12
Soŋe wëdahëse mbëɗ gë wahi
Soŋe Asëval a gë fato fa
1 Ga ndëcëk watac, dahëse fëmpëhnahnah sankaf sahnëk ambin hna: asëval yeho ale suɗako ulav, ulepera w̃a wapary hna nkehawo do pënkwako apënkw ahnaw̃ hwëhn wahol pëhw gë vëhi. 2 Ndonkëko do ndekaɗëho ulav ɗonk hnag w̃a.
3 Dahëse haw̃ary mbok cahnëlehn ambin hna: fato vëntah sankaf yeho le hwëhnako vankaf mbëɗ gë vaki gë wamiry ipëhw do gë apënkw ahnaw̃ hnë nkaf-wo-nkaf. 4 Savët lëw̃u ỹa pahëcëko sah ryampo hnë wasah warar wahol wavë g'ambin hna ntoŋi nkal li. Fato fa më kahnëk haryënkw asëval ale ỹaɗ nag ỹa, soŋe kohna fatah fa ge rëk nagi. 5 Asëval a më nagëka facan, fante hnaw̃ëndëhëhni do heryëɗ wayal w̃i fop gë ryoko ryëhwëra. Fatah fa njoyiko taŋ ɗarël W̃ën hna do gë ɗarël tinki unaw̃ ntëw̃u hna. 6 Awa asëval a nkaryëlehn gë wula, ỹëw̃a le pëhwëtëhnëkaw̃o W̃ënu hna, soŋe paɓahna hnam hnë wafac wuli gë wakeme waki gë wafëhw mbëɗ gë ryaw̃ (1,260).
7 Tac nkelehn uw̃ët ambin hna: Misel gë wamëleka wadëw̃u ŋa mëtaryënihaw̃o fato fa. Fato fa umë fëna mëtaryëɗëhëhniw̃o gë wamëleka wadëw̃u ŋa, 8 ɓare fato fa w̃ëkiko, do umë gë wamëleka wadëw̃u ŋa ntayiniho ambin hna. 9 Fato fa ntoŋiko gë për; umë ye lën sër ỹa, le w̃acik Aỹew̃ vahnë ma Sintani, ale rokaɗ ɗuniỹa fop. Ntoŋiko nkal hna, do gë wamëleka wadëw̃u ŋa per.
10 Tac më wëryëɓu kopa sankaf mbin hna, më lehnëɗëho:
«Tame ipeh ŋa do fanka fa
do Inaw̃ W̃ënu fu ŋa
do gë ucankaf Arëhnayik alëw̃u ỹa tëkik!
Fato fa, ale hnësëɗëho wameh vëỹënta fu va
haryënkw W̃ën fu
g'anent gë g'umëɗ, ntoŋiko ntayiko ambin.
11 Do vëỹënta fu va mëkëniha
gë sat Fape fa
do gë wanës W̃ën wante ceɗeyahnëɗëhni ŋa;
vëw̃ëỹëryalohna njëɗahnëni uwám walëw̃ hni w̃a, këbënaniho soŋe cëmëni.
12 Soŋe umë ye natëryiỹi, ambin,
do gë w̃uhnë vële lëɗëk hnam va!
Kata yehu w̃uhnë, nkal gë wov,
kaɓi Sintani cëlëryik ɗarël hun.
Antavëka ɗus
kaɓi njëtëk wati le nkoryaryëk ỹa ƴaɓëna.»
13 Fato fa, ga kamahnëk ntoŋiko g'inkal, më tëfëlendëha asëval ale hnagëkawo facan fa. 14 Ɓare asëval a më njëɗayik vampaw̃ jaro cankaf va soŋe matahn nji gë wula ỹëw̃a le pëhwëtanëhnik hna, hn'ile paɓëɗehna wabëhn watar gë fagant bëhn, ŋaw̃ët lën* 12.14 Lën w̃acik fëna fato ma Sintani. rac. 15 Awa lën ỹa më nkurëk w̃ënka wante ye had garyëla hamëhni asëval a, soŋe w̃ënka ŋa njohna. 16 Ɓare nkal ŋa ndemakawo asëval a; piɗëtako do kohn sën le nkurëko fato fa. 17 Fato fa ntavëkawo ɗus g'asëval a, do më njik mëtaryëhni vutah vuñëntaw̃ vumba asëval va, vële w̃aw̃ëhnëɗ vakwëɗa W̃ën do seɗeyahnëɗëha Yesu va. 18 Tac më kahnëk tëfary wov hna.