THESSALONICA
Hamadefal
Yar sa somawel fedal yarmat irel yodol yal be tefaeldoh Kristus mele resa taroprop fedal yarmetael eklesia la woal Thessalonica iyang. Harwowel babior we yael Paulus ngalir Kristianol Thessalonica ila ye kapta yael yarmat chepar le yesa holar mala yodol yal tefaeldoh Samol. Paulus ye tefa babior le bo yebe habungu machey le yar. Ye hamdefa ngalir le imol mala yebe tefaeldoh Kristus ngo yebe kkel loh tot molfid mo wegdeg tayikof, le yeramtawe semal we si tugla kofal we rema ffesangu bo “Mael Tayikof” mele yebe happadoh meka ngo iy molwe yebe hapaliyel ngal Kristus.
Apostel le ye hakkela ngalir rechokla rebe yawli babior le bo rebe yedamgel luwul yar tugulul ladep le ila mwo re chungu weres mo hafohoy; bo rebe yengang hammaler le rebe wochog Paulus mo mokwe choluwal irel yengang, iwe ngo re yedamgel irel yar foru meka ye momay.
Palpal Meka Yadol Babior Le
Hamadefal 1:1–2
Hapingping mo momayel kapter 1:3–12
Hamadefael kofael yal be tefaeldoh Kristus 2:1–17
Folol wegdegel Kristiano 3:1–15
Haygul loh 3:16–18
1
Harwowel Babior We Yael Paulus Ngalir Kristianol
1 Babior le ila ye budoh mo irel Paulus mo Silas mo Timothy — Ngalir yarmetael eklesia la wol Thessalonica le ir lol Deus le Temach mo Samol Jesus Kristus: Ac 17:1
2 Deus le Temach mo Samol Jesus Kristus rebe fang ngalugmi haradiya mo hopos.
Hatugul Irel Yodla Bela Budoh Kristus Iyang
3 Hami rewol bismem, pangal yad ngo habe kangalu Deus yal hachigchig bo fael hami. Ngo ye bung le habe foru le be ila sengal bo fael mala tugul la yami ila ye pepallengdah, ngo yami hachangi fengalugmi ila ye pepallengloh. 4 Ila fal le hamem hama to kapta kofmi irel eklesia ka yael Deus iyang. Ye cchehas depmem irel mala hami ha tetaboloh chog yami yedamgel mo yami chepar luwul pangal weres mo hafohoy kala hasa mel iyang.
5 Pangal meka ngo ye hatosiya le tattal hapatpat le yael Deus ila ye fel ngo be yor igegmi mo irel mala Lamliyal, ila fal le ha hafohoy iyang. 6 Deus yebe foru mala ye bung: yebe hasidoh hafohoy ngalir rechokla re hafohoyugmi, 7 ngo ye bele hadorahmi hami rechokla hasa hafohoy, ngo ye wol hadorahmem. Yebe foru mele irel yodla be bidiy Samol Jesus mo wol laeng le ir mo angelus kala lol le re kkel, 8 mo sew yaef le ye bbulbul, le rebe hagrer rechokla re tahchaloh Deus mo rechokla re te talenga Hapatpat Momay we kofael yach Samol Jesus. 9 Re bele hafohoy irel hagerger la tor siyal ngo re bele chuy mo fael metael Samol mo fael mala kkamelal le ye falmay, Is 2:10 10 irel Ralla la ye bela budoh. Iwe ngo panger mekla lol ngo rebe hapingpinga ngo panger rechokla resa chepar ngo rebe hasrowu. Hami ngo habe wol mel luwullur bo fael mala hasa chepar irel hapatpat kowe ha kangalugmi.
11 Ila fal le pangal yad ngo ha memapelahmi iyang. Ha dedangro Deus bo yebe foru le be yor igegmi mo irel molow la ye ffesangugmi bo ha bela mel iyang. Yebe tupungugmi irel mala kkamlal bo be yoh ngalugmi mekla ha dipli le ye momay, ngo ye hamallo yengang kala ha foforu bo fael mala ye tugul lal dipmi. 12 Be iye sengal yami foru ngo mala idel yach Samol Jesus ila be ssor bo fael hami, ngo hami be wol ila sangmi bo fael haradiya la yael Deus mo Samol Jesus Kristus.