1 Yadda niŋir zug ka ti mor tiꞌir ne line ka ti gur la ne line ket ka ti miꞌ bun lin ka ti pu nyet ne nini la yela. 2 Ka li da ane kudumin dim yadda niŋir yela ka Winaꞌam da tisi ba pianꞌasuŋ.

3 Yadda niŋir zug ka ti baŋ ye Winaꞌam maal dunia ne o pianꞌad, ka bun kane ka ti nyet la, kaꞌane bun line da be ka nidib nyeta.

4 Yadda niŋir zug ka Abel da maal maan n tis Winaꞌam, ka li a suꞌum n gaad Kain maan la. O yadda niŋir zug ka Winaꞌam diꞌe o piini la ka tisi o pianꞌasuŋ ye o a popiel sob la. Ka o yadda niŋir zugo, hale baa on kpi la, ba kpelim tiendi o tuuma yela.

5 Yadda niŋir zug ka Winaꞌam da nok Enok du agol ka o pu kpii, ka ba da pu nye oo, on da nok o la zug. Ka on da nam pu nok o la, ka Winaꞌam yel ye o tuuma maꞌed o suunr. 6 Ka yadda niŋir yaꞌa kaeꞌ, soꞌ ku nyaŋe maꞌae Winaꞌam suunre. Ka one bood ye o liꞌel Winaꞌam, asee o siak ye o be, ka me siak ye o na tis bane ied o ne yelmeŋir la ba yood.

7 Yadda niŋir zug ka Winaꞌam da deŋim saꞌal Noa ne nimmua ne yelbane ka soꞌ nan ziꞌ nye la, ka o siaki maal aaruŋ titaꞌar n faaenn o yidim la. Noa yadda niŋir tuuma paꞌal ye dunia dim kaꞌa suꞌum. Ka o diꞌe noziꞌelug line a popielim ka yi o yadda niŋirin la.

8 Abraham yadda niŋir zug ka Winaꞌam da buol o la, ka o siak Winaꞌam noor ka yi keŋ teŋ kan ka o na ti diꞌe digil o yaas ka li a ba faar, hale baa on da ziꞌ one ken teŋsiꞌa ni la. 9 Ka yadda niŋir zug, ka Abraham daa kpenꞌ teŋ kan ka Winaꞌam da puꞌulum tis o la wuu o ane saan n be teŋzuŋin ka tiꞌ fuug doog n be la. Isaak ne Jakob me daa diꞌe faar kan la. 10 Ka o mor potenꞌer ne teŋ kan ka li eenbir kpiꞌem. One maan teŋ la ka ba meed, ne one meedi li la, a Winaꞌam.

11 Yadda niŋir zug ka baa Abraham n daa kudug, ka o poꞌa Sara a kunduꞌar la, o daa nyaŋe duꞌa, on daa miꞌ ye Winaꞌam one ziꞌel noor la a sida sob la zug. 12 Dinzug ka dau nwa, one kudug ka pu lal ne kuꞌum, ka yaas bedego yi o ni na n a bedego wuu nwadibibis la, ka len a wuu moꞌar noorin titanbiise la.

13 Ka nimbama wusa kpine ne yadda niŋir ka nam pu diꞌe noziꞌela laa, amaa ka nyee li lalli, ka ba sunya malis, ka siak ye ba da a saam ne zooma dunia ni. 14 Ka bane siakid anwa la, paꞌal ye ba iedne ba meŋ teŋ. 15 Ba yaꞌa da tenꞌesid teŋ kan ka ba yi la na, ba naani moren suer ye ba leb ani. 16 Ka lin a siꞌem la, ba boodne arazana line a teŋsuŋ hale la. Dinzugo, Winaꞌam pu zot nyan ye ba buol o ye ba Winaꞌam, on tiꞌeb teŋi tisi ba la zug.

17-18 Ka yadda niŋir zug ka Abraham da nok o biyimir, Isaak, ye o maal maani tis Winaꞌam on da tis o noor ye o mak o la. Li ane Isaak on yela ka o diꞌe noziꞌel la ye, o yaas na yi ne Isaak saꞌan na la. Ka o sin ka nok o ye o maal maan. 19 Abraham da miꞌ ye Winaꞌam na tunꞌe vuꞌug Isaak kumin. Wuu pianꞌad wen ne, Abraham da diꞌe Isaak kumin.

20 Ka yadda niŋir zug ka Isaak tis Jakob ne Esau wusa yelsum.

21 Ka yadda niŋir zug ka Jakob tis Josef biis ayi yelsum, on da bood kuꞌum la, ka zaŋi duore tik n sunri n sosid Winaꞌam la.

22 Yadda niŋir zug ka Josef, on da bood kuꞌum la, ka yel Israel dim ye ba na ti yi Egipiti teŋin la, ka ziꞌel noor ye ba yaꞌa ti yit n lebidi ba meŋ teŋin la, ban nokim o niŋgbiŋ n mum anina.

23 Ka yadda niŋir zug ka ban da duꞌa Moses la ka o baꞌ ne o ma suaꞌa o nwadis atanꞌaŋa, ban nye ka o a bivenliŋ la, ka pu zot dabiem naꞌab wada yela la.

24 Yadda niŋir zug ka Moses, on da nobug la, ka zanꞌas ye ba da buol o naꞌab Faaro poꞌayua biiga. 25 O gaŋ ye o laꞌam namis ne Winaꞌam nidib n gat ye o nye tuumbeꞌed malisim line pu yaꞌasid naare. 26 Ka siak ye ba yaꞌa tuꞌ on Kiristo zug, li a suꞌum n gat kpanꞌam line be Egipiti teŋgbauŋin wusa, bozugo o mor potenꞌer ye o yood be tuon. 27 Ka yadda niŋir zug ka o bas Egipiti ka pu zot dabiem ne naꞌab la supeene, ka da modig, bozugo o nye one ka ninsaalib pu nyet ne ba nini la. 28 Yadda niŋir zug ka o maal kuꞌum malek gaadug maan, ka zuꞌas ziim la ye malek one kuud bikpeenmnam la da ku Israel dim bikpeenmnama.

29 Ka yadda niŋir zug ka Israel dim da loꞌoŋ Ateuk Zenꞌug la wen wuu kuꞌomi kpinꞌei ka ke teŋ la kpiꞌemis siꞌem la, ka Egipiti dim me tuꞌas ye ba loꞌoŋ ka kuꞌom la dii ba.

30 Yadda niŋir zug ka Jeriko teŋ zaŋguom beda la lu, saŋkan ka Israel dimi da keŋ giligi teŋ la daar wusa noor yinni keŋ paae daba ayopoi.

31 Ka yadda niŋir zug ka Rahab one da a poꞌagoondir la tilig, on da diꞌe nimbane kena ye ba labisi gos Jeriko teŋ la, ka pu kpi wenne bane da zanꞌas laa.

32 Ka m na yel bo yaꞌase? M kaꞌa saŋa na pianꞌ Gideon ne Barak ne Samson ne Yefta ne David ne Samuel ne Winaꞌam nodiꞌesidib la yelaa. 33 Yadda niŋir zug ka ba nyaŋ naꞌanam soꞌolim, ka soꞌe nidib ne yelsida, ka diꞌe noziꞌela, ka kpar gbigima noya, 34 ka buk bugum la paŋ, ka pons ne zaba suꞌuraug, ka nye paŋi ba tadimisin ka lieb paŋ dim zaba ni, ka nyaŋ saam zabzabidib. 35 Ka poꞌab len diꞌe ba nidib bane kpi ka vuꞌug la. Ka sieba namisid bedego ka zanꞌas ye ba paam yolisug, bozugo ba bood ye ba ti vuꞌug kumin ka nye nyovur suŋ. 36 Ka ba laꞌad ka fiꞌebid sieba, ka lo sieba more kpenꞌes sarega ni, 37 ka lob sieba ne kuga n ku, ka nok kampenta suꞌugo sonꞌ sieba n ku, ka ku sieba ne suꞌuraad. Ka sieba yirid ka yeꞌ peꞌes ne buus gbana, ka pu mor siꞌel siꞌela, ka di fara ne namisug. 38 Ba ane bane ka dunia la pu nar ne ba laa, ka yiridne moogin ne zueya ni ka gbeend bunboꞌadin ne tampiilema ni.

39 Hale baa ba yadda niŋir yela ke ka ba nye yuꞌusuŋ la, ba soꞌ pu diꞌe Winaꞌam noziꞌel laa. 40 Ka Winaꞌam pun deŋim maal bunsuma tisi ti la, ye li yaꞌa kaꞌane ti yelaa, ba ku lieb bunsuma ameŋa ka gbaꞌar kaeꞌ.