1 Naama vaiti poluma, Ezipete masagi Falaɠɔn ná-kpɔleɓɔle gani wotiɠɛ nuiti ta-ɠundiɠii ta ná-daaɠoli wotiɠɛ nuiti ta-ɠundiɠii ti ɓaaɠoni ti-maliɠii, Ezipete masagi ma. 2 Falaɠɔn yiiɠulani niima ɠundiɠi felegɔiti daalɔɠɔma, kpɔleɓɔle gani wotiɠɛ nuiti ta-ɠundiɠii ta daaɠoli wotiɠɛ nuiti ta-ɠundiɠii. 3 É ti ʋilini kasoi ɠa, masagi makɛ nuiti ta-ɠundiɠii ná-pɛlɛi wu, ʋɛ Zozɛfe makɛga ɠɛni de ná. 4 Naa ti ɠalivaani Zozɛfe ma, ga é ɗa wɛlɛ ti ma. Ti yeeɠɛɠalai ta ɠɛɛni kasoi ɠa sɛ.

5 Kpidii ta, Ezipete masagi ná-kpɔleɓɔle gani ɠundiɠii ta ná-daaɠoli ɠundiɠii, ti ɠɛni kasoi ɠa, ti felegɔ pɛ ti segi woni, ɛsɛni ta nɔnɔ ma zegi, poluʋɛ ɠɛni ti ɠilagilagi ʋa. 6 Naa ʋoluma zobui, Zozɛfe ʋaai ma ti ʋɔ bɛ, é wɛlɛni ti ʋa, ti pɛ ti ɠaazuɠiliai. 7 É Falaɠɔn ná-botiɠɛ ɠundiɠiiti gaazaɠani, ti ɠɛni tɔun ba maliɠii ná-pɛlɛi wu kasoi ɠa, é ɠɛ ti ma: «Lee vaa zu za wo-ɠaazuʋɛti ɲɔuɗai?» 8 Ti gooɠaaʋoteni, ti ɠɛ ma: «Gi segi wogɛ, kɛlɛ nu nɔpɛ ge la ná, nii a poluʋɛ wo gi ma.» Zozɛfe ɠɛni ti ma: «GALA tɛi a zoo é segiti poluʋɛti bo ɓaa? À wa-zegiti suɠula lɛɛ mà.»

9 Kpɔleɓɔle gani ɠundiɠii laalɔɔni ná-segi zu, é suɠula Zozɛfe ma, é ɠɛ ma: «Nà-segi zu, wɛlɛ, ansaɠɔ tɔkulugi ɠɛni kàkalaʋɛ. 10 Ansaɠɔ tɔkulugi naama ɓeke saʋagɔ ɠɛni ba. Siɛgi zu é lɛtɛni la, ma ʋuai ɠulani, ta ma ɠɔpɔgiti ti leezɛn ɓɔigi ve. 11 Falaɠɔn ná-kpɔɔle wɔwɔi ɠɛni zèa zoni, gè leezɛinti seɠeni, gè ti luɓa Falaɠɔn ná-kpɔɔle wɔwɔi zu, gè kpɔɔle wɔwɔi ve Falaɠɔn ya.»

12 Zozɛfe ɠɛni tɔun ma: «Poluʋɛ ɠaa: ma ɓeke saʋagɔiti ta ga folo saʋagɔiti. 13 Folo saʋagɔ a leʋena, Falaɠɔn ɠa ɗɔungi wuzeɠe, é è ɠaaɠale ma ɗa-wotii zu. Ɗa ná-kpɔɔle wɔwɔi zeizu zeezaamaʋɛ, eɠɛʋelei è ɠɛni kɛɛzu la, siɛgi zu è ɠɛni la ga ná-kpɔleɓɔle ganiiti ma ɠundiɠii. 14 Kɛlɛ nà è maanɛɛnɛzu, ɠizɛ sù, siɛgi zu è undaanɛɛzu la, nuɓɔɠɔla ɠɛ bɛ̀, è nà-faa ʋagɔ wo Falaɠɔn ma, nii a kɛ é kùla niima ɠasoi ɠa. 15 Mazɔlɔɔ ti kùlaʋɛ Eɓulu nuiti ta-yooi zu ga zeeɠaaɓaai, ʋɛ ɓalaagi gè la faa ɲɔu nɔpɛ kɛɛni, nii nà ʋili kasoɠa ma vaa zu.»

16 Siɛgi zu daaɠoli wotiɠɛ nuiti ta-ɠundiɠii kaani la ga Zozɛfe segi ʋolu ʋagɔ wogɛ, é ɠɛni ma: «Nà ɓalaa gè segi ta wogɛ, ɓulu ɓɔlɔ saʋagɔ ɠɛni zeini ùnma. 17 Kpɔlɔgi nii gaaɠoozaa ɠɛni de, daamianigi ma zii kpein ge ɠɛni su Falaɠɔn ʋɛ, kɛlɛ wɔniiti ti ɠɛni miizu kpɔlɔgi zu, é zeini ùnma.»

18 Zozɛfe gooɠaaʋoteni, é ɠɛ ma: «Poluʋɛ ɠaa: kpɔlɔ saʋagɔiti ta ga folo saʋagɔiti. 19 Folo saʋagɔ a leʋena, Falaɠɔn ɠa ɗɔungi leʋe è ʋa, é è zɛlɛ gului ʋa, wɔniiti ta è-ma zuai mi.»

20 Foloi zaʋasiɛi ma, Falaɠɔn zɔlɔɔ fai ma ɠoozunɛ yeei, é daamii nɛɛnɛ wolai ɓɛtɛni, é fe ná-botiɠɛ nuiti kpein bɛ. Ná-botiɠɛ nuiti gaazu, é kpɔleɓɔle gani wotiɠɛ nuiti ta-ɠundiɠii ɠulani, ta daaɠoli wotiɠɛ nuiti ta-ɠundiɠii. 21 É kpɔleɓɔle gani ɠundiɠii ʋilɛni mɔnɔ ná-botii ma, é ɗa kpɔɔle wɔwɔi zei Falaɠɔn yeezaama. 22 Kɛlɛ é daaɠoli wotiɠɛ nuiti ta-ɠundiɠii zɛlɛni gului ʋa. Faiti pɛ ti ʋilɛni su, eɠɛʋelei nɔ Zozɛfe ta-zegiti poluʋɛti boni la. 23 Kɛlɛ kpɔleɓɔle gani wotiɠɛ nuiti ta-ɠundiɠii la ɠɛni ɠizɛni Zozɛfe zu, é yeemani ma.