1 Aɓalame anzai Salayi la ɠɛni doun zɔlɔɔni bɛ ɲɛgɛlɛin. Kɛlɛ duɔ anzanui ta ɠɛni zea, daaseigi ɠɛni ga Agaal, é ɠɛni ga Ezipete yooi zu nu. 2 É ɠɛni Aɓalame ma: «È kaa ga Ɠɔoɠɔ GALAGI la vaani bu ga gè doun zɔlɔɔ. Li, è ʋilɛ nà-duɔ anzanui ʋolu, tanisu nà doun zunu zɔlɔɔ ga maaʋele.» Aɓalame ziɛni ga anzai Salayi ná-tɛnɛ gooi. 3 Aɓalame anzai Salayi ná-duɔ anzanui, Ezipete nui Agaal zeɠeni, é fe sinigi Aɓalame ya ga anza. Aɓalame zeini niina Kanaan yooi zu, é kɛ ná ga kona puugɔ. 4 É ʋilɛni Agaal ʋolu, naa kogi zeɠe. Siɛgi zu é ɓɔɠɔ ɠaai ma ga kogi ɠa ma, é ɠɛni bɛlɛlala wɛlɛi wosu ná-duɔ deei ʋa.

5 Salayi ɠɛni Aɓalame ma: «Poomugi é zeelizu mà, ɗa ɠa è unma ɠasɔ ʋe. Nà ɓɔɠɔi ɠa gè nà-duɔ anzanui zeɠea, gè da è ʋolu, siɛgi zu é kaa la ga kogi ɠa ma, é ɗa bɛlɛlala wɛlɛi wo ga ze. Ɠɔoɠɔ GALAGI ɠɛ ga tukpɔɠaaleʋe nui de yɔɠɔzu.» 6 Aɓalame Salayi wooɠaaʋoteni, é ɠɛ ma: «Ɗa-luɔ anzanui ɠa è yeezu. So, eɠɛʋelei nɛai la è ʋɛ.» Salayi zɛba é ɗa sopele ɲɔu, eyɛsu naa ʋela ba.

7 Ɠɔoɠɔ GALAGI ná-geezuɠeelai kaani ziɛungi ɠobaʋɛ teʋebai zu, nii é Suul ʋelei zu. 8 É ɠɛni ma: «Salayi ná-duɔ anzanui Agaal, mini ɠa è zeɠeai ná, mini ɠa è liizu ná?» É gooɠaaʋoteni, é ɠɛ ma: «Nà ʋelazu nà-duɔ deei Salayi ʋa.» 9 Ɠɔoɠɔ GALAGI ná-geezuɠeelai ɠɛni ma: «Ɠale ma ɗa-luɔ deei ʋɔ bɛ, è ɓɔɠɔ unmaayei bɛ.» 10 Ɠɔoɠɔ GALAGI ná-geezuɠeelai ɠɛni ma mɔnɔ: «Nà è-mavofodai mɔinzu, toɠa mɔin gola, nu nɔpɛ ge la zooga é ʋa gaalu.» 11 É ɠɛni ma mɔnɔ: «Wɛlɛ, ɗa doun zɔlɔɔsu, toɠa ɠɛ ga zunu loun. Ɗa daasei pɛɛ ga Isemayɛle,* Isemayɛle: daaseigi nii ti maaɓuɠaai ʋa ta «GALA ge mɛnigɛ.» mazɔlɔɔ Ɠɔoɠɔ GALAGI è woomɛnini ɗa-ɠoozuʋiligi zu. 12 Toɠa ɠɛ ga dɔɓɔi zu zoovalegi, toɠa ɠɛ ɛsɛ pɛ daalɔɠɔma, ɛsɛ pɛ ge ɠɛ daalɔɠɔma, toɠa zeɠe kɛɛɠɛlointi pɛ ba, é zei yɛ.»

13 Agaal ɓɔɠɔ ɠaazaɠani, é ɠɛ ma: «Gè GALA ɓɔɠɔi ɠaaʋɛ nɛi ɓaa, nii é nɔ̀un kaazu?» Ɠɔoɠɔ GALAGI nii é ɓɔɛni tɔun pɔ, é naa laasei pɛɛni ga Ata-Ɛle-Lɔyi.† Ata-Ɛle-Lɔyi: daaseigi nii ti maaɓuɠaai ʋa ta «ɗa ga GALAGI nii é kàazu.» 14 Naa ɠa é ba, ma ɠɔlɔyeɠei laasei pɛai ga, Laɠayi-Lɔyi ɠɔlɔyeɠei,‡ Laɠayi-Lɔyi ɠɔlɔyeɠei: daaseigi nii ti maaɓuɠaai ʋa ta «nii é vulua, é ɗa kà, naa ná-kɔlɔyeɠei.» Toɠa Kadɛseni ta Ɓeelɛde zɔɠɔzuʋɛ.

15 Agaal doun zunu zɔlɔɔni Aɓalame ʋɛ, naa daasei pɛɛni ga Isemayɛle. 16 Aɓalame ná-konagi ɠɛni ga puulɔsaʋa maazu lɔzita (86), siɛgi zu Agaal Isemayɛle zɔlɔɔni la bɛ.