4
1 Hanadan buhul nadan holag Judah ya holag Benjamin ya dingngol da an nadan tatagun nibangngad ad Jerusalem ya pungkapya da bo nan Templon nan AP-APU an Dios nadan holag Israel. 2 Ot eda tibon hi Serubbabel ya nadan udum an aap-apun nadan holag Israel ot kanan dan diday “Agat bumaddang kamin dakayun mangapya tuh Templo te dayawon mi damdama nan Dios an dayawon yu. Ya in-anappitan mi nipalpu handih nangialiyan dakamin Esar Haddon an patul di Assyria an mumbobleh tu.”
3 Mu kanan Serubbabel, hi Joshua ya nadan udum an aap-apuy “Adimi mahapul di baddang yu. Takon di dakami ya abuy mangapyan tuh Templon nan AP-APU an Dios min holag Israel. Te hidiyey kanan nan patul di Persia an hi Cyrus ke dakami.”
4 Indani ya impatnan nadan numbobleh din dismayaon ya taktakuton nadan holag Israel ta itikod dan mangapya nah Templo. 5 Ya binayadan da nadan aap-apud Persia ta ipatikod da nan ngunu. Athituy inainat da nipalpu handih hi Cyrus di patul ad Persia inggana handih nihannot hi Darius an iPersia an numpatul.
6 Indanit nala-u boy kaatnan toon ot numpatul hi Serses ya nuntudok nadan buhul di iJudah ya iJerusalem an indiklamu da dida.
7 Handi boh ya numpatulan Artaserses ad Persia ya impaen bon nadan buhul di iJudah di tudok dan hiyan impangulun da Bislam, hi Mitredat ya hi Tabeel ya nadan ibbada. Hanah tudok da ya ingkali dah Aramaik, ta mahapul an waday mangalih kibalinana nah patul.
8 Hi Rehum an gobernador ya nan sekretarina an hi Simsai di nangitudok kediyen tudok ot kalyon dan Artaserses di mipanggep hi ma-ma-at ad Jerusalem.
9 Kanan da nah lappun nan tudok day
“Nalpuh tuwen tudok ke Rehum an gobernador ya hi Simsai an sekretarina, nadan huwes ya nadan udum an opisyal an tonok an iErek, iBabilon ya iSusa ad Elam, 10 ya nadan udum an tatagun impaalin nan ongal di kabaelanan hi Asurbanipal an numbobleh tud Samaria ya nadah udum an bobled Euphrates nah nangappit hi kalin-oban di algo.
11 Hituwey pinhod min ipainilan he-a, apu Artaserses an patul an nalpun dakamin tatagum ad Euphrates nah nangappit hi kalin-oban di algo. 12 Pinhod min inilaom an hantudan holag Israel an nalpuh nad Babilon an immalin numbobleh tud Jerusalem ya pun-iphod da boh tuwen boblen di gaga-iho ya mungngohen tatagu. Takon nan binattun alad ya gagala mon gibbuwon da. 13 Deket gibbuwon dan iphod hituwen boble da, apu patul, takon nadan alad na ya nunna-ud an itikod dan mumbayad hi buwis da. Ta gapun diye ya umittay moy pihhun di boblen pun-ap-apuwam.
14 Ya man-uket ipainila min he-ah tuwe ya gapu te he-ay ap-apu mi ya adimi pinhod an maat di athidi. 15 Ta hay kanan mi ya ipahamak mut tibom nadan dokumento handih done mipanggep ketuwen boble. Deket iathidim ya matibom an hituwe ya boblen di mangohen tatagu. Nipalpu tuwali handih done ya ongal di bulubulun an idat da nadah nun-ap-apu ketuwen boble. Ya naligat dan mangun-unud kinali napa-ih tuwen boble da. 16 Hidiye nan hay punnomnom mi ya deket makapya boh tuwen boble da, takon nan binattun alad na ya adim kabaelan hi udum hi algon mun-ap-apu ketuwen bobleh nangappit hi kalin-oban di algod Euphrates.”
17 Hanan patul ya impaenay tudok nan panumang na kediyen tudok da. Athituy kanana:
“Hituwey humang kun he-a, Rehum an gobernador, he-a Simsai an sekretarina ya dakayun opisyal an numbobled Samaria ya nah udum an bobled Euphrates nah nangappit hi kalin-oban di algo.
18 Hanan tudok yu ya imbidbid dan ha-on ot kalyon day kibalinana. 19 In-olden ku ot hamakon da nan dokumenton diyen boble ya makulug an nipalpu handih done ya nakihanangga handidan bimmobleh di handidah nun-ap-apuh di te kadakkolan ke dadiyen bimmobleh di ya makangohhe da. 20 Nahanhanot di papatul ad Jerusalem an ongal di kabaelan dan nun-ap-apun am-in hanadah bobleh nangappit hi kalin-oban di algod Euphrates ot diday numbayadan di tataguh buwis. 21 Ta hidiye nan ad uwani ya iolden yun itikod dadiyen tatagun mungngunu inggana iolden kun ituluy da. 22 Kinali adiyu baybay-an di mipanggep ketuwe, adi taku iabulut di athitu ta maid di ahi maat an dumadag hi kiphodan taku.”
23 Kediyen dimmatong hituwen tudok nan patul an hi Artaserses ot mibidbid ke da Rehum, hi Simsai ya nadan ibbadan opisyal ya ginal-an dan immed Jerusalem ot piliton dan ipatikod nadan holag Israel an mungngunu nah Templo.
24 Ot matikod hidiyen ngunu nah Templon Apu Dios ad Jerusalem inggana handih mikadwan toon an numpatulan Darius ad Persia.