పేతురు రాసిన రెండవ పత్రిక
గ్రంథకర్త
2 పేతురు రచయిత అపోస్తలుడు పేతురు. 1:1 లో అతడు ఈ విషయం చెప్పాడు. 3:1 లో రచయిత తాను యేసు రూపాంతరం చూశానని చెప్పాడు (1:16-18). సమ దృక్పధ సువార్తల ప్రకారం యేసుతోబాటు అక్కడికి వెళ్ళిన ముగ్గురిలో పేతురు ఉన్నాడు. (మిగతా ఇద్దరూ యాకోబు, యోహాను). ఈ పత్రిక రచయిత తాను హతసాక్షిగా మరణించబోతున్నానని చెప్పాడు. యోహాను 21:18-19 లో యేసు ఈ సంగతి చెప్పాడు. పేతురు కొంతకాలం చెరలో ఉండి హతసాక్షి మరణం పొందుతాడని చెప్పాడు.
రచనా కాలం, ప్రదేశం
సుమారు క్రీ. శ. 65 - 68
అపోస్తలుడు తన జీవిత చరమాంకం గడిపిన రోమ్ నుండి ఈ పత్రిక రాశాడు.
స్వీకర్త
మొదటి పత్రిక ఎవరికి రాసాడో ఆ ఆసియా మైనర్ లో ఉన్నవారికే ఇది కూడా రాసి ఉండవచ్చు.
ప్రయోజనం
క్రైస్తవ విశ్వాసం యొక్క ప్రాతిపదికను వారికి జ్ఞాపకం చేయడం కోసం ఈ పత్రిక పేతురు రాశాడు (1:12-13, 16-21). అపోస్తలిక సంప్రదాయాన్ని నొక్కి చెప్పడం ద్వారా రానున్న విశ్వాసుల తరాలను పేతురు హెచ్చరిస్తున్నాడు. సమయం తక్కువగా ఉంది, దేవుని ప్రజలు అనేక ప్రమాదాలు ఎదుర్కొంటున్నారు (1:13-14; 2:1-3). రానున్న అబద్ధ బోధకుల గురించి విస్వసులను హెచ్చరించడానికి పేతురు ఈ పత్రిక రాశాడు (2:1-22). ఆ బోధకులు ప్రభువు త్వరలో రానున్నాడనే సత్యాన్ని తిరస్కరిస్తారు (3:3-4).
ముఖ్యాంశం
అబద్ధ బోధకుల గురించి హెచ్చరిక
విభాగాలు
1. అభినందనలు — 1:1, 2
2. క్రైస్తవ సుగుణాల్లో ఎదుగుదల — 1:3-11
3. పేతురు సందేశం యొక్క ఉద్దేశం — 1:12-21
4. అబద్ధ బోధకుల గురించి హెచ్చరికలు — 2:1-22
5. క్రీస్తు రాక — 3:1-16
6. ముగింపు — 3:17, 18
1
గొప్ప క్రైస్తవ సుగుణాలు
1 యేసు క్రీస్తుకు బానిస, అపొస్తలుడు అయిన సీమోను పేతురు, మన దేవుడూ, రక్షకుడూ అయిన యేసు క్రీస్తు నీతిని బట్టి మాకు సమానంగా అమూల్యమైన విశ్వాసాన్ని పొందినవారికి రాస్తున్న సంగతులు. 2 దేవునిలో, మన ప్రభువైన యేసులో పూర్తి జ్ఞానం ద్వారా మీకు కృప, శాంతి విస్తరించు గాక!
3 తన మహిమనుబట్టి, మంచి గుణాన్నిబట్టి మనలను పిలిచిన దేవుడు తన జ్ఞానం ద్వారా, తన శక్తి మూలంగా మనం జీవం, దైవభక్తి కలిగి జీవించడానికి కావలసినవన్నీ ఇచ్చాడు. 4 వీటిని బట్టే ఆయన మనకు అమూల్యమైన గొప్ప వాగ్దానాలు ఇచ్చాడు. ఈ వాగ్దానాల మూలంగా, లోకంలో ఉన్న దుర్మార్గపు కోరికల నాశనగుణం నుండి తప్పించుకుని మీరు తన స్వభావంలో పాలిభాగస్థులు కావాలన్నదే దేవుని ఉద్దేశం.
5 ఈ కారణంగా మీరు పూర్తి భక్తి శ్రద్ధలు కలిగి, మీ విశ్వాసానికి మంచి గుణం, మంచి గుణానికి జ్ఞానం, 6 జ్ఞానానికి ఆశల అదుపు, ఆశల అదుపుకు ఓర్పు, ఓర్పుకు భక్తి, 7 భక్తికి సోదర ప్రేమ, సోదర ప్రేమకు దైవ ప్రేమ జోడించండి. 8 ఇవి మీలో నిలిచి ఉండి వృద్ధి చెందినపుడు, మన ప్రభు యేసు క్రీస్తును గురించిన జ్ఞానంలో మందకొడిగా, నిష్ఫలంగా ఉండరు.
9 కాని ఈ గుణాలు లేనివాడు, తాను గతంలో చేసిన పాపాలనుండి దేవుడు శుభ్రపరిచాడని మరచిపోతాడు. అతడు దూరదృష్టి లేని గుడ్డివాడు. 10 కాబట్టి సోదరులారా, మీ పిలుపును, మీ ఎన్నికను స్థిరం చేసుకోడానికి పూర్తి శ్రద్ధ కలిగి ఉండండి. అప్పుడు మీరు ఎన్నడూ తడబడరు. 11 దీని ద్వారా మన ప్రభువు, రక్షకుడు అయిన యేసు క్రీస్తు రాజ్యంలోకి ఘనమైన ప్రవేశం మీకు దొరుకుతుంది.
12 వీటి గురించి మీకు ముందే తెలిసినా, మీరు అంగీకరించిన సత్యంలో స్థిరంగా ఉన్నా ఈ సంగతులు మీకు ఎప్పుడూ గుర్తు చేస్తూనే ఉంటాను. 13 నేను ఈ శరీరం అనే గుడారంలో ఉన్నంత వరకూ ఇవి మీకు గుర్తు చేయడం మంచిదని భావిస్తున్నాను. 14 మన ప్రభు యేసు క్రీస్తు ముందుగానే నాకు వెల్లడి చేసిన ప్రకారం నేను త్వరలోనే ఈ శరీరం వదిలేస్తానని నాకు తెలుసు. 15 నేను చనిపోయిన తరువాత కూడా మీరు వీటిని ఎప్పుడూ గుర్తు చేసుకునేలా శ్రద్ధ తీసుకుంటాను.
లేఖనాల ఘనత
16 ఎందుకంటే, మన ప్రభు యేసు క్రీస్తు శక్తిని, ఆయన రాకడను గురించి చాకచక్యంగా అల్లిన కల్పనా కథలను మేము మీకు చెప్పలేదు, ఆయన గొప్పదనాన్ని కళ్ళారా చూసిన వారుగా చెప్పాం. 17 ఆయన మన తండ్రి అయిన దేవుని నుండి ఘనత, మహిమ పొందగా, “ఈయన నా ప్రియ కుమారుడు, ఈయన విషయంలో నేను ఆనందిస్తున్నాను” అనే గొప్ప మహిమగల దైవస్వరం వచ్చినప్పుడు, 18 ఆయనతో మేము ఆ పవిత్ర పర్వతం మీద ఉండి పైనుండి వచ్చిన ఆ స్వరాన్ని స్వయంగా విన్నాం.
19 ఇంతకంటే స్థిరమైన ప్రవచన వాక్కు మనకు ఉంది. తెల్లవారి వేకువచుక్క మీ హృదయాల్లో ఉదయించే వరకూ ఆ వాక్కు చీకట్లో వెలుగు ఇచ్చే దీపంలా ఉంది. ఆ వెలుగును మీరు లక్ష్యపెడితే మీకు మేలు. 20 లేఖన ప్రవచనాలు మనిషి ఊహల్లో నుండి పుట్టలేదని మీరు ముందుగా గ్రహించాలి. 21 ప్రవచనం ఎప్పుడూ మనిషి ఉద్దేశంలో నుండి పుట్టలేదు, పరిశుద్ధాత్మతో నిండిన మనుషులు దేవుని మూలంగా మాట్లాడగా వచ్చింది.