15
Soŋe vahnë vële nkok mëkëna ntaw̃ ŋa
1 Ga ndëcëk rac, më vokëɓu hnuwu ambin hna dahëse haw̃ary samah do vënak: wamëleka mbëɗ gë waki w̃ënkëk wëkata wacankaf mbëɗ gë waki. Waŋi ye watëkwa ŋa kaɓi gë vëhni padënëɗ ntavah W̃ënu ŋa. 2 Më hnuɓu ile ye had wov lancah ile hnaw̃ëlëk gë hwëɗëh, do vële wok vësëmbëlahna ntaw̃ ŋa g'ile fëriko mëntëlëni ỹa, gë vële w̃ëỹëk yavëta lëw̃u ỹa, ɗarël hnë wov lancah rac kahnëniho. Warëmp wale njëɗakëhniw̃o W̃ënu ŋa mënkwëniho. 3 Njëw̃ëɗëniho hnëw̃ Fape fa gë Moyis, ayohal W̃ënu ŋa:
«Ahwëhn W̃ën Hwëhn Fanka Fop,
Vantiyehn hu va camëk do mbënak!
Ahnaw̃ wayal,
Vankaw̃ hu va catëk do toña ye!
4 Mo wok dënënëɗilihna, Ahwëhn?
Mo wok cëmbëɗina uw̃ac hu w̃a?
Wëjë fo ye afacah.
Fop wayal w̃i njijëɗëni do cëmbëɗëhnihi,
kaɓi nuni kitiŋa hu ŋa.»
5 Tac nuɓu ambin Acery W̃ën Cankaf, rac ye usank✡ 15.5: Vantiyehn 7.44 ule ryënkwëtehnëɗëho kwëtëla ŋa, ga piɗëtak, 6 do wamëleka mbëɗ gë waki ŋa wante w̃ënkëko wakata mbëɗ gë waki cahnahnëni hnam. Vacuɗ vacankaf vapacah vanjerah vante fëtëɗ vante rëkëɗëhëhniw̃o hafo wapary hna cuɗaniho do ñëbani waryil sanu wayankah wasakahn walëw̃ hni hna. 7 Ryampo hnë wëlaw̃ wahnah hna njëɗakëhniwo wamëleka mbëɗ gë waki ŋi ñërya sanu nte rëmpëhnik untavah W̃ën ale wok kantëm. 8 Idanc W̃ënu ŋa do gë fanka falëw̃u fa pëɓënëko Cery ŋi gë hwëcic. Ahnë koɗilohna tënk hnam hafo pad wakata mbëɗ gë waki mba wamëleka mbëɗ gë waki ŋi.