HEBRUUTE
Suh Raang Arah Le
Ephangjatjih
Le ah Hebru mina Kristaan loong suh raang kota, neng miksukte damdi ehanhan ih rook mui ano, Kristaan loong ih neng tuungmaang ah thinhaat nanah ang rum kano raangta. Arah raangte ih Jisu Kristo ah amiisak nyia Rangte ethoon wuungbaat te ngeh mina loong suh tenchaan kot suh raangta. Heh ih erah raangta adoh jaatjom amiisak tiit kamkam ih baat ha: (1) Jisu aba lathoonka Rangte Sah, heh ih cham anaang lam ih heh Wah jeng mamah ih chaat theng ah erah nyootta. Rangte Sah ang ano, Jisu ah Banlam Hak dowa khowah loong nang ih elong, rangsah loong thaknang ih elong eno Moses heh teeteewah raangtaan uh elong. (2) Jisu ah Rangte ih dong baatta heh ah saarookwe raangtaan ih romwah, Banlam Hak dowa romwah loong thaknang ibah elong. (3) Jisu jun ih hanpiite loong ah rangdah, echo, eno etek dowa puipang rumta; Jisu ah romwah phokhoh, amiisak khopui roidong kotte, erah tiit ah Hebru thooroom nyia banlam di hui awak sook rum ano siik hoon lam ih woot noisokta.
(Leedaap 11) Ijirel teetiit ni marah marah mina mirep ih khomjat arah thaaksok kaadi, arah le raangte wah ih aa wette loong asuh tuungmaang maang ih tong an ngeh liiha, eno (leedaap 12) ni heh le wette loong asuh baat ha rang maangthoon thoon tuungmaang ah lah naangtheng, eno tim chamnaang siiwi thok ha bah uh, neng mik ah Jisu taangko soktheng ngeh ih baat ha. Arah leedap ah erenbaat nyia ban choophaan damdi thoonbaat ha.
Hemong Dowa Jatjih
Ephangjatjih: Kristo ah juuba Rangte dongjat thukte. (1:1-3)
Kristo ah rangsah loong khodi elongthoon (1:4—2:18)
Kristo ah Moses nyia Josua nang ih elongthoon. (3:1—4:13)
Kristo romwah mootkaat ah elongthoon (4:14—7:28)
Kristo kakham ah elongthoon(8:1—9:22)
Kristo ih heh roidong kota ah elongthoon (10:1-39)
Tuungmaang ah phangkhoh angjih(11:1—12:29)
Rangte eroon ih thukjih(13:1-19)
Ethoon rangsoom (13:20-21)
Jengthoon jengkhaap (13:22-25)
1
Hesah jun ih Rangte jengkhaap
1 Teewadi Rangte sengte sengwah loong damdi ja hantek dook roong waanta erah damdi hejaat hejaat lam ih khowah loong jun ih roong waanta, 2 Enoothong amadi bah heh Sah jun ih waan hali. Rangte ih rang ah hah ah heh jun ih dongsiitta, Hethoon doh jirep ah Rangte ih heh lak nah kot suh juujeeta. 3 Rangte chaan aphaan ah heh ih ngaak phaak took ha eno heh Rangte ah mamah angla erah likhiikkhiik angla, heh chaan aphaan jengkhaap nawa ih rang ah hah thoontang thingtong thukla. Mina loong rangdah biin anaan mootkaat ah jen moh ano, rangmong ni Elongthoon Chaan aphaan Rangte dakchah ko adi tong wangta.
Rangte sah rakkak tiit
4 Rangte Sah ah rangsah thaknang ibah elong hoonta, heh men ah Rangte ih neng thaknang ibah elong ih thinta, 5 1:5 Rsb 2:7; 2Sam 7:14; 1Tet 17:13Mamah liidih Rangte ih heh rangsah loong wasiit suh uh baat muh,
“An nga Sah ngeh ah;
chiinnyah ngah an Wah eh hoon lang.”
Marah Rangsah tiit uh ebaat muh
“Ngah heh suh heh wah ang ang,
eno heh ah nga sah ang ah.”
6 1:6 Hodb 32:43 Enoothong Rangte ih heh sah miwasah tupkhoh ah mongrep nah daapkaat suh liita tok adi, heh ih liita,
“Rangte rangsah thoontang ih heh ah soomtu theng.”
7 1:7 Rsb 104:4 Enoothong rangsah loong tiit ah Rangte ih liita,
“Rangsah loong ah Rangte ih pongbih ih hoon thuk rumta,
eno heh laksuh loong ah weeluung ih hoon thuk rumta.”
8 1:8 Rsb 45:6,7 Mamah ang abah uh Rangte ih miwasah tiit asuh baatta:
“O Rangte, an hasong ah timtok doh uh lathoon theng toom ang ah!
An mina loong ah epun lam ih pan rum uh.
9 An ih kateng ah minchan ehu eno ethih ah miksuk ehu.
Erah raangtaan ih an Rangte ih danje taho
eno esoomtu ih taho raangtaan ih rapne thoon roon thuk halu
an damdoh wa loong asuh kot thaknang ibah an suh koh halu.”
10 1:10 Rsb 102:25-27 Heh ih amah nep liita,
“An, Teesu, rangphang di hatoh hoontu,
eno an laklak ih rangmong loong ah hoontu.
11 Neng tikmat eh ah, enoothong an heh phoopho ang uh;
Neng ah nyuh akhat tuungkhaang arah likhiik ih thi rum ah.
12 An ibah kut kakok thin ajih kok thin uh,
eno neng ibah nyuh kah lek ajih lek rum ah,
Enoothong an abah saarookwe erarah ang uh,
eno an roidong ah timtok doh uh tah thoonka.”
13 1:13 Rsb 110:1 Rangte ih marah rangsah loong suh uh tah baatta:
“Nga dakchah ko adoh tong wangho
an lathong nah anpi anra loong ah
an lah naktheng maang thinthin ah.”
14 Enoobah rangsah loong ah timjih ah? Neng loong ah chiiala loong Rangte mootkaatte eno neng ih khopiiroidong chote loong huinong roonghui suh daapkaat taha.