1 Ɠɔoɠɔ GALAGI ɠɛni Moize ma: «Ɠɛ Aalɔn ma: ‹Yeemaale ga ɗa-lukpɔi ziɛ wolaiti ma, ta ma ɓekegiti, ta kpoigiti, zɔlɔgiti ti lɛ Ezipete yooi ɠa.› » 2 Aalɔn yeemaaleni Ezipete ɗɛiti ma. Zɔlɔgiti ti lɛɛni, ti Ezipete yooi maaɓɔɔle. 3 Kɛlɛ molikulagiti ti naa ɠɛɠalai ɠɛɛni ga ta-zoɠolaiti maaʋele. Ti zɔlɔgiti puuni ɓalaagi Ezipete yooi ɠa.

4 Falaɠɔn Moizeni ta Aalɔn lolini, é ɠɛ ti ma: «À Ɠɔoɠɔ GALAGI maanɛɛnɛ, naa ɠa a kɛ é zɔlɔgiti maaɠooza gi ʋa ga nà-nuɓusɛiti. Nà ɓesu wa-nuɓusɛiti ba, ti li, ti zalaɠaiti kula Ɠɔoɠɔ GALAGI ʋɛ.» 5 Moize ɠɛni Falaɠɔn ma: «Masagi, va bu ɗa ɓɔɠɔi è kui lɛ ga ze, yeei gè ʋaazu Ɠɔoɠɔ GALAGI maanɛɛnɛzu la è ʋɛ, wa ɗa-wotiɠɛ nuiti, ta ɗa-nuɓusɛiti, nii a kɛ é zɔlɔgiti maaɠooza è ʋa, ta ɗa-ʋɛlɛiti? Taɠila kpalaa ge la yɛga ná, kɛni ziɛ wolai Nile nɔ wu.» 6 Falaɠɔn gooɠaaʋoteni, é ɠɛ ma: «Lina nɔ.» Moize ɠɛni ma: «Toɠa ɠɛ ɠana, eɠɛʋelei è faliai la, naa ɠa a kɛ, è kwɛɛ ga gala kili ge la ɠulani ga Ɠɔoɠɔ GALAGI, gá-ƓALAGI. 7 Zɔlɔgiti ta maaɠooza è ʋa, ta ɗa-ʋɛlɛiti, ta ɗa-wotiɠɛ nuiti, ta ɗa-nuɓusɛiti, taɠila kpalaa ge la yɛga ná, kɛni ziɛ wolai Nile nɔ wu.»

8 Moize ta Aalɔn ti zeɠeni Falaɠɔn ʋɔ bɛ, Moize wooɠulani Ɠɔoɠɔ GALAGI ma, zɔlɔgiti ta-vaa zu, niiti é ti leʋeni Falaɠɔn laalɔɠɔma. 9 Ɠɔoɠɔ GALAGI naa ɠɛɛni, nii Moize falini ma. Zɔlɔgiti ti zaani pɛlɛiti bu, ta koizuʋɛti, ta dɔɓɔiti su. 10 Ti ti ɠaalɛɛni ba kpifɔkpifɔ, makugi ɠɛni ɠulazu zooi zu ná pɛ. 11 Kɛlɛ Falaɠɔn kaai ma ga faiti ti zolooga, é ɓɔɠɔ ɠikpaani, é la woiloni Moizeni ta Aalɔn woo ma, eɠɛʋelei Ɠɔoɠɔ GALAGI bogai la.

12 Ɠɔoɠɔ GALAGI ɠɛni Moize ma: «Ɠɛ Aalɔn ma: ‹Ɗa-lukpɔi maale, è zooi ma vufiligi loɠa. Toɠa latisu ga sosoligiti Ezipete yooi zu ná kpein.› » 13 Zekana ti kɛɛni la. Aalɔn yeemaaleni ga ná-tukpɔi, é zooi ma vufiligi loɠa la. É ɠɛni ga sosoligiti, é ʋu nuiti ma, ta suaiti. Zooi ma vufiligi kpein ge ɠɛni ga sosoligiti, Ezipete yooi kpein su. 14 Molikulagiti ti ta-zoɠolaiti kpein kɛɛni, ga ti ʋa sosoligiti kula, kɛlɛ ti la ɠɛni zooni. Sosoligiti ti ʋuuni nuiti ma ta suaiti. 15 Názu ɠa molikulagiti ti ɠɛni la Falaɠɔn ma: «GALA ɓɔɠɔi yee ʋogi ʋe!» Kɛlɛ Falaɠɔn ɠigi ɓaani, é la woiloni Moizeni ta Aalɔn woo ma, eɠɛʋelei Ɠɔoɠɔ GALAGI bogai la.

16 Ɠɔoɠɔ GALAGI ɠɛni Moize ma: «Wuzeɠe ga sobuzobui, è li, è lo Falaɠɔn ɠakala, siɛgi zu é ɠulazu la ga é li ziaʋɛ, ɗa ɠɛ ma: ‹Ɠɔoɠɔ GALAGI wooi ɠaa: Ɓe nà-nuɓusɛiti ba, ti li, naa ɠa a kɛ ti dɛ̀bi. 17 Ni è la ɓeni nà-nuɓusɛiti ba, ti ʋa li, nà ʋaazu è laalɔɠɔma ga dɛgiti ti laaɓadiai, wa ɗa-wotiɠɛ nuiti, ta ɗa-nuɓusɛiti, naa ʋɛɛ ɗa-ʋɛlɛiti ba. Ezipete nuiti ta-ʋɛlɛiti buulaa ɠa ve ga dɛgiti, ta zooi ɓalaa laa ɠa ve. 18 Kɛlɛ naama volo ná, nà zeeɠaaɠwɛɛzu ɠɛ Gɔsɛn yooi ʋa, ʋɛ nà-nuɓusɛiti ti zeini ná, dɛgiti ti la ɠɛa miná ɲɛgɛlɛin, naa ɠa a kɛ è kwɛɛ ga nà ga Ɠɔoɠɔ GALAGI, nà naama yooi zu. 19 Nà zeeɠaaɠwɛɛzu ɠɛɛzu nà-nuɓusɛiti ta ɗa-nuɓusɛiti ba. Laavɔɔ vai ma ʋoogi naa ɠa ɠula kɛlɛma lina.› » 20 Ɠɔoɠɔ GALAGI kɛɛni ɠana. Dɛgiti ti laaɓadiai, naati ma ɓulugi ʋaani Falaɠɔn ná-masa pɛlɛi wu, ta ná-botiɠɛ nuiti ta-ʋɛlɛiti bu, ta Ezipete yooi kpein su. Zooi ɠoloɠoloni dɛgiti zea.

21 Falaɠɔn Moizeni ta Aalɔn lolini, é ɠɛ ti ma: «À li, wo zalaɠaiti kula wa-ƓALAGI ʋɛ zooi zu.» 22 Moize gooɠaaʋoteni, é ɠɛ ma: «É la zolooni lago pa ga é ɠɛ ɠana, mazɔlɔɔ gá ʋaazu zalaɠaiti kulazu Ɠɔoɠɔ GALAGI ʋɛ, gá-ƓALAGI, ti ga kɔzɔba aniiti Ezipete nuiti bɛ. Ni gá zalaɠaiti kulana Ezipete nuiti gaazu, ti ga kɔzɔba aniiti ti ʋɛ, ti la gi zɔa ga kɔtui ɓaa? 23 Gá folo saʋagɔ ziɛ wosu teʋebai zu, gi zalaɠaiti kula Ɠɔoɠɔ GALAGI ʋɛ, gá-ƓALAGI, eɠɛʋelei é bogai la gi ma.» 24 Falaɠɔn ɠɛ ma: «Nɔ̀un nà, nà yeeɓesu wo ʋa, wo li teʋebai zu, wo zalaɠaiti kula Ɠɔoɠɔ GALAGI ʋɛ, wa-ƓALAGI. Kɛlɛ wa ɠɛna lia, à mina maaɠooza. À maanɛɛnɛi wo bɛ̀.» 25 Moize gooɠaaʋoteni, é ɠɛ ma: «Pɛtɛ, nà ga ɠula è ʋɔ bɛ, nà Ɠɔoɠɔ GALAGI maanɛɛnɛzu è ʋɛ. Lina, dɛgiti ta maaɠooza Falaɠɔn ʋa, ta ná-botiɠɛ nuiti, ta ná-nuɓusɛiti, kɛlɛ Falaɠɔn mina yɛ gi yaavazu, é ʋa ɓe yeeɓesu nuɓusɛiti ba, ti ʋa li, ti ʋa zalaɠaiti kula Ɠɔoɠɔ GALAGI ʋɛ.» 26 Moize ɠulani Falaɠɔn ʋɔ bɛ, é Ɠɔoɠɔ GALAGI maanɛɛnɛ. 27 Ɠɔoɠɔ GALAGI kɛɛni eɠɛʋelei Moize falini la ma, dɛgiti ti maaɠoozani Falaɠɔn ʋa, ta ná-botiɠɛ nuiti, ta ná-nuɓusɛiti. Gila kpalaa ge la ɠɛni yɛni ná. 28 Kɛlɛ niizu mɔnɔ, Falaɠɔn ɓɔɠɔ ɠigi ɓaani, é la yeeɓeni nuɓusɛiti ba, ti ʋa li.