1 “Emun egkaangken niw en sikan is tanà he ibeǥey keniyu te Nengazen he Megbevayè niw wey niw mepengevilin, ne zutun kew en he meǥinged, 2 itaǥù niw ziyà te revan is egkehuna he egkeraǥun niw. Ne uwita niw heini ziyà te lugar he ebpilien te Nengazen he Megbevayè niw he zutun sikandin ebeǥayi te zengeg. 3 Ne hendiyè kew te memumuhat he ebaal te vuluhaten dutun he timpu, ne kaǥi kew ziyà te kandin te, ‘Heini zed is halad ku he tuus te kegkilelaa ku he is Nengazen he Megbevayè tew iyan mid-uwit kedì kayi te tanà he impenangdù din diyà te menge kepuun tew he ibeǥey kenitew.’

4 “Ne zutun egkuwaan duen te memumuhat sikan is revan diyà te keniyu ne idsavuk din diyà te etuvangan te pemuhatà he para te Nengazen he Megbevayè niw. 5 Ne kaǥi kew ziyà te etuvangan te Nengazen he Megbevayè niw te: ‘Is kepuun dey he si Jacob, sevaha he Aramihanen he wazà dengan netendek he ubpeey zin. Midhendiyà sikandin te Ehipto ne mid-ubpà diyà duma te pemilya zin. Deisey zà sikandan dengan, piru te huziyan he timpu mibmahabet sikandan, midekelè dan, ne nehimu zan he mekeǥeǥehem he nasyun. 6 Mibpesipelahan key te menge Ehiptohanen. Impaantus key zan ne mibpeǥes key zan te kedterebahu. 7 Ne mibuyù key te tavang diyà te Nengazen, he Megbevayà te menge kepuun dey, ne mibpemineg key zin. Neehè din is ked-antus dey, kegkeveley zey, wey is kedluplupiǥa kenami. 8 Umbe, migkuwa key te Nengazen diyà te Ehipto pinaaǥi te zekelà he ǥehem din wey mekahandekhandek he menge vaal. Mibaal sikandin te menge singyal wey menge egkein-inuwan he menge vaal. 9 Ne mid-uwit key zin kayi he lugar, ne imbeǥey zin kenami heini is meupiya wey selebpeten he tanà. 10 Umbe, ed-uwiten dey ziyà te kenikew, Nengazen, is egkehuna egkeraraǥun dey te sebpet te tanà he imbeǥey nu kenami.’ Ne emun egkepasad niw en heeyan te egkaǥi, ne isavuk niw sikan is revan diyà te etuvangan te Nengazen he Megbevayè niw, ne ezapa niw sikandin. 11 Ne medlipey kew tenged te meupiya he menge vutang he ibeǥey keniyu te Nengazen he Megbevayè niw wey ziyà te pemilya niw. Dumaha niw te kedsilibra is menge Levihanen wey is kenà menge Israilihanen he zuma niw he meǥinged.

12 “Kada iketelu he tuig iveǥey niw is ikepulù te menge abut niw ziyà te menge Levihanen, diyà te kenà menge Israilihanen, diyà te menge ilu, wey menge valu he vahi, su para kenà megkurang is keenen dan. 13 Ne kaǥi kew ziyà te etuvangan te Nengazen he Megbevayè niw te: ‘Migkuwa ku en puun te valey ku is segradu he vahin he iyan is ikepulù, ne imbeǥey ku ziyà te menge Levihanen, diyà te kenà menge Israilihanen, diyà te menge ilu, wey te menge valu he vahi su iyan heini insuǥù nu kenami. Wazè ku repasa wey lipati is minsan sevaha zuen te menge suǥù nu. 14 Wazè ku heini keena zutun te timpu te kedlalew ku; wazè ku heini kevuta hein ed-isipen a he meremerik; wey wazè ku heini ipemuhat diyà te minatey. He Nengazen he Megbevayè ku, mibpezumazuma a kenikew. Mibeelan ku is langun he insuǥù nu kenami. 15 Seǥipaa key kenikew puun diyan te segradu he ubpeey nu ziyan te langit, ne tuvazi nu is menge etew nu he Israilihanen wey is meupiya wey selebpeten he tanà he imbeǥey nu kenami sumalà is impenangdù nu ziyà te menge kepuun dey.’

16 “Edsuǥuen kew ǥuntaan te Nengazen he Megbevayè niw he tumana niw heini is langun he suǥù wey sulunuzen. Purungi niw heini tumana te kedtuman he ebpuun diyà te tivuuk he gehinawa niw wey kedsavut niw. 17 Impahayag niw ǥuntaan he iyan is Nengazen Megbevayè niw ne ebpengungubpaan kew te sungkad te menge paaǥi zin, wey edtumanen niw is menge suǥù din wey is imbeǥey zin he menge sulunuzen, ne edsunuzen niw sikandin. 18 Ne impahayag daan te Nengazen ǥuntaan he iyan kew ispisyal he menge etew zin sumalà is penaad din, ne kinahanglan he edtumanen niw is langun he menge suǥù din. 19 Ne sumalà is penaad din, edhimuwen kew zin he lavew te langun he menge nasyun, ne edeliǥen kew wey ebeǥayan kew te dengeg. Egkehimu kew he menge etew he pinilì te Nengazen he Megbevayè niw.”