1 Man Paul ne Silvanus ne Timoti sobid gbauŋ kaŋa n tisid yanam Winaꞌam nidib bane be Tesalonika teŋin la n be ti Baꞌ Winaꞌam ne Zugsob Yesu Kiristo ni la.

Winaꞌam na tisi ya yelsum ne sumalisim.

2 Ti puꞌusid Winaꞌam bareka saŋa wusa ya zug, ka tiendi ya yela ti winsosugin. 3 Ka tenr ti Baꞌ Winaꞌam la tuon ya yadda niŋir ne ya noŋilim line ke ka ya tum bedego ka ya tiꞌir kpemisi ya, ka ya modig be ti Zugsob Yesu Kiristo ni.

4-5 Ti baꞌabiis ban ka Winaꞌam noŋ la. Ti daa mor labasuŋ la na tisi ya ka li kaꞌane pianꞌad maꞌanee, ka lee ane ne Winaꞌam Siig Suŋ paŋ. Ka ti daa miꞌ suꞌuŋa ye Winaꞌam tumi ya saꞌan, ka daa baŋ ye o gaŋi ya. Tinam daa be ne ya la, ya daa miꞌ ti belim daa a siꞌem. Ka li ane yanam suꞌum zug. 6 Ya daa ane ti tuꞌasim taas ne Zugsob la, ka diꞌe labaar n nye namisug bedego li zug la, ka laꞌam diꞌe sumalisim line yi Winaꞌam Siig Suŋ la ni na. 7 Linzug ka yadda niŋidib bane be Masedonia ne Akaia soꞌolimin me a ya tuꞌasim taas. 8 Ka nidib bedego bane be ani wum Zugsob labaar la ya saꞌan. Ka li kaꞌ bama maꞌanee, ka ane bane be zinꞌis wusa me wum ya yadda niŋir Winaꞌam ni la yela. Ka siꞌel kaeꞌ ka ti na len yeli baa. 9 Nimbama la wusa pianꞌad yanam daa diꞌe ti suꞌuŋa siꞌem, ka bas baga ka dol Winaꞌam one voe ka sid a Winaꞌam la, 10 ka gur o Biig Yesu ken la one na ti yi arazana ni la na. Winaꞌam da vuꞌug o kumin la, ka o faann ti Winaꞌam supeen kane na ti kena la ni.