1 Benar iyan, egkehizuwan te Nengazen is menge tig-Israel ne ed-umanan din sikandan ebpilia he menge etew zin. Ne ibpeuman din sikandan ibpeubpà diyà te keugelingen dan he tanà, ne zuen menge lumelengyawà he ed-ubpà duma kandan. 2 Edtevangan te zuma he menge nasyun is Israel su para mekelikù is menge Israilihanen diyà te tanà he imbeǥey kandan te Nengazen. Ne zutun egkehimu he uripen dan is ebpemuun diyà te zuma he menge nasyun. Egkengevihag dan is mibihag dengan kandan, ne edhimuwen dan he menge sakup dan is midaagdaag kandan.

3 Sikiyu is menge tig-Israel, dutun te timpu te kebpehimelaya keniyu te Nengazen te menge ked-antus, kelised, wey kegkeuripen, 4 ne un-undaha niw is hadì te Babilonia. Ne iyan heini keǥiya niw:

“Nezeetan en is hadì he ebpendaagdaag. Netapus en is kebpegalbu zin. 5 In-awà te Nengazen is gehem te lalung he menge pengulu, 6 he tenged te pauk dan wazà sikandan med-engked he ebpaantus te menge etew wey utew zan mibpesipelahi is menge etew ziyà te menge inged he nelupig dan. 7 Ne kayi te huziyan he timpu, melinawen en is tivuuk he kelibutan, ne egkezineg en kayi is kanta te kegkelipey. 8 Minsan is menge kayu he sipris wey sidru ziyà te Lebanon nengelipey tenged te nehitavù duen te hadì. Henduen be sikandan te etew he egkaǥi te, ‘Guntaan te naawè ke en wazè en human ebpiley kenami!’

9 “Is lugar te menge minatey edtaǥad kenikew he egkeǥalew; nengandam en heini te kesinuǥung kenikew. Is menge ǥimukud te menge etew he menge gemhanan dengan kayi te kelibutan, utew egkegalew kenikew. Nemenhitindeg puun te pinuuwà is menge ǥimukud te menge hadì su edsinuǥungen ke zan. 10 Egkaǥi sikandan te: ‘Meǥuyè ke en guntaan iring kenami. Neked-iiring kiw en. 11 Guntaan te minatey ke en, ne naawè en is kegkemekeǥeǥehem nu zuma te zaǥing te alpa he mibeǥey kenikew te zengeg. Menge tagkey is hizeǥaan nu ne menge tagkey zaan is malung nu.’

12 “Neulug ka puun te langit is egngezanan te Mekevugwas. Intimbag ka ziyà te tanè, is nendezaat te menge nasyun. 13 Migkaǥi ka ziyà te ǥehinawa nu te, ‘Ebpemenahik a ziyà te langit, ne idsavuk ku is pinuuwè ku te kedhadì diyà te zivavew te menge vituen te Megbevayà. Ebpinuu a ziyà te zivavew te vuntud he ziyà te zizaya he zutun edtiǥuman is menge ed-ezapen. 14 Ebpemenahik a ziyà te zivavew te menge ǥapun; ne edrepeng a te Utew Lavew he Megbevayà.’

15 “Piru ziyè ka uwita te lugar te menge minatey he ziyà te kinezizeleman te vudsi. 16 Edtengtengan ka te menge minatey ne egkaǥi sikandan te, ‘Kenè be iyan heini sikan is etew he igkikinehendekà te menge etew ziyà te kelibutan wey mibpelihandek din is menge ginhedian? 17 Kenè be iyan sikandin kes mibengkag te menge inged wey midhimu te kelibutan he iring te disirtu, wey wazè din engkezi te ed-uripen is mibihag din?’

18 “Is langun he menge hadì kayi te kelibutan duen dengeg te kebpelestara kandan diyà te menge leveng dan. 19 Iyan, sikew mulà, kenè ka idleveng diyà te penlevengè nu, kekenà, idtimbag dà is lawa nu iring te subpang he wazè din pulus. Iyan idtambun kenikew is menge lawa te nemematey he menge sundaru tenged te tebek, ne id-ulug ka zuma kandan diyà te vudsi ne edtembakan te menge vatu. Egkeiring ka te minatey he edtekutakan dà. 20 Kenè ka idleveng iring te zuma he menge hadì, su midezeetan nu is nasyun nu ne mibpenhimetayan nu is menge etew nu. Wazà egkesamà he uuyag diyà te mezaat he pemilya nu.

21 “Endama is lugar he zutun edhimetayi is menge anak din tenged te menge salà te menge kepuun dan! Kenè en sikandan dait he ed-angken te menge tanà etawa ebangun te zezekelà he menge inged diyà te tivuuk he kelibutan.”

22 Migkaǥi is Nengazen he Mekeǥeǥehem te, “Edsurungen ku wey edezeetan ku is Babilonia. Wazà edsemaan ku he uuyag dutun he lugar. Wazà egkesamà te menge kevuwazan dan. 23 Edhimuwen ku heini he sibsivayan he mahabet is menge linew zuen. Edezeetan ku heini, ne is kedezeeti ku kayi, iring te ebpeyupasen ku is menge meǥinged kayi. Iyan a, is Nengazen he Mekeǥeǥehem, migkaǥi kayi.”

24 Utew meheǥet is kegkeǥiya te Nengazen he Mekeǥeǥehem te, “Siguradu he egketuman is pelanu ku wey ketuyuan ku. 25 Edezeetan ku is menge tig-Asiria emun diyà sikandan te Israel he tanè ku. Edtekutakan ku sikandan diyà te menge vuvungan ku. Ne kenè dan en uripen is menge etew ku. 26 Iyan heini pelanu ku para te tivuuk he kelibutan. Iyan heini silut he ibpeehè ku ziyà te langun he menge nasyun.” 27 Wazà ebpekehimu he edhalin te pelanu te Nengazen he Mekeǥeǥehem. Wazà ebpekeeǥen kandin emun edsilut.

28 Heini he menge lalag impahayag te Megbevayà hein tuig te kebpatey ni Hadì Ahaz:

29 Sikiyu is menge Filistihanen, kenè kew lipey tenged te kebpatey zuen te hadì he midsurung keniyu. Su is anak din he ebpekeilis kandin edhuna pa he ebpekezezaat kenà sikandin, iring sikandin te uled he minatey he nekaanak te edlayang he uled he edhuna pa he edhereg. 30 Is menge etew ku he menge pubri ed-elimahan ku wey ibpehimeley he wazà edhilavet kandan. Piru sikiyu is menge Filistihanen, ebpenhimetayan ku is menge kevuwazan niw pinaaǥi te vitil. Ne is egkesamà kandan ebpenhimetayan ku gihapun. 31 Lelendag kew is menge meǥinged diyà te menge inged he sakup te Filistia. Su zuen edsurung keniyu he iring te evel he ebpuun diyà te zizaya ne pudu sikandan memevurut.

32 Hengkey is idtavak tew te menge menunudtulà he ebpuun te Filistia? Egkeǥiyan tew sikandan te, “Is Nengazen iyan mibangun te Jerusalem, ne dengepà heini te menge etew zin he nengerasey.”