1 Man Juud one a Yesu Kiristo tumtum ne Jemes baꞌabiig la, sobid gbauŋ kaŋa tisid bane ka ti Baꞌ Winaꞌam buol ka noŋi ba, ka Yesu Kiristo guri ba la.

2 Winaꞌam na zoo ya nimbaanlig bedego, ka peꞌesi ya sumalisim ne noŋir ka li galis.

3 M zuanoŋa, m mor nimmua hale ye m sobi tisi ya faangir line aa ti wusa din la yela. Li nar ye m saꞌali ya ye ya mo ne bane bood ye ba saꞌam paꞌalug line ka ti siak ka Winaꞌam niŋi o nidib nuꞌusin vuguri la. 4 Ba suaꞌ gendig ne ya, ban bane ka kudumin dim da sob ban niŋ siꞌem la, ye ba ane bane ziꞌ Winaꞌam ka tiake o popielim piini la ka li ke ka ba tum tuumyaalis, ka kiꞌisidi Yesu Kiristo one a ti kpiꞌeuŋ sob ne ti Zugsob gullim la.

5 Ya da deŋim baŋi li suꞌuŋa amaa m bood ye m tienn ya ye Winaꞌam a one da faaenn o nidib Egipiti teŋin la, ka li nyaꞌaŋ ka o da ku ba sieba bane pu niŋ o yadda la. 6 Ka Winaꞌam lo maleknam bane me da basi ba soꞌolim ka bas line sid aa ba beilim zinꞌig la, ne bana bane kaꞌ saꞌuŋo, ka guri ba likin n ti paae dabistitaꞌar saria kadib la. 7 Ala men ka Sodom ne Gomorra dim ne teens bane kpiꞌe ba la da niŋ dianꞌad tuuma ne tuumyaalis, ka da nye namisug ba tuumbeꞌed yela, line a bugum line pu kpiigida, ka li a saꞌalug n tisi ti.

8 Ka laꞌam ne wala nimbama nwa bane ziꞌ Winaꞌam la kpelim dol zaansuma line ke ka ba dianꞌadi ba meŋ, ka zanꞌas kpiꞌeuŋ dim ka tuꞌud bane mor paŋ n be agol la. 9 Hale malek kpeenm, Maikel on da mood ne Sutaana, ka da nwaꞌasid Moses niŋgbiŋ yela, on da kpi la, da pu kpiꞌem ye o koos o ne tuꞌude, amaa ka lee yel ye, Zugsob la na tans o. 10 Amaa nimbama nwa tuꞌud line mekama zuꞌe gaadi ba yaꞌam baŋir. Ka yelbane ka saal miꞌ ba niŋgbiŋin wuu bunkonbane pu tenꞌesid la, na ke ka ba saꞌam.

11 Ba tuund Kain tituunli ka pesigi ba meŋi ne suebeꞌed wuu Balaam ye ba nye nyood, ka kpi men wuu Kora ne sieba da zanꞌas Winaꞌam noor ka kpi siꞌem la. Dinzug li na toe n tisi ba.

12 Ba ane bane mor gbada ya noŋilim diib diibin ka laꞌam di ne taaba ne nyeesim n suŋidi ba meŋ maꞌaa. Ba wenne saŋgbana bane kaeꞌ sakuꞌom ka sisiꞌem daꞌad, ne tiis bane pu mor welaa, ba welib saŋaa. Ba kpine tol ka ba voonn ba bas. 13 Ba lem wenne moꞌar kuꞌopilbeda n daꞌad pumpuum line a ba nyan tuuma, ka lem wenne nwadibibis bane goond ka Winaꞌam tiꞌeb lik titaꞌar n guri ba saŋa kane kaꞌ benne.

14 Li ane nimbama yela ka Enok one a tuŋ ayopoi line pinꞌil Adam ni na la, da diꞌe Winaꞌam pianꞌad n tis nidib ye gosimi, Winaꞌam na kena ne o maleknam tusa piiga 15 ye saalib wusa nyee ba tuumbeꞌed namisug. O na koos tuumbeꞌed dim bane pu dol Winaꞌam suere, ban tum tuumbeꞌed ka pu mor yaꞌa ne Winaꞌam la, ne ban pianꞌad pianꞌabeꞌednam n kiꞌisid o la. 16 Ba ane nyuyolug dim, ka niŋidi ba saalib boodim, ka a bane nweꞌed nyoꞌog hale, ka mor noŋgban malisiŋ ye ba nye nyood.

17 M zuanoŋa, tenri yelkan ka ti Zugsob Yesu Kiristo Tumtumnib da deŋim pianꞌ ye li niŋ la. 18 Ba da yeli ya ye naar saŋa la, ka ninlaꞌadib na be, bane laꞌad Winaꞌam ka dol saalib yaꞌamleog boodim ka pu dol Winaꞌam suere. 19 Nimbama nwa taꞌasid weligir na. Ba ane saalib maꞌaa ka Winaꞌam Siig Suŋ kaꞌa ba nii.

20 M zuanoŋa, yanam lee suŋimi taaba n kpeꞌeŋ ya Winaꞌam yadda niŋir line a nyain la, ka ke ka Winaꞌam Siig Suŋ suŋi ya ne ya Winaꞌam puꞌusugin. 21 Kpelim niŋimi ya meŋ Winaꞌam noŋilimin ka guri ti Zugsob Yesu Kiristo nimbaanlzoor line taꞌasid nyovur dine kaꞌ naare.

22 Suŋimi bane yamisid la. 23 Faanmi sieba n teegi ba yiis bugumin na. Ka lem zo nimbaanlig ne sieba amaa ka mor dabiem zotim ne ba, amaa kisigimini ba fuud line ka saalib yaꞌam boodim dianꞌa ba la.

24 Winaꞌam a one na nyaŋe guri ya ka ya ku lu tuumbeꞌedin ne, ka na more ya keŋe o tuon line a o naꞌam paŋ zinꞌigin ka gbada kaeꞌ, ka sumalisim be bedego. 25 On one a Winaꞌam gullim, ka a one faandi ti ka li yi ti Zugsob Yesu Kiristo saꞌan na la, nyet naꞌasi ne soꞌolim ne kpiꞌeuŋ saŋsiꞌen sa, ne nannanna, ne saŋa line kaꞌ naare. Ami.