1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Devei ve Izelayɛle nuiti zea ga ti naati kpein kula ɓɔɠɔ zaama ti-ʋuuzuʋɛ, niiti ti ɠɔzɔai ga gee zeeɓɛi, ɓaa kalaɲa kolegi, ɓaa ti vɔɔɠuai poomai ta ʋa. 3 É ɠɛni ga zunu ɓaa anzanu, wa ti ɠula wo-ʋuuzuʋɛ ʋa, ti mina wo-ʋuuzuʋɛ ɠɔzɔ, ʋɛ gè zeini ná wo zaama.» 4 Izelayɛle nuiti ti woozogi ɠɛɛni, ti naama nuiti kpein kulani ti-ʋuuzuʋɛ ʋa, ti li ná ʋoluʋɛ, eɠɛʋelei Ɠɔoɠɔ GALAGI ma levei veeni la Moize ya.

5 Ɠɔoɠɔ GALAGI ɓɔɛni Moize ʋɔ, é ɠɛ ma: 6 «Ɓɔɛ Izelayɛle nuiti pɔ, è ɠɛ ti ma: Ni zunu ɓaa anzanu a ɓaaɠona nui ta ma, toɠa ɠɛ ga ladalala nu Ɠɔoɠɔ GALAGI letema, kɛni é leve ga sɔɓa nu. 7 Toɠa la zɔ ga ga kotoi é kɛai. Toɠa ma anii ɠaaɠale ma naa ʋɔ, nii é ɓaaɠogai ma, é kpɔ ba ga ma gaaɠwɛsu lɔɔlugɔi zeizu ɠilagi. 8 Ni nui nii kpaaɠomai wogai la, naa za, tama ná-pogani zeɠe nu la ná, nii faazuɓɛtɛi a wo zeezaama, aniiti kpein ta ve Ɠɔoɠɔ GALAGI ʋɛ, naa ɠa ga zalaɠa ɠula nui ɠa ta ve zea, é ɓɔ baala sinɛi ʋa, é ga koto gba zalaɠai sɔɓa nui ʋɛ. 9 Vebɛani ɲadegai kpein Izelayɛle nuiti ta kula, faanɛɛ gelei nii a zeɠe ba, é ve zalaɠa ɠula nui ya, naa ɠa ɠɛ ga naa nɔnɔ. 10 Nii nui feezu Ɠɔoɠɔ GALAGI ʋɛ, naa ɠa ve zalaɠa ɠula nui ya, nii nui a fe zalaɠa ɠula nui ya, naa nɔnɔ ɠana.»

11 Ɠɔoɠɔ GALAGI ɓɔɛni Moize ʋɔ, é ɠɛ ma: 12 «Ɓɔɛ Izelayɛle nuiti pɔ, è ɠɛ ti ma: Wɛlɛ nii maanɛai wo kɛ, ni anzanui ta a sinigi yaavana, é ɠɛ bɛ ga ladalala nu. 13 Ni zunu ɠili ka laana la, sinigi la ɠoleni ma, tɔɔzei é ɓɔɠɔ ɠɔzɔʋɛ dɔɔɠuzu, zeele la ná, a zeele woo wo daalɔɠɔma, tama é la zoni ná kɛɛzuʋɛ, 14 siɛgi zu tolo ɠigi ɠɛɛzu la sinigi ʋɛ, é zooʋi anzai ma, é ɠɛni ga ɠite vaa ɓaa zɛɛ, 15 toɠa ʋaa la zalaɠa ɠula nui ʋɔ bɛ, moloi nii é ga wɔɔlezegi, toɠa naama ɠɛzɛi kilo saʋagɔ zeɠe, é kɛ bɛ ga zalaɠai, é mina gulɔ ʋu ma, é mina ani maku nɛɛnɛ pu ma, mazɔlɔɔ toɠa ga tolo zalaɠai, vebɛanii nii é faaɠaaza golai ma vai loozu nu ɠisu.

16 «Zalaɠa ɠula nui ɠa maaɓuɠa ga anzanui seizu ɲadegai ʋa, é lo Ɠɔoɠɔ GALAGI ɠakala. 17 Toɠa ziɛ ɲadegai zaɠa pɔlɔ liɠi zu, é seɠe ʋɛlɛ ɲadegai ma vufiligi yɛʋɛ, é pu su. 18 Toɠa anzanui ɠaalɔ Ɠɔoɠɔ GALAGI ɠaazu, é nɔungi vie, é vebɛanii ve zea, nii é ná-faaɠaazagi ma ɠizɛsui wosu, naa ɠa é ga tolo zalaɠai, kɛlɛ zalaɠa ɠula nui ɓɔɠɔi ɠa foovoo ɗɛ wanai zo ya. 19 Toɠa ɠɛ anzanui ma: ‹Ɗa ɠonazu ga: Ni zunu ɠili ge la dɛ laani ga ɗe, è la dɛ ɓɔɠɔ ɠɔzɔni, è ʋa è-zinigi yaava, kaipa è zeini bɛ, naazu foovoo ɗɛ wanai nii mina faa ɲɔu nɔpɛ kɛ ga ɗe. 20 Kɛlɛ tama, è zeiɗai ma zini bɛ, ni è è-zinigi yaava, è ɓɔɠɔ ɠɔzɔ, è la zunu ɠili koba, 21 ɗa ɠonazu, è yeezei niima voovooiti bu: Ɠɔoɠɔ GALAGI è-ɓalaiti fɔ, é è-ɠogi lɛ da, eyɛsu ɗa-nuɓusɛiti ta ɠɛna foovoo loa, ti pokɔɠɔ è ma. 22 Foovoo ɗɛi tɛi ge lɔ è ɠoozu, é è-ɠogi lɛ da, é è-ɓalaiti fɔ!› Anzanui ɠa gooɠaaʋote, é ɠɛ ma: ‹Ungo, é ɠɛ ɠana!›

23 «Zalaɠa ɠula nui ɠa foovoo vai niiti sɛʋɛ sɛʋɛi zu, é gba ziɛ wanai wu. 24 Toɠa ziɛ wanai naa lo anzanui la, nii é ga foovoo ɗɛi, é kpɔle, é yei koozu. 25 Aisa naa ʋa ɠɛ, zalaɠa ɠula nui ɠa tolo zalaɠai zeɠe anzanui ya, é datɛɠɛ vai ma ʋoogi ɠɛ Ɠɔoɠɔ GALAGI ɠaazu, naa ʋolu é ʋaa la zalaɠa ɠulazuʋɛ. 26 Zalaɠa ɠula nui ɠa zeeɲɛ gila seɠe ba, é makɛ ga ɠizɛsui, é gala, zalaɠa ɠulazuʋɛ, naa ʋoluma, é ziɛi ve anzanui ya, é kpɔle. 27 Ni gaama ʋe ga é ɓɔɠɔ ɠɔzɔʋɛ, é ɠɛ ga ladalala nui sinigi ʋɛ, foovoo ɗɛi ɠa yei koozuʋɛ, é naa wona, kogi lɛ da, kpalaiti ta vɔ, eyɛsu ná-nuɓusɛiti ta ɠɛna foovoo loa, ti pokɔɠɔ ma. 28 Kɛlɛ ni anzanui la ɓɔɠɔ ɠɔzɔni, ni ɲadegɛ, faa ɲɔu nɔpɛ ge la ɠɛa la, toɠa zoo é dounɠa zɔlɔɔ ʋolu.

29 «Naa ɠa é ga tɔgi é ʋilɛ tolo vai ʋa, siɛgi zu anzanui é zini bɛ, é sinigi yaavazu la, é ɓɔɠɔ ɠɔzɔ, 30 ɓaa ni tolo yii a lɔɔna zunui ta yiima, é zooʋi anzai ma koloɠolo fai zu. Toɠa ɠula la Ɠɔoɠɔ GALAGI ɠakala. Zalaɠa ɠula nui ɠa naa ɠɛ, nii kpein sɛʋɛai tɔgi zu. 31 Anzazinigi ɠa ɠɛ ga sɔbalala nu naazu, anzanui ná-faaɠaaza golai ma ɠasɔi ɠa la tɔ ɓɔɠɔi unma.»