1 Dutun he timpu, nekidtebek is menge Filistihanen te menge Israilihanen diyà te Buntud he Gilboa. Mezakel is nemematey te menge Israilihanen, ne is duma ne mememelaǥuy. 2 Ne midal-as te menge Filistihanen si Saul wey is menge anak din he maama, ne midhimetayan dan is anak din he si Jonatan, Abinadab, wey si Malkishua. 3 Utew meinit is tebek eni Saul wey menge Filistihanen. Neigù si Saul te panà ne nepelian. 4 Migkeǥiyan ni Saul is tig-uwit te ǥumaan din te, “Hulevuta nu heeyan is ispada nu wey a himatayi, su emun kenà, ne iyan is wazà mekekilala te Megbevayà edhimatey kedì, ne ed-un-undahan e zan.” Piru nahandek haazà is tig-uwit te ǥumaan din he edhimatey kandin, ne zutun migkuwa ni Saul kes ispada zin, ne midsundang din is lawa zin.

5 Hein naahà dutun te tig-uwit te ǥumaan din he minatey en, mid-uney zin daan sundanga is lawa zin te ispada zin, ne minatey zaan sikandin. 6 Umbe, minatey si Saul, wey is tetelu he menge anak din he maama, ne wazè en kevuwazan din he nehimu he hadì.

7 Haazà he timpu ne zuen menge Israilihanen he ziyà med-ubpà te menge suǥud te Jezreel. Hein neehè dan he nememelaǥuy is menge sundaru te Israel wey nepatey en si Saul wey kes menge anak din, ne mid-ewaan dan is menge inged dan ne mibpelaǥuy zan daan. Ne midselezan haazà te menge Filistihanen is menge inged ne iyan dan en dutun mid-ubpà.

8 Hein sunud he andew, te nepasad is tebek, midhendiyà is menge Filistihanen te Buntud he Gilboa su egkuwaan dan is menge ǥumaan te menge nengepatey. Neehè dan diyà is minatey he lawa ni Saul wey menge anak din. 9 Migkuwa zan is menge ǥumaan ni Saul ne mibpungelan dan te ulu. Ne zutun midsuǥù dan te menge menunudtulà ziyà te tivuuk he tanà te Filistia he ebpesavut diyà te kandan wey te menge ed-ezapen wey te menge siringan dan te minatey en si Saul. 10 Diyè dan isavuk haazà is menge ǥumaan ni Saul te valey he zutun dan ed-ezapa is menge ledawan, ne zutun dan ivitey is ulu ni Saul te valey he zutun dan ed-ezapa is ledawan he si Dagon.

11 Netuenan te menge tig-Jabesh Gilead is langun he mid-ulaula te menge Filistihanen ki Saul. 12 Umbe, migenat is langun he menge beǥani kandan ne migkuwa zan is lawa ni Saul wey is menge anak din, ne mid-uwit dan heini ziyà te Jabesh. Ne inleveng dan haazà is menge minatey ziyà te zizalem te zekelà he kayu ziyà te Jabesh, ne mibpuasa zan seled te pitu he andew.

13 Minatey si Saul tenged te kenè din kebpezumazuma te Nengazen. Wazè din tumana is suǥù kandin te Nengazen, wey midangep sikandin te menge etew he edsarig te menge mulin-ulin. 14 Diyà pezem sikandin ereg he ebuyù te sambag te Nengazen. Umbe midhimetayan sikandin te Nengazen ne imbeǥey is ginhedian din diyà te ki David he anak ni Jesse.