2 Izelayɛle, ɛsɛ nɔungi viegɛ, kɛʋele ɓɛtɛ ga é kɔɔi ɠɔ,

nuɓusɛiti ti ɓɔɠɔ veeʋɛ ga ti kɔɔi ɠɔ:

Ɠɔoɠɔ GALAGI mama!

3 Masagiti, à woilo mà! Kundiɠiiti, à woilo!

Nà guyei loozu, ungo, nɔ̀un, nà guyei loozu Ɠɔoɠɔ GALAGI ʋɛ,

gè guyei loo Ɠɔoɠɔ GALAGI lɛbi vai ma, Izelayɛle ná-GALAGI!

4 Ee, Ɠɔoɠɔ GALAGI, siɛgi zu è Seyiil ɠizei yeini la,

è ʋaai ma, è zeɠe Edɔme yooi zu,

zooi ɓalini, tonaɓiingi yeeɓeni tonai ʋa, é ʋu.

5 Gizeiti ti ɓusɛni è luɠɔ,

Sinayi gizei ná-Ɠɔoɠɔ GALAGI, Izelayɛle ná-GALAGI.

6 Anate ná-doun zunui Samegaal ná-siɛgi zu,

Yayɛle ná-siɛgi zu, peleiti kpein ti laaɠuluni,

siɛ wo nuiti ti ɠɛni ziɛzu ga kaku peleiti.

7 Ɛsɛ pɛ ge ɠɛlɛni Izelayɛle laa wolaiti ba,

ti ɠɛlɛni ti ʋa,

eyɛsu nà, Deeɓola, gè wuzeɠe,

gè wuzeɠe, eɠɛ doun deei Izelayɛle ʋɛ.

8 Izelayɛle nuiti ti yiimazeɠeni ga gala kiligiti,

gaamago nɔ, kɔɔi ʋaani ta-ʋɛlɛlaʋɛti.

Kɔɔɠɔ nui waaʋuunaanigɔ (40 000) ɠa é Izelayɛle,

kɛlɛ kɔɔɠɔ zɛpɛ gila kpalaa ge la ná, anɛɛ mɛɛn ɠila kpalaa.

9 Zìi ɠa zoolɛzu Izelayɛle ɠundiɠiiti ta-vaa zu,

ti ɓɔɠɔ veai nuɓusɛiti saama, ga ti kɔɔi ɠɔ.

À mamagi ve Ɠɔoɠɔ GALAGI ʋɛ!

10 Wɔiti wo lɛɛzu soovale saa ɠolegiti kɔma,

wɔiti wo zeini seɠe wolaiti su,

wɔiti wo ziɛzu peleiti su, à ɠigaiziɛ!

11 Niiti ti ziɛungiti kobaʋɛ, ti ɗa ziɛi ɠaaɠwɛ,

ta Ɠɔoɠɔ GALAGI ná-faanɛɛiti maamusɛzu,

ná-faanɛɛiti Izelayɛle ɠundiɠiiti tetema,

siɛgi zu Ɠɔoɠɔ GALAGI ná-nuɓusɛiti ti yeini la, taa wolai ma ziɠidaʋɛti.

12 Wuzeɠe Deeɓola, wuzeɠe!

Ɠaalɔ, guye ɠila too!

Aɓinoame ná-doun zunui Ɓalake, wuzeɠe!

Li ga ɗa-luɔiti.

13 Nui mɔtai zɛgai zobobɛ nuiti su,

GALA ge feeni naati bɛ, ga ti zei nuɓusɛiti unda,

Ɠɔoɠɔ GALAGI feeni bɛ̀, ga nɔ̀un gè ɠɛ kɔɔ ɠundiɠiiti saama!

14 Niiti ti pilɛ sɔlɔɔgai Amalɛke ma, naati kulaʋɛ Efelayime.

Ɓɛnzamɛn ʋilɛni ti ʋolu, toɠa ta-ɠɔɔɠɔ nuiti saama.

Makiil ná-pɛlɛyeɠei kundiɠiiti kulani.

Zaɓulɔn ná-bolodai ma ge gaalu bo nuiti fe, ti sɛʋɛi ɠɛ ga sɛʋɛ ɠɛ nui ná-tukpɔi.

15 Isakaal ná-kundiɠiiti ti ɠɛni Deeɓola ʋa,

Isakaal ɠa Ɓalake ʋa,

ti yeini nɛmɛi zu.

Luɓɛn ná-nuiti saama, ɓɔɠɔɠaai woni,

kpɔɛzuɠulai woni, goolaama la ɠulani su.

16 Lee vaa zu è yɛni loni togani makɛsu felegɔi yɔɠɔzu,

è ɗa woilo togani makɛ nuiti kpain gooi ma?

Luɓɛn ná-nuiti saama, ɓɔɠɔɠaai woni,

kpɔɛzuɠulai woni, goolaama la ɠulani su.

17 Galaade yɛni Zuludɛn ʋolu ʋelei.

Dan la zeɠeni ná-ɓatoiti koba.

Asɛɛl yɛni zeini kpoloɗɛi laaʋɛ,

é zeini kpɛ, ziilɛigi zu, ná-ɓato losuʋɛ.

18 Zaɓulɔn ɠa ga nuɓusɛi, nii tɛɠɛai saai zu,

Nɛfetali ɓalaagi, zenɔ ɠana é la, kɔɔɠɔzuʋɛ.

19 Masagiti, ti ziliai ga giye, Kanaan masagiti,

ti kɔɔi ʋɛɛni gi ʋa Taanake, Megido ɗɛiti pɔ bɛ,

kɛlɛ ti la liini ga ani nɔpɛ, wali ɓaa kɔɔzogani.

20 Geeɠɔlɔgi zu, somideɠaiti ti kɔɔi ɠɔɔni,

ti ʋilɛni ti ziɛ ʋeleiti ba, ti Sisela zakpe.

21 Ziɛ wolai Kison ti yɛʋɛni, é yei ga tiye,

wɔlɔwɔlɔ ɗɛ wolai, ziɛ wolai Kison.

De ziɛ ga zɛbɛi!

22 Sooiti ti leʋeni ga kpizɛi,

ti-ʋolokagiti tugi ɗa ɠula, ti-lugi ɗa ɠula zooi ma.

23 Ɠɔoɠɔ GALAGI ná-geezuɠeelai ɠɛni ma:

«À Meelɔze voovo! À foovo, wo ná-taai zu nuiti foovo!

Mazɔlɔɔ ti la ʋaani, ti ʋa ɓɔ Ɠɔoɠɔ GALAGI ʋa,

ti ʋa ɓɔ Ɠɔoɠɔ GALAGI ʋa, kɔɔɠɔ ɠundiɠiiti saama!»

24 Yayɛle ɠa ga tuya nu anzanuiti saama,

Ken nui Ɠeeɓɛɛl anzai!

Tuyai ɠa bɛ, anzanuiti saama,

niiti ti zeini seɠe ɠotaiti bu!

25 Sisela ziɛi valini ma,

é nɔnɔi veeni naa ya.

É nikɛ ɲiimi ɗɛi ma wulɔi veeni zea lɛbiya ɓɔɔle ɲakai zu.

26 É gulu ɠaazoɓagi zoni ga yeei gilagi,

é botiɠɛ nuiti ta-malitoi zeɠe ga yeezai.

É Sisela loɠani ga malitoi, é naa nɔungi ʋalini su!

É tooni, é nɔungi ɓota.

27 É zeini Yayɛle ɠɔɠɔwu,

é looni, é la.

É zeini kɔɠɔwu, é looni.

Ʋɛ é zeini ná, miná ɠa é looni ná, é zumaale, é za.

28 Maazuʋɛ, fenɛtɛlɛ laaʋɛ,

miná ɠa Sisela dee wɛlɛni ná, daavɔ, é ɠɛ:

«Lee vaa zu ná-wotoloi lɛbisu, é la ʋaazu?

Lee vaa zu ná-wotoloiti ti liizu vaa?»

29 É ɠɛni naa wosu nɔ ɠɔ,

nii ná-botiɠɛ ɠima anzanuiti ti boni:

30 «Salaʋusuiti ti kɔɔzoganiiti ka ga bɔɔlɔa,

ti ɗa ti ɠaaɠwɛ ɓɔɠɔ ʋa:

Anzalopo ɠila, ɓaa anzalopo felegɔ,

naa ve kɔɔɠɔ nui ɠilagilagi ya.

Sisela ɠa seɠe zupu ʋagɔi zɔlɔɔsu,

seɠeiti ti ʋodaai, ti zuʋuai,

seɠe zuʋua felegɔi ɠa loo zobo sɔlɔɔ nui ɠɔba.»

31 Ee, Ɠɔoɠɔ GALAGI, è zili nuiti undaaʋili ɠana!

Kɛlɛ niiti ti è nɛai ʋɛ,

naati ti volo ga foloi ɠɛʋele, a ɠɛna toa gola!