―ndukwin Jesús―. 17 Wa msuꞌwa Ni ꞌñaǎn ndijyaǎn lo chalyuu chaꞌ suwiǐn kiꞌya nu ndukwi nten chalyuu. Ja nchka tiꞌ Stiǐn Ndiose chaꞌ xkwiꞌ nan xtya Ni kiꞌya ꞌin nten; ja ndijyaǎn lo chalyuu chaꞌ kuꞌniǐn ngwañaꞌan ―ndukwin Jesús―.

18 ’Ja ta ꞌa Ndiose nu tiꞌí ꞌin nten nu xñi chaꞌ ꞌñaǎn, ni siya wa yꞌni biyaꞌ Ni ꞌin nchga nten nu ja xlyaa xñi chaꞌ ꞌñaǎn; ta Ni nu tiꞌí ꞌin neꞌ kanꞌ, chunꞌ ja mslyaa ꞌa neꞌ tsaa ñaꞌan tiꞌ neꞌ ꞌñaǎn chaꞌ lkaǎn skaǎn tiǎn nu lka Sñiꞌ Ndiose ―ndukwin Jesús―. 19 Wa nda Ndiose xaa ndijyan lo chalyuu, loꞌo ja nxlyaa ꞌa nten chalyuu tyiꞌin seꞌen xaa kanꞌ. Nsuꞌwi ꞌa nten nu ndiya la tiꞌ tyiꞌin seꞌen tla, chaꞌ xaꞌan ꞌa tiye neꞌ kanꞌ; kanꞌ chaꞌ nsuꞌwi kiꞌya nu mstya Ndiose ꞌin neꞌ kanꞌ. 20 Ja nchka tiꞌ nten xaꞌan chaꞌ ta Ndiose xaa nu xuꞌwi niꞌ kasiya ꞌin neꞌ. Tijyuꞌ ti ndaꞌan neꞌ kanꞌ seꞌen ja ñaꞌan Ni ꞌin neꞌ, nxkeꞌ tiꞌ neꞌ, chaꞌ xkwiꞌ chaꞌ kuxi ngiꞌni neꞌ kanꞌ ―ndukwin Jesús―. 21 Nten nu xñi chaꞌ nu nchkwiꞌ Ndiose loꞌo neꞌ, ta Ndiose xaa nu xuꞌwi niꞌ kasiya ꞌin neꞌ kanꞌ. Ndiꞌin neꞌ seꞌen xaa kanꞌ, chaꞌ ka jlyo tiꞌ xka ta nten chaꞌ ngiꞌni neꞌ kanꞌ nchga tñan nu ndlo Ndiose ꞌin neꞌ.

22 Chunꞌ ndiꞌin la ndyaa Jesús, ndyaa yu loꞌo nten nu ngiꞌni xaꞌan chaꞌ ꞌin yu, mdiꞌin neꞌ chinꞌ nde lo yuu ꞌin Judea. Mdukwatya Jesús ꞌin nten la kanꞌ. 23 Loꞌo ndiꞌin Xuwa kwiꞌ seꞌen ti, chaꞌ ti ndukwatya yu ꞌin nten; ndiꞌin yu ska seꞌen naan Enón, kwiꞌ seꞌen ti Salim, seꞌen tlya ꞌa tyiꞌa. Kaꞌan ꞌa nten ndaꞌan neꞌ chaꞌ tukwatya yu ꞌin neꞌ. 24 Ti ji suꞌwa neꞌ ꞌin Xuwa kanꞌ niꞌ ñaꞌan chkwan bra kanꞌ.

25 Loꞌo lye ꞌa nxuun neꞌ judío loꞌo neꞌ nu ngiꞌni xaꞌan chaꞌ ꞌin Xuwa bra kanꞌ; lye nchkwiꞌ neꞌ loꞌo taꞌa neꞌ sa ñaꞌan nu suꞌwe la kuꞌni neꞌ chaꞌ ka luwi kasiya ꞌin neꞌ chaꞌ ꞌin Ndiose. 26 Kanꞌ chaꞌ mdiyan neꞌ seꞌen ndiꞌin Xuwa chaꞌ chkwiꞌ neꞌ loꞌo yu:

―Mstru ―ndukwin neꞌ―, ti kwiꞌ yu nu yaa seꞌen mdiꞌiin xka laꞌa tsuꞌ chku Jordán ti ngwa xkanꞌ, ti kwiꞌ nu ndukwiin chaꞌ ndloo la lka yu, wa ngala yu kanꞌ ndukwatya yu ꞌin nten laꞌa tsuꞌ re ni. Kaꞌan ꞌa nten ndaꞌan seꞌen ndiꞌin yu.

27 Loꞌo mxkwen Xuwa ꞌin neꞌ bra kanꞌ:

―Sa kwa ti tñan ka kuꞌni ska nten, sa ñaꞌan nu nda Ndiose chabiyaꞌ kuꞌni neꞌ ―ndukwin yu―. 28 Wa ynan wan chaꞌ nu niǐn ꞌwan nu ngwa xkanꞌ, chaꞌ ja lkaǎn Krixtu, nten nu tnun nchka nu wa kan ti lo chalyuu. Wa lka tñan ndiya ꞌñaǎn chaꞌ ndla la mdiyaǎn chaꞌ xñiǐn tuwiin seꞌen kan nu lka Krixtu ―ndukwin Xuwa―. 29 Ñaꞌan tiꞌ xa wa mjwi kwilyoꞌo neꞌ, ska ti yu kiꞌyu kanꞌ, kanꞌ nu lka kwilyoꞌo kuxiin; loꞌo taꞌa suꞌwe nsuꞌwi nu kiꞌyu kanꞌ, suꞌwe ꞌa nka tiye yu kunan yu chaꞌ nu nchkwiꞌ yu kanꞌ. Sa ñaꞌan suꞌwe nka tiye taꞌa suꞌwe nsuꞌwi yu ndiꞌin yu xa wa mjwi kwilyoꞌo neꞌ, ngwañaꞌan naꞌ suꞌwe ꞌa nka tiyeěn chaꞌ ñaꞌaǎn ꞌin neꞌ nu nnan chaꞌ nu nduꞌu Jesús ―ndukwin Xuwa―. 30 Kwiꞌ ngwañaꞌan, tiꞌ kwiꞌ yu ka yu tnun la, loꞌo naꞌ ndiꞌin chaꞌ kaǎn nu siyaꞌ la bra kanꞌ.

31 Ndloo la lka Krixtu chaꞌ mdoꞌo yu niꞌ kwan seꞌen ndiꞌin Ndiose, mdiyan yu lo chalyuu bra kanꞌ. Loꞌo Xuwa ni, sñiꞌ ska nten chalyuu ngwa yu kanꞌ; ndukwa naꞌan tyi yu lo chalyuu. Kwiꞌ ñaꞌan nchkwiꞌ yu, sa ñaꞌan nu nchkwiꞌ nten ti. Nu lka Jesucristo ni, mdoꞌo yu niꞌ kwan seꞌen ndiꞌin Ndiose, ndloo la ti yu kanꞌ; 32 mduꞌu yu chaꞌ nu ñi ꞌñaan, chaꞌ ꞌin nchga nan nu wa naꞌan yu, nchga chaꞌ nu wa ynan yu la kanꞌ. Loꞌo ja xlyaa ꞌa nten xñi neꞌ chaꞌ nu nchkwiꞌ yu. 33 Bra nu xñian chaꞌ nu nchkwiꞌ Jesús, kanꞌ katsaanꞌ ꞌin taꞌaan chaꞌ ñi ꞌa chaꞌ nu nchkwiꞌ Ndiose loꞌoan. 34 Wa msuꞌwa Ndiose ꞌin Jesucristo ndijyan yu lo chalyuu, loꞌo xkwiꞌ chaꞌ ꞌin Ndiose nchkwiꞌ yu loꞌoan chabiyaꞌ ꞌin Tyiꞌi Ndiose nu nsuꞌwi ꞌin yu. Loꞌo Ndiose ni, ja tsaa tii ꞌa chaꞌ nda Ni Tyiꞌi Ni ꞌin Sñiꞌ Ni. 35 Ndiya ꞌa tiꞌ Ndiose Sti yu ñaꞌan Ni ꞌin Sñiꞌ, ti kwiꞌ Jesús kanꞌ; loꞌo nchga chabiyaꞌ nu ndiya yaꞌ Ndiose, msuꞌwa Ni ꞌin Sñiꞌ Ni chaꞌ ndijyan yu. 36 Bra nu xñi nten chaꞌ ꞌin Jesús, chaꞌ nu lka yu Sñiꞌ Ndiose, ja tsaa tii ꞌa chalyuu suꞌwe nu ta Ndiose ꞌin neꞌ kanꞌ. Loꞌo nten nu ja xlyaa tukwa chaꞌ nu nchkwiꞌ Jesús, ja ta ꞌa Ndiose chalyuu suꞌwe kanꞌ ꞌin neꞌ; ndiꞌin chaꞌ lye ta Ni nu tiꞌí ꞌin neꞌ kanꞌ bra kanꞌ.