1 Mibpehitindeg si David te menge bilding para te keugelingen din diyà te Jerusalem he egngezanan te Inged ni David. Mibpevaal zaan sikandin te tulda para te Kavan te Kebpekid-uyun te Megbevayà. Ne impelastar zin diyà te lugar he in-andam din para kayi. 2 Migkaǥi si David, “Wazà minsan hentei he ebpekeuwit te Kavan te Kebpekid-uyun te Megbevayà gawas te menge Levihanen, su iyan sikandan mibpilì te Nengazen he ibpeuwit te Kavan te Nengazen wey ebpenilbi ziyà te etuvangan din taman te taman.”

3 Miburunburun ni David is langun he menge Israilihanen diyà te Jerusalem te ked-uwit duen te Kavan te Nengazen diyà te lugar he inteǥana zin para kayi. 4 Impetawag din daan is menge memumuhat wey is menge Levihanen, he iyan heini kezakel zan:

5 Is ebpuun te menge kevuwazan ni Kora, 120, ne iyan pengulu zutun si Uriel.

6 Is ebpuun te menge kevuwazan ni Merari, 220, ne iyan pengulu zutun si Asaya.

7 Is ebpuun te kevuwazan ni Gershon, 130, ne iyan pengulu zutun si Joel.

8 Is ebpuun te kevuwazan ni Elizafan, 200, ne iyan pengulu zutun si Shemaya.

9 Is ebpuun te kevuwazan ni Hebron, 80, ne iyan pengulu zutun si Eliel.

10 Is ebpuun te kevuwazan ni Uziel, 112, ne iyan pengulu zutun si Aminadab.

11 Ne impetawag ni David si Zadok wey si Abiatar he menge memumuhat, wey is menge Levihanen he si Uriel, Asaya, Joel, Shemaya, Eliel, wey si Aminadab. 12 Migkeǥiyan din sikandan te, “Iyan kew menge pengulu te menge pemilya te menge kevuwazan ni Levi. Mebpekelumpiyu kew wey is menge iring niw he menge kevuwazan ni Levi, para egkeuwit niw kes Kavan te Nengazen he Megbevayà te Israel, diyà te lugar he inteǥana ku para kayi. 13 Tenged te kenè kew iyan kes mid-uwit dutun te Kavan te Kebpekid-uyun te nehuna he timpu, midsilutan kiw te Nengazen he Megbevayè tew tenged te kegkepauk din. Wazè kiw mebpenginginsà te Nengazen ke ebmenmenuwen tew heini te ed-uwit te hustu he paaǥi.”

14 Ne zutun mibpekelumpiyu haazà is menge memumuhat wey kes menge Levihanen para meuwit dan kes Kavan te Nengazen he Megbevayà te Israel. 15 Mibinting te menge Levihanen haazà is Kavan te Kebpekid-uyun te Megbevayà sumalà te insuǥù te Nengazen ki Moises.

16 Midsuǥù ni David is menge pengulu te menge Levihanen te kebpilì te menge perekanta he ebpuun ded te iring dan he menge Levihanen, te kegkanta te menge kanta he ebpekelipey he eduyuǥan te menge lira, alpa, wey menge simbal. 17 Umbe, mibpilì te menge Levihanen si Heman he anak ni Joel, si Asaf he anak ni Berekia, wey si Etam he anak ni Kushaya he kevuwazan ni Merari. 18 Is mibpilì dan he ed-uǥup kandan ne iyan is menge kezuzumahi zan ded he iyan ensi Zacarias, Jaaziel, Shemiramot, Jehiel, Uni, Eliab, Benaya, Maasea, Matitia, Elifelehu, Miknea, wey is menge ebantey te ǥemawan te Tulda he iyan si Obed Edom wey si Jiel. 19 Is midseriǥan te kedtukar zutun te menge brunsi he simbal ne iyan si Heman, Asaf, wey si Etan. 20 Ne is midseriǥan te kedtukar te menge lira he ebpekezeǥingen iyan ensi Zacarias, Aziel, Shemiramot, Jehiel, Uni, Eliab, Maasea, wey si Benaya. 21 Ne is midseriǥan te kedtukar te menge alpa te menaney iyan ensi si Matitia, Elifelehu, Miknea, Obed Edom, Jiel, wey si Azazia. 22 Is midseriǥan he ebpengulu te kegkanta iyan si Kenania he pengulu te Levihanen, su metau sikandin he egkanta. 23 Ne is midseriǥan te kebantey zuen te Kavan te Kebpekid-uyun te Nengazen ne iyan si Berekia wey si Elkana. 24 Ne is midseriǥan te kebpezaǥing te trumpita zutun te etuvangan te Kavan te Kebpekid-uyun te Megbevayà he menge memumuhat ne iyan ensi Shebania, Joshafat, Netanel, Amasai, Zacarias, Benaya, wey si Eliezer. Si Obed Edom wey si Jehia iyan daan ebantey zutun te Kavan te Kebpekid-uyun.

25 Umbe, melipayen he midhendiyà si David wey is menge sineriǥan te Israel, wey is menge peremandar te menge linibu he menge sundaru diyà te valey ni Obed Edom te kegkuwa te Kavan te Kebpekid-uyun te Nengazen. 26 Ne tenged te midtevangan te Megbevayà is menge Levihanen te ked-uwita zan dutun te Kavan te Kebpekid-uyun te Nengazen, mibpemuhat dan te pitu he tudu he vaka wey pitu he kerehidu. 27 Ne si David wey is langun he menge Levihanen he mid-uwit dutun te Kavan te Kebpekid-uyun te Nengazen wey is menge perekanta, wey si Kenania he iyan midseriǥan he ibpepengulu te kegkanta, mibivisti zan pudu te linu. Migkukumbalà daan si David te ipud he linu. 28 Umbe, mid-uwit te langun he menge Israilihanen kes Kavan te Kebpekid-uyun te Nengazen duma is ked-ugyab, kebpezaǥing te menge trumpita, menge vudyung, wey menge simbal wey kedtukar te menge lira wey menge alpa.

29 Hein idseled dan en haazà is Kavan te Kebpekid-uyun te Nengazen dutun te Inged ni David, mibpantew si Mical he anak ni Saul ziyà te bintanà. Ne neehè din si Hadì David is edsayew te kegkelipey zin, ne neepesan din.