1 Man Paul on a Yesu Kiristo tumtum, ka Winaꞌam buol m ye m a Yesu Kiristo Tumtum la, ka gaŋi m tum ye m mool o labasuŋ la, sobid neꞌ. 2 Winaꞌam da deŋim ziꞌel noor labasuŋ la yela, ka li yi o nodiꞌesidib saꞌan, line sob Winaꞌam gbauŋin, 3 ka ane Winaꞌam Biig ti Zugsob Yesu Kiristo la yela. Ti yaꞌa tenꞌes on a ninsaal la yela, ti miꞌ ye o ane David yaaŋ. 4 Ka ti yaꞌa tenꞌes on a Winaꞌam ka a suꞌum nyain la yela, ti nye ka Winaꞌam vuꞌug o kumin, ka ala ka o paꞌal ne paŋ ye o ane o Biig. 5 Winaꞌam tis mam o popielim piini n ke ka m aa o Tumtum ka li yi ne ti Zugsob Yesu Kiristo la ni na, ye m ke ka dunia buudi wusa niŋ o yadda ka siak o noor, ti Zugsob yuꞌur zug. 6 Ka yanam meŋ bane ka Winaꞌam gaŋi ya ye ya aa Yesu Kiristo nidib la, me paꞌasi ani.

7 M sobid gbauŋ kaŋa n tisid yanam bane wusa be Room teŋin ka Winaꞌam noŋi ya ka gaŋi ya ye ya aa o meŋ nidib gullim la.

Ti Baꞌ Winaꞌam ne ti Zugsob Yesu Kiristo la na tisi ya yelsum ne sumalisim.

8 Yiiga daan m puꞌus Winaꞌam bareka Yesu Kiristo ni, ya wusa zug, ka me puꞌus o dunia wusa wum ya yadda niŋir labaar la zug, 9 ka yiti tiendi ya yela m puꞌusugin saŋa wusa. Winaꞌam on ka m tum o tuuma ne m yaꞌam wusa n moon labasuŋ o Biig la yela la, miꞌ ye man yel siꞌel la ane sida. 10 M sos Winaꞌam ye o boodim na yuꞌun ke ka m nyaŋe kena n kaae ya nannanna.

11 M yaꞌamleog be ya saꞌan hale ka m bood ye m nyee ya, ka ke ka ya na diꞌe piini line yi Winaꞌam Siig Suŋ ni na la, ka ya na nye paŋ. 12 Man yel siꞌel la ane ye, mam ne yanam na laꞌam nye suŋir. Ka yanam na suŋ mam, ka mam me na suŋi ya, ti yadda niŋir Winaꞌam poogin la.

13 M baꞌabiise m bood ye ya baŋ ye m mo noor siꞌem sa, ye m kena kaae ya. Ka saŋkan la sa ne nwa, ka yel sieba viꞌi m ka m pu nyaŋe. Ka m bood ye m ke ka Room dim sieba tiake ba sunya ka dol Zugsob la, wuu man niŋ bane kaꞌ Jew dim buudi sieba la ni siꞌem la. 14 Mam di nidib wusa sam labasuŋ la yela, Greek dim ne bane kaꞌ ba buudi, nimbane ka ba nini nie ne nimbane ka ba nini pu nie. 15 Dinzug ka m me bood hale ye m mool labasuŋ yela la yanam bane be Room teŋin la saꞌan.

16 Li ane labasuŋ la ni, ka Winaꞌam paŋ ke ka nimbane wusa niŋ o yadda la nyet faangir, Jew dim la yiiga laꞌam ne bane kaꞌ Jew dim la. Linzug ka nyan pu mor m labasuŋ la yelaa. 17 Li paꞌani ti Winaꞌam niŋid siꞌem n ke ka ti aa popielim dim o tuon. Ka li ane ti yadda niŋir Yesu Kiristo ni gullim ke ka ti mor popielim. Li dolne lin da sob Winaꞌam gbauŋin ye, “One a popielim daana Winaꞌam tuon la na voe ne o yadda niŋir Winaꞌam ni.”

18 Winaꞌam supeen nieya, ka yit arazana ni lut nidib tuumbeꞌed ne nimbane tum beꞌed ka li pu dol Winaꞌam suere zut. Ka ba viꞌid yelsida ne ba tuumbeꞌed, ka li pu tumi ba nii. 19 Bun lin ka ninsaal na tunꞌe baŋ Winaꞌam yela la, nie nyain ba saꞌan; ka Winaꞌam meŋ nie li paꞌali ba. Dinzug ka o supeen li na. 20 Hale saŋkan ka Winaꞌam da maal dunia sa la, nidib nyet Winaꞌam maal siꞌel. Ka linzug ka ba gbanꞌe li gbin ka baŋ Winaꞌam a siꞌem laꞌam ne ban pu nye o ne ba nini laa, ka baŋ ye o mor paŋ kane kaꞌ naare, ka a Winaꞌam. Ka dinzug ka ba ku nyaŋe yel ye ba ziꞌ Winaꞌam yelaa.

21 Ba pu tis o naꞌasi kan ka o nar ye o diꞌe laa, ka pu puꞌus o bareka, laꞌam ne ban miꞌ ye o be laa. Ka ba tenꞌesug lieb zolim. Ka ba yaꞌam a yoog, ka ku nyaŋe gbanꞌe siꞌel gbin ne. 22 Ba yel ye ba ane yaꞌam dim, ka lee a zon, 23 ka pu naꞌasid Winaꞌam one mor naꞌam ka ku kpi laa, ka lee tiake naꞌasid siꞌelnam bane ka nidib maan, ka ba wenne ninsaalib bane na kpi la, bee niis bee bunkonbid bee siꞌelnam bane vuudi ba poya zut ne.

24 Dinzugo, Winaꞌam basi ba ye ba niŋ dianꞌad dine ka ba yaꞌam bood ka diis taaba nyan ba niŋgbina ni. 25 Ba basid Winaꞌam yelsida la ka pu naꞌasid Winaꞌam one maal siꞌel wusa laa, one nar ne zunꞌor saŋa line kaꞌ naare, ka lee dol damaꞌar, ka naꞌasid dine ka Winaꞌam maal la, ka maane li maluŋ.

26 Dinzug Winaꞌam basi ba ye ba niŋ ba yaꞌamleog dine mor nyan. Ka poꞌabi naan dig ne dap la wuu Winaꞌam bood ye li a siꞌem la. Ka ba basi li ka lee dig ne taaba. 27 Ka dap la me bas poꞌab la. Ka yaꞌamleog more ba bedego ba dap taaba yela. Ka dap niŋid siꞌelnam dine mor nyan ne taaba. Ka dinzug ka ba diꞌed namisug kane ka ba nar ne ba diꞌed la ba meŋ niŋgbina ni, ban niŋid siꞌel la yela.

28 Ka ninsaalibi zanꞌas ye ba mor yelsida Winaꞌam yela ba potenda ni la zug, Winaꞌam basi ba ye ba mor yaꞌamyoog ka niŋid dine ka ba pu nar ye ba niŋida. 29 Ka bunbeꞌed buudi wusa more ba. Ka li a bun bugusum, ne fufum ne kisug ne nennim ne ninkuud ne zaba ne damaꞌar ne sutoog. Ba keend, 30 ka pianꞌade saꞌamid ba taaba zut, ka kis Winaꞌam, ka a nimponannib, ka mor nyeesim, ka nweꞌedi ba meŋ nyoꞌog, ka ied suepaal n na tum tuumbeꞌed, ka zanꞌasid ba manam ne ba saamnam noya, 31 ka a ninyood, ka pu doli ba noziꞌelugo, ka pu mor noŋir ne ba taaba saꞌane ka me pu zoti nimbaanliga. 32 Ba miꞌ ye Winaꞌam suer poogin, ninkane niŋid bunbeꞌed bama nar ne kuꞌum, ka zanꞌas ka kpelim niŋid ala. Ka line a beꞌed gaad ala, ane ye ba me yel ye nimbane niŋid ala ane ninsuma.