Carta de Santiago
Kjibokwo ëre tara Santiagorë
Kjibokwo ëre sorë
Domer shäng kjl̈ara ko Santiago. Woyotjl̈ĩkoba ga e Jesús l̈ëng l̈ëba. E sök Jerusalén kjokyo, ga parkono shäng Jesús tjl̈õkwo kjragaga kës l̈i kägäyo. Sbö tjl̈õkwo l̈agaga Jesús ãska l̈i tön l̈öng ëng tjokshko ga Santiago beno ba kägäyo, tak pjang Hechos 15 go sorë l̈i eni.
Eshko dbaryo ga judíoga ara l̈öng ba kjok baĩya l̈ishko l̇l̇ëm, öötong beno l̈öng kjok shto obl̈ë obl̈ë shara. Kjibokwo ëre tara Santiagorë ba kong l̈ok.
Shji l̈öng së obishko ga shji mär Jesús go l̈i kjĩshko ga shji shdungoba ĩyado l̈i tara ba kong. Shji ie Sbörë ber l̈öng shdungoba wl̈o, shji äär jëk l̈öng pjl̈o bek ba bokso wl̈o l̈i tara ba kong. Eni ga woyde ga l̇l̇ëbo wen bi kong owashko ga shji opshgawë e go l̇l̇ëm l̈i tara ba kong bakoe.
Shji mär Jesús go jl̈õkoyore miydëy sorë l̈i tara ba kong. Woyde ga shji tjl̈ẽ yõtso l̈i tara ba kong. Sbö bokso ga nopga uunkong tjwl̈õ bek, eni ga woyde ga nopga dbur arare, de l̇l̇ëmde, shji jëk l̈öng pjl̈ú nopga uunkong tjok l̈i tara ba kong bakoe.
1
1 Kjibokwo ëre taga tja Santiagorë. Tja Sbö parkaga, Tjl̈apga Jesucristo parkaga bakoe.
Israel tjëyoga kjringgwo sak kjwara kjingsho pjök (12) Jesús tjl̈õkwo kjragaga shdöktong l̈öng kjok kjwang jĩkong, kjibokwo ëre ichër jek bomi kong. Miga l̈ër bomi kong.
L̇l̇ëbo wen bi kong owa ara, shji tjl̈ĩkoba ara
2 Pjeyoga, l̇l̇ëbo wen bomi kong owa obl̈ë obl̈ë Tjl̈apga Jesús kjĩshkoshko ga pjãy wopjl̈ú ara anmoyõ. 3 Miydëmi pjl̈ú ga pjãy tjl̈ĩkoba, pjãy mär l̈öng Tjl̈apga l̈i go jl̈õkoyo miydëba e go wl̈o. Shäryë enishko ga pjãy opping l̇l̇ëbo owa kuk kjange. 4 Pjãy oppino l̇l̇ëbo owa kuk kjang pjir ga pjãy äär ber l̈öng mär Sbö go, woyde sorë l̈i eni. Eshko ga l̇l̇ëye woydëmi ame.
5 Pjãy kjok miydë woydë wl̈eni ga rokozĩ Sbö kong, ga twe bomi kong. Shji kjimte woydë jl̈õkoyo, ga kjok miydë rokëy ba kongshko ga shji wl̈õya l̇l̇ëme. 6 Gueniyo l̇l̇ëbo rokëmi ba kongshko ga woyotjl̈ĩzĩ jl̈õkoyo ga pjãy kjimte, pjãy kjimte l̇l̇ëme l̈ëmi l̇l̇ëme. Ëye l̇l̇ëbo rokë Tjl̈apga kong, ga wotjl̈ĩk ga kjimte l̇l̇ëme l̈e wl̈eni ga e iõya bakwe pjl̈ukdë l̇l̇aw pogo dl̈ung kjing go wl̈eni. 7 Ëye wotjl̈ĩk eni ga kjimte Tjl̈apgarë l̇l̇ëme. 8 Nopga eniyo wotjl̈ĩk obl̈ë obl̈ë ĩyado, l̇l̇ëye woyde l̈i miyde l̈öng l̇l̇ëme.
9 Sbö nopga l̇l̇ëbo ara l̇l̇ëm wl̈eniyo, woyde ga l̈öng wopjl̈ú, Sbö kong ga tjwl̈õ ara kjĩshko. 10 Sbö nopga l̈öng dbur ara wl̈eniyo, woyde ga l̈öng wotöshko, l̇l̇ono ga l̈öng ame kjĩshko, kjl̈o sho l̈onggwo wl̈eni. 11 Dl̈o wen tëm kjl̈irkë dbo arashko ga kjl̈o sho zröngtëng, l̈onggwo l̈on dret, ber wol̈ësowa ame. Eni wl̈eni ga nopga dbur ara wl̈eniyo l̈öng parkë dbur shak wopro ga wol̈on, ga ber l̇l̇ëye ame.
12 Ëye, l̇l̇ëbo owa wen ba kong kuya kjang ga era ber wopjl̈ú, l̇l̇ëbo owa l̈i kura jek pjir ga ie Sbörë ber sök së ĩyado ba tjok kjĩshko. Sbö tjl̈ẽno jl̈õkoyo ga ëye omwoydë ga ie ber sök eni l̈ara.
13 Shji wotjl̈ĩk tjwe l̇l̇ëbo owa shäryë l̈ëyshko ga shji tjl̈ĩngga Sbörë l̈ëy l̇l̇ëme. Sbö wotjl̈ĩk l̇l̇ëbo owa shäryë l̇l̇ëm, ga ëye tjl̈ĩya eni l̇l̇ëm bakoe. 14 Shji tjl̈ĩya, l̇l̇ëbo owa shäryë l̈ëyshko ga shji tjl̈ĩngga bi wotjl̈ĩk owa l̈irë. 15 Eni ga shji wotjl̈ĩk owa kuzong ga l̇l̇ëbo owa l̈i shäryëy. E irgo ga l̇l̇ëbo owa shäryëy jek këgong këgong. Pjirshko ga shji wol̈on, l̇l̇ëbo owa l̈i kjĩshko.
16 Pjeyoga, pjãy jyãpgwëba l̈ëba ga jl̈õ l̈ëmi l̇l̇ëme. 17 L̇l̇ëbo pjl̈ú l̈i, l̇l̇ëbo pjl̈o bek l̈i, e twaga Data Sbörë bi kong uunkong. Iök l̈ok kjopkwo go kës l̈i shäryaga erë. Iök l̈i kãl̈ã kjl̈opswë ber obl̈ë obl̈ë ĩyado. Gueniyo Sböra kjl̈opswë l̇l̇ëme. 18 Shji iara beno l̈öng së jl̈õkoyo, ba tjl̈õkwo bek l̈i go. L̇l̇ëbo tjeng kës shäryara l̈i tjrëko ga kjrara bäm go l̈i shji, shji ber ba nopga baĩya wl̈o. E irgo ga obl̈ë kjrayde shara.
Tjl̈õkwo kuy, ga kol̈ëy
19-20 Pjeyoga, tja kuzĩa. Ëye tjl̈ẽ bomi kong ga kuzĩ yõtso. Pjãy tjl̈ẽshko ga woyotjl̈ĩzĩ yõtso guing. Shji iirkëshko ga l̇l̇ëye woyde Sbörë l̈i shäryëy l̈öng l̇l̇ëme. E kjĩshko ga shji iirkë mal̈ing l̇l̇ëme. 21 E kjĩshko ga l̇l̇ëbo owa tjeng kës l̈i rayozĩa. L̇l̇ëbo pjl̈ú l̇l̇ëm shäryëba ara l̈i shäryëy ame. Tjl̈õkwo l̈ara Sbörë bomi kong, pjãy döya wl̈o l̈i, e kjrozĩ wotöy dey.
22 Gueniyo tjl̈õkwo l̈i kumi dö l̇l̇ëm, kol̈ozĩ bako, pjãy opjyãpgwë l̇l̇ëm wl̈o. 23-24 Domer shäng kjl̈ara, opĩk kjok ĩkkl̈o go. Gueniyo ga opĩno pjir ga to ey dwayo, ga bokkwo sorë woyo ba kong ame. Ëye, tjl̈õkwo l̈i kuya ga kol̈e l̇l̇ëm ga e so domer e kjoyoe. 25 Tjl̈õkwo bek l̈i, shji döya. Ga ëye opping ba go, l̇l̇ëye kuya l̈i kol̈e, ga woyotjl̈ĩya ĩyado ga era kjimte Sbörë e kjĩshko.
26 Ëye Sbö bangkjrë, Sbö tjl̈õkwo sök l̈e, gueniyo tjl̈ẽ owa wl̈eniyo ga opjyãpgwë shäng om go. Sbö poshrëya l̈e l̈i tjwl̈õ l̇l̇ëme. 27 Shji Sbö bangkjrë woydë jl̈õkoyo ga shji woyde bi Data Sbörë jëk l̈öng pjl̈o beke. Woyde ga l̇l̇upsëngga, syãpga l̈öng song wl̈eniyo l̈i kjimtëy, ga shji opdë yõtso, l̇l̇ëbo owa shärye nopga Sbö miydë l̇l̇ëm wl̈eniyorë l̈i shäryëy l̇l̇ëm wl̈o.