1 Zakɔɓe zeini Kanaan yooi zu, ʋɛ kɛɛɠɛ seikɔɠɔmai ɠɛni ná. 2 Zakɔɓe ná-pɛlɛyeɠei ná-fai ʋɛtɛ. Zozɛfe kona puugɔ maazu lɔfela (17) ɠulaai ma, ti ɠɛni togani ɓulugi makɛsu ta diɛni kɛɛɠɛ anzai Ɓileɠa ná-doun zunuiti ta Zilepa ná-doun zunuiti. Zozɛfe ɠɛni ti maalɔɔzu, é ɗa ti ziɛ ʋele ɲɔiti bo ti-ɠɛɛ ma. 3 Zozɛfe nɛɛni Izelayɛle ʋɛ, é leʋe zɔɔma lointi ba, mazɔlɔɔ é naa zɔlɔɔni pɔlɔzaɠa siɛgi zu. É seɠe ʋɔnɛ papa feeni bɛ. 4 Diɛni ti kaani ga nɛɛʋɛ ti-ɠɛɛ ʋɛ, é leʋe ti kpein ba. Ti wɔinzeɠeni, ti la ɠɛni zoosu ti ʋa ɓɔɛ pɔ ga nɛɛnɛgi.

5 Zozɛfe segi ta woni, é ɗa li, é suɠula diɛni ma, naati ti wɔinzeɠeni mɔnɔ ʋolu. 6 É ɠɛni ti ma: «À woilo segi naa ma, nii gè bogai! 7 Gè ade ɠaani, de ɗa moloi ɠili ba kpalagaʋɛ. Nà-molo ɠilii wuzeɠeni, é lo, wɔnɔ ma molo ɠiliiti ti ɠoolini ma, ti ɗa nɔkɔ bu.» 8 Diɛni ti ɠɛni ma: «Ɗa kaazu ga ɗa ɠɛɛzu ga masagi, è zei gi unda, è ɗa gi leve?» Ti wɔinzeɠeni mɔnɔ sɛsɛ, ná-segiti ta daawooiti maaʋele ma.

9 É segi taɠili boni mɔnɔ, nii é suɠulani diɛni ma. É ɠɛni ti ma: «Gè segi ta wogɛ mɔnɔ. Gè foloi ɠaani, ta alugi, ta somideɠa puugɔ maazu ɠilagiti (11), ti ʋaani, ti nɔkɔ bù kàkalaʋɛ.» 10 É suɠulani kɛɛɠɛ ta diɛni ma, naa zelii lo ma, é ɠɛ ma: «Segi naa ʋoluʋɛ ɠa ga lee, nii è bogai? Ɗa kaazu ga nà-o, è-lee-o, gá è-liɛni, gi kpein gá ʋaazu, gi nɔkɔ è wu?» 11 Diɛni ti ɠɛni toloi ɠulazu la, kɛlɛ kɛɛɠɛ naama vaiti makɛni ɠigi zu.

12 Zozɛfe diɛni ti liini Sikɛme lugiti su ʋele, ga ti ti-ɠɛɛ ná-togani ɓulugi makɛ. 13 Izelayɛle ɠɛni Zozɛfe ma: «Nà pɔ gè è leʋe è-liɛni pɔ bɛ, ti togani ɓulugi makɛsuʋɛ Sikɛme.» É gooɠaaʋoteni, é ɠɛ ma: «Kɛ̀ɛ, nà ɠaa.» 14 Izelayɛle ɠɛni ma: «Li, è è-liɛni pɛtɛ, ni ti ɠɛdɛgɛ, ta ni faa nɔpɛ ge la toganiiti ba, è ɠale ma, è ʋa ga ti-maawoo ʋagɔi pɔ̀.» É Zozɛfe leʋeni ɠana, é zeɠe Ɠeeɓelɔn nɛmɛi zu, é li Sikɛme ʋele zɔli.

15 Ti ɠomini ta zunui ta, é ɗa diɛni ɠaiziɛ dɔɓɔi zu. É gaazaɠani, é ɠɛ ma: «Leeni ɠa è gaiziɛzu?» 16 Zozɛfe gooɠaaʋoteni, é ɠɛ ma: «Nà dìɛni gaiziɛzu. Nà è maanɛɛnɛzu, ná lɛ ga ze, ʋɛ dìɛni ti togani ɓulugi makɛsu ná.» 17 Zunui ɠɛni ma: «Ti zeɠeʋɛ, ti li, tɔɔzei gè mɛnini, ti ɗa ɠɛ: ‹Ade li Dɔtan.› » Zozɛfe ʋilɛni diɛni kɔɠɔ ʋogi ʋa, é ɗa li, é ti ɠa Dɔtan.

18 Ti kaai ma ɠoozama, kɛɛzu é maaɓuɠa ti ʋa, ti yaavai ɠilini ma ga ti paa. 19 Ti ɠɛni ɓɔɠɔ ma: «Se bo nui ʋɛtɛ, é ʋaazu. 20 À ʋa, ade paa, de pili zeɠezaɠai taɠila su. Ada ɠɛ ma nɔ sua vilɛi ta ɠa é sogai, da pɛtɛ naazu ʋelegi ná-segiti ti ʋaazu ɠɛɛzu la.»

21 Siɛgi zu Luɓɛn naa mɛnini la, é Zozɛfe maaloboni, é ɠɛni pɔ, é kula ti ya. É ɠɛni ti ma: «Ade mina zɛnvui ɠula zea.» 22 Luɓɛn ɠɛni ti ma mɔnɔ: «À mina ɲamai ʋu! À seɠe, wo pili zeɠezaɠai nii zu, é teʋebai zu, kɛlɛ à mina yeeloo ma.» É ɠɛni ɠisiɛzu ga é kizo, nii a kɛ é gaaɠale ma, é li kɛɛɠɛ ʋɔ bɛ.

23 Siɛgi zu Zozɛfe zeelini la diɛni pɔ bɛ, ti ná-seɠe ʋɔnɛgi ɠulani ma. 24 Ti soni, ti seɠe, ti pili zeɠezaɠai ɓogi zu, nii suɲakai ɠɛni de, ziɛ nɔpɛ ge la ɠɛni su.

25 Ti zeini naa ʋoluma, ti ɗa daamii wo. Ti ɠaazuwuzeɠeni, ti wɛlɛ, ti Isemayɛle nuiti ma ʋɛbɛi ɠa, ti ɗa ʋa, ti zeɠe Galaade, ta-ɲɔmɛiti kasɔɠiliai ga gulu mana maku nɛɛnɛgi ma aniiti, ti ɠɛni liizu ga tiye Ezipete yooi zu. 26 Ná nɔ, Zuda ɠɛ kɛɛɠɛleaiti ma: «Lee ɠulanuma ɠa da sɔlɔɔ, da de-leɠei ʋaana, de ma ɲamai lɔɔɠu? 27 Ade li, de pɔdi Isemayɛle nuiti ma, de mina yeevɔɔɠu ba, mazɔlɔɔ de-leɠei ɠa ga de-ma ɲamai ta!» Kɛɛɠɛleaiti ti woiloni goo ma. 28 Yaaɠoiti ti ɠɛni zeɠezu Madiyan, naati teʋesuʋɛ, ti Zozɛfe mɛɛnni, ti tɛ, ti kula zeɠezaɠai zu, ti pɔdini Isemayɛle nuiti ma ga wali ɠae ʋuufelegɔ (20), naati ti lii la Ezipete yooi zu.

29 Siɛgi zu Luɓɛn ʋaani la ʋolu zeɠezaɠai laaʋɛ, Zozɛfe la mɔ ɠɛni su. É ɠɔba zeɠeiti balini ga, iɲɔ ge leʋe. 30 É ɠaleni ma kɛɛɠɛleaiti pɔ bɛ, é ɠɛ ti ma: «Doungoi la mɔ ná! Leeni ɠa nà kɛ?» 31 Ti Zozɛfe ná-seɠei zeɠeni, ti boli zinɛi ɠɔdaaleʋe, ti dɔ ma ɲamai wu. 32 Ti ná-seɠe ʋɔnɛgi leʋeni ti-ɠɛɛ ma, ti ɠɛ ma: «Wɛlɛ nii ɠa gi kaai! Pɛtɛ, ni è-loun zunui ná-seɠei laade.» 33 Zakɔɓe kwɛɛni, é ɠɛ ma: «Dòun zunui ná-seɠei ʋe! Sua vilɛi ta soga! Zozɛfe ʋaliʋalia ga!» 34 Zakɔɓe ná-seɠeiti balini ga, é zaamaɠili ga saa wɔlɔ wo seɠei, é folo mɔinmɔin kɛɛni ná-doun zunui ná-saa wɔlɔi ɠa. 35 Ná-doun zunuiti ta ná-doun anzanuiti kpein ti ʋaani gaanɛɛnɛzu, kɛlɛ é la ɠɛni yeezeini gaanɛɛnɛ nɔpɛ bu. É ɠɛni ɠɛɛzu ti ma: «Nà yɛsu wɔlɔzu, eyɛsu gè yei dòun zunui ʋɔ bɛ gɔvɛalaazu!» É ɠɛni ba nɔ, é ɗa wɔlɔ ná-doun zunui zaa vai zu.

36 Madiyan nuiti ti Zozɛfe ʋɔdini Ezipete yooi zu Pɔtifaal ma, Falaɠɔn ná-kundiɠi zeiɗai ta, masagi makɛ nuiti ta-ɠundiɠii.