1 Duen utew mekempet he anak he raǥa ni David he egngezanan ki Tamar, he suled ni Absalom. Si Amnon ne suled ni Tamar ziyà te amey, ne mibmahal ni Amnon si Tamar. 2 Piru kenè din egkehimu is egkesuatan din he ebeelan diyà te ki Tamar su raǥa pa si Tamar ne zuen layun ebantey kandin. Ne tenged dutun midsiveysivey sikandin, ne hein neuǥet ne midezaru sikandin.

3 Duen elukuy ni Amnon he metau he edseligkep he iyan is id-aǥew zin he si Jonadab. Anak sikandin te suled ni David he si Simea. 4 Ne sevaha he andew, mid-insaan din si Amnon te, “Anak ka te hadì, maan is kada andew egkeehè ku sikew he henduen te meluya ka? Keǥiya nu kedì ke hengkey is igkeseeng nu.” Midtavak si Amnon te, “Egkesuatan ku si Tamar, is hazi ni Absalom te suled ku ziyà te amey.” 5 Migkaǥi si Jonadab te, “Hizeǥè ka, wey ka mebpezezaru. Ne emun edlauy kenikew is amey nu ne keǥiyi nu sikandin he tuǥuti zin si Tamar he medhendiyà te kenikew, he iyan ebpekaan kenikew. Keǥiyi nu sikandin he egkesuatan nu he egkeehè nu si Tamar he iyan ed-andam te keenen nu zutun te uvey nu he iyan edsungit kenikew.”

6 Umbe, midhidhizeǥà si Amnon he ebpezezaru. Hein midlauy sikandin ni Hadì David, migkaǥi sikandin te, “Egkesuatan ku pezem he medhengkayi is etevey ku he si Tamar wey mekevaal te supas kayi te uvey ku, ne egkepasad ne sungite e zin.” 7 Ne midsuǥù si David he ebpekeǥiyan si Tamar ziyà te valey te hadì he medhendiyà sikandin te meemahan din he si Amnon su iyan sikandin ibpevaal te keenen para kandin.

8 Midhendiyà si Tamar te valey te meemahan din he si Amnon, ne zutun neehè din he edhidhizeǥà. Ne migkuwa sikandin te herina, ne mibmasa zin heini, ne zutun din lutua te uvey ni Amnon. 9 Hein nelutù en haazà, ne migkuwa zin heini su ibpekaan din ki Amnon, piru kenà egkaan si Amnon. Migkaǥi si Amnon te, “Ipeǥawas is langun he menge etew kayi!” Dutun nenggawas is menge etew. 10 Ne migkeǥiyan ni Amnon si Tamar te, “Uwita nu heeyan is keenen kayi te uvey ku ne sungita a.” Ne mid-uwit ni Tamar haazà is keenen dutun te ki Amnon. 11 Piru zutun te edsungiten din en si Amnon ne migkepkepan ni Amnon sikandin ne migkeǥiyan din te ebpehulizè dan.

12 Migkeǥiyan ni Tamar sikandin te, “Kenà a leyuǥa! Telesuled ki! Kenè nu veeli heini is mekeeled-eled he vaal kayi te kedì. Kenà heini engayan he egkeulaula kayi te Israel. 13 Hengkey en buwa he paras is igkeetuvang ku te menge etew? Minsan sikew, buneg is igngazan kenikew kayi te Israel. Hengyua nu is amey ta mehitenged kayi; siguru he ebpemineǥen ke zin ke ebpengesawa ka kedì.”

14 Piru wazà mebpemineg is Amnon kandin, ne tenged te mezesen si Amnon ki Tamar ne midlayug din sikandin. 15 Ne zutun, utew nepauk si Amnon kandin, su is utew zin kegkepauk kandin lavew pa te kebmahala zin kandin dutun te nehuna he timpu. Migkeǥiyan ni Amnon sikandin te, “Enew ka wey megawas!” 16 Midtavak si Tamar te, “Kenà a egawas! Lavew pa utew he zekelà he salè nu is kedsegseǥa nu kedì kenà heini is mid-ulaula nu kedì.” Piru wazà haazà pemineǥa ni Amnon. 17 Kekenà, mid-umew zin is suluǥuen din ne migkeǥiyan din te, “Ipeǥawas niw heini he vahi ne lekevi niw is gemawan.”

18 Umbe, impeǥawas dutun si Tamar te suluǥuen ne midlekevan is gemawan. Ne zutun migkukumbalà si Tamar te meupiya he visti wey melayat su iyan haazà neleyaman he ibivisti te raǥa he anak te hadì te haazà he timpu. 19 Iyan mid-ulaula ni Tamar zutun is, mibindas din haazà is meupiya he visti wey melayat, ne mibukbukan din is ulu zin te avu. Ne midhipanew is edsinsineǥew ne mid-elangan din te velad din is dagwey zin.

20 Ne naahà sikandin te kakey zin he si Absalom ne mid-insaan din, “Duen be mezaat he mibeelan kenikew ni Amnon? Kenè nu heini tudtula ziyà te zuma, su telesuled kew ziyà te amey. Kenè nu itaǥù diyà te isip nu is neulaula kenikew.” Ne zutun diyà med-ubpà si Tamar te valey te kakey zin he si Absalom, ne layun dà sikandin edsebsevaha is edlalew.

21 Hein netuenan ni Hadì David is neulaula, utew sikandin nepauk. 22 Ne si Absalom, egkeepesan din utew si Amnon su mibpeel-elezan ni Amnon is etevey zin he si Tamar. Tenged kayi, kenè en sikandin ebpekidlalag ki Amnon.

23 Midlavey zutun is dezuwa he tuig, hein ebpeelutan ni Absalom is menge kerehidu zin diyà te Baal Hazor, uvey te Efraim, mid-imbitar zin is langun he anak te hadì te kedtelavuk dutun. 24 Midhendiyà sikandin te ki Hadì David he egkaǥi te, “Ebpeelutan ku is menge kerehidu ku. Edhendiyè ke ve wey is menge upisyal nu te kedtelavuk kayi he kevurunan?” 25 Midtavak kes hadì te, “Kenè en, mama, su egkeǥestuwan ke zà ke edtelavuk key is langun.” Ne midteǥel sikandin ni Absalom, piru kenà iyan ebpehendiyà. Mibpenubtuvazan din dà si Absalom. 26 Migkaǥi si Absalom te, “Emun kenè ka, ne si Amnon dà nasì he suled ku is ipehendiyè nu.” Mid-insà is hadì te, “Maan is utew nu egkinehenglana he ibpehendiyà?” 27 Piru midteǥel iyan si Absalom, ne impezume en nasì ni David si Amnon, wey kes duma he menge anak din he maama.

28 Migkeǥiyan ni Absalom is menge sakup din te, “Teǥazi niw ke egkelangut si Amnon, ne emun edsinyas a, ne himetayi niw en sikandin. Kenè kew mahandek; su iyan a midsuǥù keniyu. Pekezesen kew wey pekevurut kew.” 29 Ne zutun midhimetayan te menge sakup ni Absalom si Amnon su insuǥù din. Ne nen-untud is duma he menge anak he maama ni David te menge kudè dan ne nemelaǥuy zan. 30 Hein ed-ulì dan en diyà te Jerusalem, duen neketudtul ki David he mibpenhimetayan ni Absalom is langun he menge anak din he maama ne wazà nesamà. 31 Midhitindeg si David ne mibindas din is kumbalè din su impeehè din he utew sikandin neseeng, ne midlangkeb diyà te tanà. Mibpemindas daan te menge suluǥuen din is menge kumbalè dan ne midhitindeg dan dà mulà. 32 Piru migkaǥi si Jonadab he anak te suled ni David he si Simea, “Mahal he Hadì, wazà mepatey is langun he menge anak nu he maama, kekenà, iyan dà si Amnon. Neuǥet dà he duen planu ni Absalom te kedhimetayi zin ki Amnon puun dà dutun te andew te kedleyuǥa ni Amnon te suled din he si Tamar. 33 Kenè nu ikeseeng is tudtul he nengepatey is langun he menge anak nu he maama. Iyan dà si Amnon minatey. 34 Ne si Absalom, ne mibpelaǥuy sikandin.”

Dutun he timpu is ebantey zuen te verengbeng te Jerusalem duen din naahà he utew mezakel he menge etew he ebpelingguma he ziyà mebayà te zivaluy he kilid te vuvungan. Midhendiyà te hadì haazà is ebantey ne nenudtul te, “Duen ku naahà he menge etew ziyà te zalan te Horonaim he ebpeleǥidlid te vuvungan.” 35 Migkeǥiyan ni Jonadab is hadì te, “Mahal he Hadì, ahaa nu! Heeyan en kes menge anak nu he menge maama, he iyan migkaǥi ku geina.” 36 Nepasad dutun is kegkeǥiyi zin ki David nekeuma kes menge anak ni David he ebpemenineǥew. Ne midsineǥew zaan si David wey langun he menge sakup din. 37-38 Midlalew si David te meluǥayad he timpu tenged te anak din he si Amnon.

Hein mibpelaǥuy en si Absalom, midhendiyà sikandin te hadì te Geshur he si Talmai, he anak ni Amihud. Diyà sikandin med-ubpà seled te tetelu he tuig. 39 Hein malù en neulii si Hadì David te kegkeseeng din te kegkepatey ki Amnon, ne ebulungen sikandin ki Absalom.