1 Davide wuzeɠeni, é li, Zonatan ɓalaa ge ɠale ma, é lɛ taazu.

2 Davide liini Nɔɓe, zalaɠa ɠula nui Ayimeelɛke ʋɔ bɛ. Naa kaai ma, é daaɠomini ga kpalii, é gaazaɠa, é ɠɛ ma: «Lee vaa zu ɗa ɠila è ʋaazu, nu nɔpɛ ge la è ʋolu?» 3 Davide gooɠaaʋoteni, é ɠɛ ma: «Masagi tèʋegɛ keela ma, é ɠɛ: ‹Nu nɔpɛ ge mina faa ɠwɛɛ niima vai zu, nii gè è leʋesu ma, ta devei nii gè feezu è ya.› Naa ɠa é kɛa, gè ada lɛa ga nà-nuɓusɛiti ga gi ɠomi ná. 4 Daamiani kpɛgele ɠa é è ya ɠani? Ɓulu lɔɔlugɔ ve zèa, ɓaa nii nɔpɛ ɗa sɔlɔɔ.»

5 Zalaɠa ɠula nui gooɠaaʋoteni, é ɠɛ ma: «Ɓulu ɠili ge la zèa, kɛni nii makɛgai Ɠɔoɠɔ GALAGI ʋɛ. Ɗa zoo ti zeɠezu, è li ga tiye ɗa-nuiti bɛ, ni ti la anzanu vaa ɠɛɛni niizuʋɛ.» 6 Davide gooɠaaʋoteni, é ɠɛ ma: «Siɛnɔpɛ su gi nii ɠɛɠala vai ta ma la, tɔ ka gi ma, é ʋilɛ anzanu vai ʋa. Ni gá ɠɛna lia kɔɔɠɔzuʋɛ ta nɔ, nà-siɛpoluiti pɛ ta-ɠɔɔɠɔ zɔɔlaiti pɛ ɲadegɛ, toɠa ɓudɛ naa maazu, niima ziɛi zu.» 7 Zalaɠa ɠula nui ɓulu ɲadegai naati feeni Davide ya, mazɔlɔɔ taɠili ge la ɠɛni ná. Ɓului naati fea ɠɛni de Ɠɔoɠɔ GALAGI ʋɛ, naa ʋoluma ti ti ɠulani zalaɠa ɠula laɓalii ɠa, ti maavalibo fai zu ga ma niinɛi.

8 Naama voloi, Sayile ná-botiɠɛ nui ta ɠɛni Ɠɔoɠɔ GALAGI ná-zalaɠa ɠulazuʋɛ, ga é fai ta ɠaaɠula ba, ti yɔɠɔzu ta GALA. É ɠɛni ga Edɔme nu, daa ga Dɔwɛge, tɔ ɠa é ɠɛni ga Sayile ná-baala makɛ nuiti ta-ɠundiɠii. 9 Davide zalaɠa ɠula nui Ayimeelɛke ɠaazaɠani ʋolu, é ɠɛ ma: «Kpɛɛin la è ya, ɓaa boɠa zɔkpɔ? Masagi ná-keela ziɛgi nii ɠɛɛʋɛ ga gaazuvilɛ vaa, tɔ ɠa é kɛa gè la ná maazɔlɔɔni, gè ʋa nà-boɠa zɔkpɔi zeɠe, ɓaa kɔɔɠɔ zɔɔlai taɠili.» 10 Zalaɠa ɠula nui gooɠaaʋoteni, é ɠɛ ma: «Filiseti nui Gɔliate ná-boɠa zɔkpɔi ɠa é ʋɛ, nii è paani Ela pɛtugi zu. Maavelevelegɛ seɠei ta zu, toɠa laani zalaɠa ɠula zeɠei ʋoluʋɛ. Ni ɗa pɔ ga è seɠe, seɠe, tɔɔzei taɠili ge la gi ya ʋɛ, kɛni tɔ nɔ.» Davide ɠɛni ma: «Fe zèa, tɔɔzei kɛɠala la ná.»

11 Davide wuzeɠeni, é ʋela Sayile ʋa, naama voloi nɔ. É liini Akise ʋɔ bɛ, Gate masagi. 12 Akise ná-botiɠɛ nu wolaiti ti ɠɛni ma: «Davide la ga nii ɓaa, zooi ma masagi? Nii lɛi ti ɠɛni guyei loozu bɛ, ti ɗa kuai wo, ti ɗa ɠɛ ma:

13 Davide naama wooiti seɠeni ga sɔɓelama vaa, é wola lua Gate masagi Akise ʋa. 14 Davide ɓɔɠɔ ɠɛɛni ga ɓoloɠa nui Filiseti nuiti gaazu, é ɗa zeeʋozɛbaiti kɛ kpogiti ma, é ɗa ɓe daaɗɛ ɲagi ʋa, naa ɗa yei kpɛlɛi ɠa. 15 Akise ɠɛni ná-botiɠɛ nu wolaiti ma: «Wa kaazu wa ɓɔɠɔi ga zunui tɛi nɔungi zeɠea ma! Lee vaa zu wo ʋaazu la pɔ̀? 16 Ɓoloɠa nu ʋala ka é mà ɓaa, wo ʋaazu ga niima gelei ga é ɗa ɓoloɠa vaiti kɛ gàazu? Wa ɠisiɛzu ga nii ɠa lɛɛzu nà-pɛlɛi wu ɓaa?»