1 Kɛlɛ zunui ta ɠɛni ná, daaseigi ga Ananiase, anzai laa ga Safila, ti ti-ɠɔligi ta ʋɔdini. 2 Naa ʋoluma, ta anzai ti zolooni ma ga ti ma zɔngɔi ɠilazuʋɛ makɛ ya, é ʋa ga mɔtai, é fe keelaiti zea. 3 Kɛlɛ Piyɛlɛ ɠɛni ma: «Ananiase, lee vaa zu Setana è-yiimaʋɛ laavegai? È zou zɔngɔi ɠilazuʋɛ makɛ, è zɛɛi wo Zɛnvu Ɲadegai ma. 4 È ʋa ɠɛ è zooi ʋɔdi, ɗa lɛi ɗɔnɔ ʋa ɠɛa de? Pɔdia ʋoluma ɓalaa, ma zɔngɔi la ɠɛa è yeema ɓaa? È leʋegɛ ɠale mu, è nii ɠɛɠala vai ɓɛtɛ yiimaʋɛ? Nuiti tɛi è ʋa zɛɛi wo ti ma, GALA ka è zɛɛi wogai ma.» 5 Ananiase naama ɓɔɛiti mɛnigai ma, é looni, é za. Zɔiti kpein ti naama wooi mɛnini, ti pɛ ti luani. 6 Zunu loungoiti ti wuzeɠeni, ti maavelevele, ti lii la, ti maaɠulu.

7 Lɛlɛ saʋagɔ ɠɛɠala leʋegai ma, anzai ʋaani, kɛlɛ é la ɠɛni kwɛɛni, nii kɛai. 8 Piyɛlɛ gaazaɠani, é ɠɛ ma: «Gaamai wo mà, anɠɛ nɛi nuuma walii liegɔi ɠa, wo zooi ʋɔdiai la?» É naa wooɠaaʋoteni, é ɠɛ ma: «Ungo, naa ɠa pɔdiai la.» 9 Piyɛlɛ ɠɛni ma naazu: «Lee vaa zu wo zoloogai ma, ga wo Maliɠii ná-Zɛnvui zuɠɔɠɔ? Wɛlɛ, zɔiti ti liai ti è-zinigi maaɠulu, ta pɛlɛlaʋɛ, ta liizu ga ɗe ɗa ɓalaa.» 10 Gaamanɔ, é looni Piyɛlɛ ɠɔɠɔwu, é za. Zunu loungoiti ti lɛɛni, ti ka ga é zaa, ti liini la, ti maaɠulu sinigi ɠobaʋɛ. 11 Naama vai dualuagi lɔɔni Egilisii pɛ su, ta zɔiti ti naama wooi mɛnini.

12 Keelaiti ti ɠɛni laavɔɔ ʋoogiti ta maaɓɛlɛ vai ma mɔinmɔin kɛɛzu nuɓusɛiti saama. Kidaaleʋe nuiti pɛ ti ɓena ɠaalɛ ba GALA sei ʋɛlɛi ma zeizei bosuʋɛ, ʋɛ ná laa ga «Salɔmɔn ná-seizei bo kotai.» 13 Nu ɠili nɔpɛ ge la ɠɛni ʋɛɛzu ti ʋa, kɛlɛ ta-vai wola nɛɛni nuɓusɛi ʋɛ. 14 Ti maa ɠɛni liizu ga mɔinɗa ga kidaaleʋe nu niinɛiti, zinaa ʋɛɛ anzaa ʋa, niiti ti ɠɛni ɓɔɠɔ veezu Maliɠii ya. 15 Nuiti ti ɠɛni liizu vɔlɔ ga seeɓɛ nuiti koi yɔɠɔzu ʋeleiti su, ti ɗa ti la beteiti ta daama ani goiti ma, naa ɠa a kɛ Piyɛlɛ a ɠɛna leʋega, ma niinigi ʋɛɛ ɓalaa tanigaa ma. 16 Nuɓusɛ mɔinmɔin ge ɠɛni zeɠezu ɓalaa Zeeluzalɛme ɠoba laa goiti su, ti ɗa ʋa ga seeɓɛ nuiti, ta niiti kɔzɔba yɛnvuiti ti ɠɛni ti zu, tama ti pɛ ti ɠɛni ʋalozu.

17 Naazu, zalaɠa ɠula ɠundiɠi wolai wuzeɠeni ga tolo ʋooʋamai, ta koba nuiti pɛ, niiti ti ga Saduseyɛinti ta-ɓɔgi. 18 Ti keelaiti soni, ti naati pili kaso ziɠi golai zu. 19 Kɛlɛ kpidii, Maliɠii ná-geezuɠeelai gila ge ʋaani, é kaso ziɠigi ma ɓogiti daalao, é ti ɠula, é ɠɛ ti ma: 20 «À li, wo lo GALA sei ʋɛlɛi wu, wo zɛnvu niinɛi ma ɓɔɛi pɛ daazeeli nuɓusɛi ma.» 21 Keelaiti ti ɠoloni naama wooi ʋɛ, sobuzobui nɔ ɠɛni de, ti li GALA sei ʋɛlɛi wu, ti tɔɔzei ga kalagi woga.

Zalaɠa ɠula ɠundiɠi wolai ta ba nuiti ti ʋaani, ti tukpɔɠaaleʋe nu wolaiti gaalɛ ba ta Izelayɛle ɠɛwolaiti. Ti devei veeni ga ti keelaiti kula kasoi ɠa, ti ʋa ga tiye. 22 Kɛlɛ salaʋusuiti ti liini kaso ziɠigi zu, ti la ti ɠaani. Ti ɠaleni ma, ti ʋa, ti ʋoluvaawo kundiɠiiti ma, 23 ti ɠɛ ma: «Gi kaso ziɠigi ɠaaʋɛ piligai su kpe, kaso ʋɛlɛ makɛ nuiti ti loni ti-losuʋɛti pɛlɛlaʋɛti, kɛlɛ siɛgi zu gi pɛlɛiti daalaogai da, gi la nu nɔpɛ kaani bu.» 24 Siɛgi zu GALA sei ʋɛlɛi maaɓɛɛ ɠundiɠii ta zalaɠa ɠula ɠundiɠiiti ti naa mɛnini da, ti ɠidaaʋilini ga keelaiti ta-vai, ti ɗa ɓɔɠɔ ɠaazaɠa ga ʋelei fai nii ɠaa ʋaazu ɓelazu la. 25 Nui ta ʋaani, é ɠɛ ti ma: «À woilo dɛɛ! Zunui niiti wo ti ʋilini kasoi ɠa, tiya ɠanu, ti loni GALA sei ʋɛlɛi wu, ti ɗa nuɓusɛiti kala.»

26 GALA sei ʋɛlɛi maaɓɛɛ ɠundiɠii ta polu nuiti ti liini naazu, ti ʋa ʋolu ga keelaiti, kɛlɛ ti la ɠɛni kɛɛni ga maaɓaa vaa, tɔɔzei ti ɠɛni luazu ga nuɓusɛi mina yɛ ti zɔɔzu ga kɔtuiti, ti ʋa za. 27 Ti ʋaai ma ga tiye, ti naati toni tukpɔɠaaleʋe nu wolaiti kakala. Zalaɠa ɠula ɠundiɠi wolai ti ɠaazaɠani, 28 é ɠɛ ti ma: «Gi tɔ togɛ wo ma kpaan ga wo mina mɔ kala bo zunui tɔna daaseigi zu, kɛlɛ wɛlɛ, wo Zeeluzalɛme laavega kpekpe ga kalagi wo bosu. Wa pɔ ga wo zunui naa ma ɲamai la gi unma mu ɓaa?» 29 Kɛlɛ Piyɛlɛ ta keelai zɔiti ti gooɠaaʋoteni, ti ɠɛ ma: «Kɛni nu ɠolo GALA bɛ, é leʋe nuiti ba. 30 Ade-mɛmɛwolani ta-ƓALAGI ɠa é Yesu wuzeɠeai, é kula saai ya, nii wo kpadɔni saa wului ma, wo paa. 31 Tɔ ma ka GALA ge buzeɠeai, é sei yeezazuʋɛ, é kɛ ga Totuɠɔi ta Kizo Nui, nii a kɛ Izelayɛle nuiti ti ti ziɛ ʋelei maavalibo, ta-ɠotoiti suvaayɛ. 32 Gá ga naama vaiti ma zeeleiti, naa ʋɛɛ Zɛnvu Ɲadegai ɓalaa ba, nii GALA ge feai naati zea, niiti ti ɠolozu bɛ.»

33 Naama wooiti mɛni fai wanani ti ma ga gola, ti ɠɛni ga ti keelaiti pa. 34 Kɛlɛ Faliziɛn gila ge buzeɠeni kundiɠiiti saama, daaseigi ɠɛni ga Gamaliyɛle, é ɠɛni pɔ ga tɔ kalamɔin, nii nuɓusɛiti ti ɠɛni wola unfesu ma, é devei veeni ga ti keelaiti kula dɛ eteaʋɛ. 35 Naa ʋoluma, é ɠɛni ti ma: «Izelayɛle nuiti, à dama ga naama vai, nii wo ɠɛɛzu wo kɛ ga zunui niiti. 36 Su la dɛ ɠoozani, Tudase wuzeɠeni, é ɗa ɓɔɠɔ ɠɛ ga nu ɓiin, nu unnaanigɔ (400) ɠɛɠala ʋilɛni polu. Kɛlɛ ti paani, naa ʋoluma zɔiti kpein ti ʋilɛni polu, naati ti vazani, gila kpalaa ge la yɛni ná. 37 Tɔun poluma, Galilee nui Zudase wuzeɠeni daasei sɛʋɛ ziɛgi zu, é nu mɔinmɔin mɛɛnni, ti ʋilɛ polu. Kɛlɛ tɔ ɓalaa, ti paani, polu nuiti pɛ ti vaza. 38 Nii niina gè bosu wo ma, naa ɠa ga, à mina yeeʋili niima nuiti ta-vai zu, à ti yɛ ná, ti li. Ni nuɓusɛiti ka ti niima vaa zeikpasui, ɓaa ma ɠɛɛwotiiti kɛɛzu, su ɠa ɠoloɠolo. 39 Kɛlɛ ni GALA ka é kɛɛzu, wo la zooga wo ʋa ti ɠoloɠolo. À dama, wo mina ʋa kɔɔi ɠɔɔzu GALA daalɔɠɔma.»

Kundiɠiiti ti vaani gooi wu. 40 Ti keelaiti tolini ʋolu, ti naati doɠa ga kpakɔi, ti tɔ sei ti ma kpaan ga ti mina mɔ ɓɔɛ Yesu laaseigi zu, naa ʋoluma ti ɓeni ti ʋa, ti li. 41 Naati ti zeɠeni tukpɔɠaaleʋe nu wolaiti kakala ga koozunɛɛi, soloo fai zu ti ma ga ti ɲɛɛɠulasui zɔlɔɔ Yesu laaseigi ma vaa zu. 42 Tama folo-o-folo GALA sei ʋɛlɛi wu ta koizuʋɛti, ti la ɠɛni ɓɔlɔzu ga kalagi woga, ta Woo Niinɛ Ʋagɔi laazeeliai ga Yesu ɠa é ga Kilista.