1 Hein diyè pa si Jeremias te mibpirisuwan kandin he ubpeey te menge vantey te turuǥan, migkaǥi is Nengazen diyà te kandin te ikezuwa. 2 Iyan heini migkaǥi te Nengazen he midlimbag wey mibpelastar te kelibutan. Iyan sikandin mibpurma kayi, ne Nengazen is ngazan din:

3 “Umawa a kenikew su edtevangan ku sikew. Ne ibpezayag ku ziyà te kenikew is egkengein-inuwan wey in-eles he wazè nu pa metueni. 4 Iyan heini migkaǥi te Nengazen he Megbevayà te Israel vahin te menge valey kayi he inged wey te turuǥan te hadì he impenrundus niw, su wey niw mekuwa zutun is menge himan he ebeelan niw he pengalang te edsurung he menge kuntada niw, 5 edsurung gihapun is menge tig-Babilonia ne ebpenuen dan heini te ebpemematey he ebpenhimetayan ku tenged te utew ku kegkepauk. Idselikwey ku heini he inged tenged te utew subra is kelelalung te menge etew kayi.

6 “Piru egkeuma is timpu he ebpurungan ku heini he inged wey is menge meǥinged kayi. Ne ebpekepengungubpaan sikandan he meuswaǥen wey melinawen. 7 Ibpelikù ku is menge tig-Israel wey menge tig-Juda ziyà te tanè dan, ne ed-umanan ku ebenguna is menge inged dan iring te nehuna he timpu. 8 Edlumpiyuwan ku sikandan wey ebpeseyluwen te langun he menge salè dan kayi te kediey. 9 Emun egkeuleule en heini, ne ebeǥey kedì te zengeg is inged he Jerusalem, ne egkelipey a wey edeliǥen a, ne is menge etew ziyà te menge nasyun kayi te kelibutan ebpengerkeren te kegkahandek dan emun egkezineg dan is meupiya he ebeelan ku keuzemà kayi he inged, ragkes is kebpeuswag wey kebeǥayi ku kayi te kelinew.”

10 Mibpedayun megkaǥi is Nengazen te, “Migkaǥi kew te mekevulungbulung wey wazà menge etew wey menge langgam diyà te Juda wey Jerusalem. Piru ziyà te huziyan he timpu egkezineg en maan kayi he lugar 11 is kedlipey wey keguǥusà. Egkezineg is kebpeeyuwà te beuǥu, wey is kedlipey te ebpemen-uwit te menge pemuhat diyà te valey te Nengazen he para te kebpeselamat. Egkaǥi zan te, ‘Ebpeselamat kiw te Nengazen he Mekeǥeǥehem, su meupiya sikandin. Wazà pidtemanan te ǥaǥew zin.’ Edlipey is menge etew su idlikù ku is meupiya he kebpekesavuk dan kayi he tanà iring te kebpekesavuk dan dengan. Iyan a, is Nengazen, is migkaǥi kayi.”

12 Migkaǥi pa is Nengazen he Mekeǥeǥehem te, “Kayi te mekevulungbulung he tanà guntaan, ne wazè en duen menge etew wey menge langgam, iyan diyà te huziyan he timpu duen en maan menge penebtavà diyà te langun he menge inged kayi he zutun ed-uwita te menge vantey te menge kerehidu is menge kerehidu zan. 13 Dutun ebmahabet en maan is menge uyaǥen dan diyà te menge inged he ziyà te menge vuvungan, diyà te menge mibuntud-buntud diyà te edsenlepan, diyà te Negev, diyà te menge tanà ni Benjamin, diyà te zezeisey he menge inged he nekeelingkus te Jerusalem, wey ziyà te menge inged diyà te Juda. Iyan a, is Nengazen, is migkaǥi kayi.”

14 Migkaǥi pa is Nengazen te, “Egkeuma is timpu he edtumanen ku is meupiya he insaad ku te menge etew ziyà te Israel wey Juda. 15 Dutun he timpu iyan ku ibpezumala is metazeng he hadì he kevuwazan ni David. Ne ebeelan din is metazeng wey hustu kayi te tivuuk he tanà. 16 Dutun daan he timpu egkelibri is menge tig-Juda ne ebpengungubpaan he melinawen is menge tig-Jerusalem. Is Jerusalem egngezanan te, ‘Nengazen is Mibeǥey Kenitew te Ketazeng.’ ”

17 Mibpedayun megkaǥi is Nengazen te, “Layun duen kevuwazan ni David he edhadì te menge etew te Israel. 18 Wey layun daan duen menge memumuhat he menge kevuwazan ni Levi he ebpenilbi kedì wey ebpemuhat te menge pemuhat he edtutungen, menge pemuhat he para gasa, wey zuma pa he menge pemuhat.”

19 Ne migkaǥi is Nengazen diyà te ki Jeremias, 20 “Nekid-uyun a te maandew wey mezukilem he medlepew sikandan te hustu he timpu, ne heini he uyun kenè en egkahalin. 21 Ne iring daan keniyan is kebpekid-uyun ku ki David he suluǥuen ku, he iyan is layun din duen kevuwazan he egkehimu he hadì. Ne iring din daan is menge memumuhat he kevuwazan ni Levi ebpenilbi ǥihapun sikandan kediey. 22 Ibpemahabet ku is menge kevuwazan ni David he suluǥuen ku wey ni Levi he iring kahabet te menge vituen diyà te langit wey pantad diyà te veyvey te zaǥat he kenà egkevilang.”

23 Migkaǥi pa is Nengazen diyà te ki Jeremias te, 24 “Wazè nu ve mezineg is migkaǥi te menge etew mehitenged te menge etew ku? Migkaǥi sikandan te, ‘Inselikwey te Nengazen is dezuwa he ginhedian he mibpilì din.’ Umbe midsudì dan is menge etew ku ne wazè dan en heini isipa he sevaha he nasyun. 25 Piru migkaǥi a te iring te kenà egkahalin is kebpekid-uyun ku te maandew wey mezukilem wey is belaud ku he para te minsan hengkey he linimbag ku diyà te langit wey tanà, 26 kenà daan egkahalin is kebpekid-uyun ku te menge kevuwazan ni Jacob wey ki David he suluǥuen ku. Ebpilì a puun diyà te menge kevuwazan ni David te edhadì te menge kevuwazan ni Abraham, ki Isaac, wey ki Jacob. Egkehizuwan ku is menge etew ku ne idlikù ku sikandan diyà te tanè dan wey ziyà te meupiya he kebpekesavuk dan.”