Sente cörta tli omojcuelo para
HEBREOS
1
Deus tiechnunutzalo por medio de tieConietzi
1 Ipa nieca tiempo, Deus otlajtlajtuluc meyacpa hua de meyac manieras inca tobiebetcöhua por incamacopa de tlayulepantejque tli quepoaya tietlajtultzi. 2 Pero öxö, que ye teyabe pa itlamejyo tunalte, tiechnunutzalo por tiecamacopa tieConietzi, öque tiemochibele para nehuöxcatilus noche sösantle. Por medio de tieConietzi, Deus oquechejchijque noche tlöltecpactle. 3 Tietech tieConietzi cuale tequejtasque tietzotlöneles hua tieyectlaniexteles hua noche quiene iloac Deus. Hua noche sösantle yejuatzi tieConietzi quenchihualtilo ma quesequirojtacö cuale por tietlajtulchecöhualestzi. Hua yejuatzi tiechchepöjque de totlajtlacul, hua sötiepa onetlöliluc ompa tlacpac ca tiemöyecmö de Deus, öque lalebes bieye hua checöhuac iloac.
TieConietzi Deus cache cuale iloac que öngeles
4 De inu maniera tieConietzi Deus cache cuale iloac que innochtie öngeles, hua oquepexque cache bieye tucöyutl que yejua. 5 Pos Deus ayec oquelfejque yeca sente öngel:
Taja tenoConie;
öxö temetzchihualte para ma xeye tenoConie.
Cache tiel otieyelfejque Cristo ejqueu. Hua pa ocsie locör oquejtojque:
Naja neyes neiTajtzi, hua yaja iyes noConie.
6 Hua ocsajpa, cuöc tiehualtitlanuc tieConietzi öque cache importönte para ma hualiloa ipan tlöltecpactle, oquejtojque ejqueyi:
Hua ma quemabesuticö noche tieöngeles de Deus.
7 Hua de inu öngeles oquejtojque:
Quenchihualtilo tieöngeles ma yecö * Cuale nuyejque motradusirus: “espíritus”. quiename yejyecatl,
hua tietlatequepanojua quenchihualtilo ma yecö quiename tletzintle cuöc möna.
8 Cache de tieConietzi oquejtojque:
Tetlamandörus ipa motrono, oh Deus, semejcac hua para nochepa.
Inu tlacutl tli tecusörus para tetlamandörus quejtusneque que iyes melactec motlajtojcöteles.
9 Tectlasojtla yectelestle, hua tectlajyelejta tlajtlacule.
Ipampaju Deus, öque iloac Deus de taja, metzteochijque ca cache meyac pöquelestle que inu ocseque mocompanierojua.
10 Hua nuyejque tlajcuelulpanca:
Tejuatzi, oh Tlöcatzintle, ca ipiejyo noche sösantle tomotlölele tlöltecpactle;
hua elfecac icaca motlachihualestzi de momötzetzihua.
11 Yejua tlamesque, cache tejuatzi tomobetztas nochepa;
yejua innochtie tlamesque quieme sente tlaquentle,
12 hua quiename sente tlaquiemetl tequenmoquemelfis, hua mopatlasque.
Cache tejuatzi ayec tomopatlatzinoa,
hua inu xebetl de monemelestzi ayec tlames.
13 Pues Deus ayec oquelfejque yeca sente öngel:
Xomotlöle ca nomöyecmö,
hasta senamo ma nequemumiyöro moenemigos hasta itzintla mocxehua.
14 Amo oquejtojque ejqueu ca öngeles, pues yejua cate espíritus tlateotequepanojque, tli Deus quenhualtitlanque para tiechpaliebisque tejua, tli tohuöxcatisque de nemöquextelestle.