1 Ŋupe ŋaiye Jisas nangange wusyep bongol uku nal lenge jetalah syepumbur umbur hoi miꞌe pe, kin nasme moi uku pe, kin nal ŋoto moi embere lalme ŋanange nalaŋatme wusyep tikin Got nalme lenge miyeꞌ tuweinge. 2 Ŋupe ŋaiye Jon tikin Baptais narp mwahupwaiꞌe no, kin ŋasande wusyep me ŋaimune ŋaiye Krais ŋende pe, kin nember lenge jetalah kin syeꞌ yal yetekeꞌe Jisas. 3 Tinge yisilihme Jisas na, “Na ini poi! Taꞌe nin Krais ilyeh ŋaiye si nat lakai, teter ya murp meseperhme lahende topoꞌe?” 4 Jisas nungwisme wusyep tinge na, “Pa plihe yil yinime Jon junde ŋaimune ŋaiye yip si yisande yetekeꞌe.

7 Ŋupe ŋaiye lenge jetalah tikin Jon si yal miꞌe pe, Jisas ŋanange wusyep nal lenge miyeꞌ tuweinge me Jon. Kin ŋana lenge na, “Ŋupe ŋaiye yip yal moi gungurar ŋaiye yetekeꞌe Jon pe, yip ŋoiheryembe nange pa yetekeꞌe ŋaimune? Taꞌe yip yala yetekeꞌe yohe ŋililyehme ŋereh ende lakai? 8 Yip yal uku ŋaiye pa yetekeꞌe ŋaimune? Taꞌe yip yal ŋaiye pa yetekeꞌe miyeꞌ ende dendeꞌ hihyilih ŋaiye tikin miꞌ supule? Lenge miyeꞌ ŋaiye dendeꞌ hihyilih taꞌe luku pe, tinge yarp yukoh titinge kiŋ. 9 Kom yini ŋam! Yip yala yetekeꞌe ŋaimune yil uku? Yip yala yetekeꞌe profet ende lakai? Hei! Ŋam mana yip, profet uku ŋaiye yip yetekeꞌe pe, kin nengelyembe profet lalme. 10  Mal 3.1Miyeꞌ ilyeh uku ti, wusyep tikin Got ŋaiye sai nato tup ŋanange taꞌe leꞌe,

11 Ŋam mana yip bwore mise, Jon tikin Baptais kin nengelyembe lenge miyeꞌ lalme ŋaiye yarp kekep eꞌe somohonme na tatame tukwini. Kom miyeꞌ ŋaiye narp miyeꞌ pakaiye nato lemame tikin Got pe, kin nengelyembe Jon. 12  Luk 16.16Dindiꞌ ŋup ŋaiye Jon ŋanange wusyep kin nate tatame tukwini leꞌe pe, lenge miyeꞌ bongol yarmbe yende wah nihe ŋaiye ka yende yumbune lemame tikin moihlaꞌ. Pe tinge yaŋaꞌe nihe syohe embere embere pupwa yalme lemame tikin Got.* Wusyep Grik yukur tas gondoume ŋaiye ves 11.12. Miyeꞌ syeꞌ ŋoiheryembe nange Jisas kin ŋanange wusyep nal lenge miyeꞌ tuweinge syeꞌ ŋaiye ŋoiheryembe nange ka yurmbe no, ka jinyen lenge Rom, taꞌe luku no, ka ende miꞌ me ŋahwikin tikin Got ŋaiye ka ende lemame kin ka si kekep eꞌe. 13 Wusyep erŋeme tikin Moses topoꞌe lenge profet lalme yanange wusyep me lemame tikin Got ŋaiye ka ot. Tinge yanange wusyep ilyeh uku ya tatame ŋup tikin Jon Baptais. 14  Mal 4.5, Mat 17.10-13, Mak 9.11-13Taꞌe luku pe, ŋaiye yip ŋoiheryembe nange wusyep ŋam mise pe, profet Elaija ka ot pe, luku ki ŋanange nalme Jon tikin Baptais. 15 Lahmende ŋaiye mungwim sai pe, yisyunde wusyep uku!

16 Ma miyarꞌe lenge miyeꞌ tuweinge ŋaiye tukwini tuꞌe la, ma mininge wusyep tap mune? Tinge taꞌe lenge lahmakerep ŋaiye yarp yal yoto moi jahilyeh. Lenge mekerep syeꞌ tambah yal lenge mekerep syeꞌ yanange na, 17 ‘Poi mosoko wenersep tikin dindiꞌ, kom yukur yip yukulꞌme wahriꞌ, topoꞌe poi mosoko wenersep miyeꞌ nule, kom yukur yip yilil!’ 18 Ŋupe ŋaiye Jon nat pe, kin nasme ŋai topoꞌe yukur ŋonoꞌe pinip wain. Pe lenge mitiŋ lalme yanange na, ‘Yipihinge pupwa ende narp nato kin!’ 19 Topoꞌe ŋupe ŋaiye Talah tikin Miyeꞌ nat pe, kin ŋono ŋai topoꞌe ŋonoꞌe pinip wain pe, lenge mitiŋ lalme yanange na, ‘Yetekeꞌe miyeꞌ eꞌe! Kin miyeꞌ ŋaiye ŋono ŋai embere, topoꞌe ŋonoꞌe pinip wain embere sekete. Kin ŋimei titinge lenge miyeꞌ ŋaiye yambaꞌe wuhyau takis, topoꞌe lenge mitiŋ ŋaiye yende hwap.’ Kom poi miyarꞌe sande tekeꞌe topoꞌe wah tikin miyeꞌ ŋupe ŋaiye poi metekeꞌe ŋaisep teŋei.”

20 Jisas ŋende wah bongol supule nato moi embere syeꞌ, kom lenge miyeꞌ tuweinge yukur yimbilme ŋoihmbwaip yasme pupwa tinge. Taꞌe luku pe, Jisas ŋihyel lenge miyeꞌ tuweinge ŋaiye yarp ya yoto moi embere luku. 21  Ais 23.1-18, Ese 26.1–28.26, Jol 3.4-8, Amo 1.9-10, Sek 9.2-4Kin ŋanange na, “Ŋoihginirme yip lenge miyeꞌ tuweinge ŋaiye yarp moi embere Korasin. Topoꞌe ŋoihginirme yip lenge miyeꞌ tuweinge ŋaiye yarp Betsaida. Ŋaiye ma mende mirakel leꞌe guh ŋembep lenge Tair topoꞌe Saidon ŋaiye ŋam si mende gwah ŋembep yip eꞌe pe, tinge somohon ka yimbilme ŋoihmbwaip yusme hwap ŋaiye tinge yende. Tinge se ka juh temhroŋ ŋosohe, topoꞌe tereꞌ nihyeh sasambe ŋoihginir titinge ŋaiye tinge si yende hwap. 22 Kom ŋam mana yip bwore mise, ŋup yuwo ŋaiye Got ka iyarꞌe lenge miyeꞌ tuweinge lalme pe, Got se ka ŋoihginir sikirp lenge miyeꞌ tuweinge ŋaiye yarp Tair topoꞌe Saidon. Kut ŋaiye yip lope, pakai supule!

23  Stt 19.24-28, Ais 14.13-15O yip miyeꞌ tuweinge Kaperneam, taꞌe ka yahraꞌe yip yenge yil yunuh moihlaꞌ, lakai? Pakai supule! Got se ka iche yip e guh hel. Mirakel leꞌe ŋaiye tukwini ŋam mende gwah ŋembep yip eꞌe pe, ŋaiye somohon miyeꞌ ende ka el la ende guh ŋembep lenge miyeꞌ tuweinge ŋaiye yarp moi embere Sodom, ka yimbilme ŋoihmbwaip pe, tukwini moi embere Sodom uku ka si. 24  Mat 10.15, Luk 10.12Kom yip pa sisyeme tuꞌe leꞌe, nato ŋup yuwo tikin ŋaiye Got ka ende wusyep pe, kin se ka ŋoihginirme Sodom sikirp. Kut ŋaiye yip pe, pakai.”

25 Ŋup uku pe, Jisas ŋanange na, “Yai, nin Lahmborenge tikin moihlaꞌ topoꞌe kekep. Ŋam hriphrip me nin supule. Detale, nin ŋinise wusyep uku nal lenge mitiŋ ŋaiye ŋondoh mape, kut nin nasambe lenge mitiŋ ŋaiye taꞌe lenge lahmakerep. 26 Mise, Yai, nin gande ŋasande nitei pe, nin ŋende gande taꞌe luku. 27  Jon 1.18, 3.35, 10.15Yai ŋam si pwale ŋaiꞌe ŋaiꞌe lalme nat syep ŋam. Topoꞌe yukur miyeꞌ ende sisyeme Talah. Yai ilyeh kin sisyeme Talah. Topoꞌe yukur miyeꞌ ende kin sisyeme Yai. Talah ilyeh topoꞌe lenge mitiŋ ŋaiye Talah si sambe Yai nalme tinge pe, tinge luku, tinge sisyeme Yai.

28 Yip lenge mitiŋ ŋaiye yende wah nihe, topoꞌe yikirh mane embere embere pe, yip lalme yutme ŋam ŋaiye ma mende yip pa yambaꞌe yohe. 29  Jer 6.16Yip pa junde ŋam pe, ŋam ma mikirh mane topoꞌe yip. Pe ma yul yip sande tekeꞌe. Ki yukur nihme yip ŋaiye pa yende ŋaimune ŋaiye ŋam misilih yip ŋaiye pa yende. Detale, ŋam miyeꞌ michukor, topoꞌe ŋam tale ŋam tanam. Pe yip pa yambaꞌe yohe. 30 Yukur ki nihe ŋaiye pa junde ŋam, topoꞌe mane ŋaiye ŋam yal yip ŋaiye pa yikirh pe, ki bwore huhwai.”